ଚାନ୍ଦବାଲି,୨୭/୦୯: ଧରାପଡ଼ିଲେ ବାଉକ ଲୁଟେରା । ଏକ ପାଞ୍ଚ ଜଣିଆ ଟିମ୍ ବାରମ୍ବାର ବାଇକ୍ ଚୋରି କରୁଥିବା ବେଳେ ସେମାନଙ୍କ ମଧ୍ୟରୁ ୨ ଜଣ ଧରା ପଡ଼ିଛନ୍ତି । ଜଣେ ଅଭିଯୁକ୍ତ ଫେରାର ହୋଇଛି । ଗିରଫ ଅଭିଯୁକ୍ତ ଦ୍ବୟ ଗଉଡୁଣୀପୋଖରୀର ଚକ୍ରଧର ରାଉତ ଏବଂ କୁଦକାନ୍ତି ଗ୍ରାମର ସେକ୍ ସାଜନ ବୋଲି ଜଣାପଡ଼ିଛି । ଭଦ୍ରକ ଜିଲ୍ଲା ଧାମରା ଥାନା ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଧାମରା ଥାନାରେ ଗାଡ଼ି ଚୋରି ସମ୍ପର୍କରେ ବାରମ୍ବାର ଅଭିଯୋଗ ହୋଇ ଆସୁଥିଲା । ଧାମରା ପୁଲିସ ଏହି ବାଇକ୍ ଚୋରଙ୍କ ଖୋଜ ଖବର ପାଉ ନଥିଲା । ତେବେ ଦୁଇଦିନ ତଳେ ପେଟ୍ରୋଲିଂ ସମୟରେ ରାସ୍ତାରେ ଜଣେ ଯୁବକକୁ ସନ୍ଦେହଜନକ ଭାବେ ପୁଲିସ ରାତିରେ ଅଟକାଇ କୁଆଡ଼େ ଯାଉଛ ବୋଲି ପଚାରିଥିଲେ । ଯାଞ୍ଚ ବେଳେ ସେହି ଯୁବକ ଧରିଥିବା ବ୍ୟାଗରୁ ୧୨ଟି ବାଇକ୍ ଚାବିକାଠି ଏବଂ ୩ ଟି ମଙ୍କିକ୍ୟାପ୍ ବାହାରିଥିଲା । ପୁଲିସ ଏହି ଯୁବକକୁ ଥାନାକୁ ନେବା ପରେ ତାଙ୍କର ଘର ସ୍ଥାନୀୟ ଗଉଡୁଣୀପୋଖରୀ ଅଞ୍ଚଳରେ ଏବଂ ତାଙ୍କର ନାମ ଚକ୍ରଧର ରାଉତ ଓରଫ କାଳିଆ ବୋଲି ଜଣାପଡ଼ିଥିଲା । ତେବେ କାଳିଆ ସମେତ ସେମାନଙ୍କର ଏକ ୫ଜଣିଆ ବାଇକ୍ ଚୋରି ଗ୍ୟାଙ୍ଗ ରହିଛି । କାଳିଆ ଓ ଅନ୍ୟ ଜଣେ ଯୁବକ ବାଇକ୍ ଚାବି ଭାଙ୍ଗି ଚୋରି କରି ଗାଡ଼ି ପିଛା ୩ ରୁ ୪ ହଜାର ଟଙ୍କା ପାଆନ୍ତି । ଏହି ଉପାୟରେ ସେମାନେ ୧୫ ରୁ ଅଧିକ ବାଇକ ଲୁଟି ସାରିଲେଣି । ଅଭିଯୁକ୍ତ କାଳିଆର ତଥ୍ୟ ଅନୁଯାୟୀ, କୁଦକାନ୍ତି ଗ୍ରାମର ସେକ୍ ସାଜନ, ସେକ୍ କମୁଲଙ୍କ ଘର ଉପରେ ଚଢ଼ଉ କରି ସେକ୍ ସାଜନକୁ ଧରି ଥିବା ବେଳେ କମୁଲୁ ଫେରାର ହୋଇ ଯାଇଥିଲା । ଏମାନଙ୍କ ନିକଟରୁ ୩ଟି ବାଇକ ଜବତ କରିଛି ପୁଲିସ । ବାକି ଗାଡ଼ି କାହାକୁ ବିକିଛନ୍ତି ତାହାର ତଦନ୍ତ ଚଳାଇଛି ପୁଲିସ । ଉଭୟ କାଳିଆ ଓ ସେକ୍ ସାଜନକୁ ପୁଲିସ ଗିରଫ କରି କୋର୍ଟ ଚାଲାଣ କରିଛି । ଧାମରା, ଦୋସିଙ୍ଗା, କଇଥିଖୋଲା, ବାଂଶଡ଼ା, କରଞ୍ଜମାଳ ଆଦି ଅଞ୍ଚଳରୁ ଏହି ଗ୍ୟାଙ୍ଗ ବାଇକ୍ ଲୁଟ କରି ବିକ୍ରି କରୁଥିବା ଅନୁମାନ କରାଯାଉଛି।
