ଭଦ୍ରକ ୧।୧୦: ଭଦ୍ରକ ହିଂସା ଘଟଣାରେ ଧାମନଗର ଥାନାରେ ପୋଲିସ ଡିଜି ୱାଈ.ବି. ଖୁରାନିଆ ଓ ଆଇନଶୃଙ୍ଖଳା ଏଡିଜି ସଞ୍ଜୟ କୁମାର ସମୀକ୍ଷା କରିଛନ୍ତି । ଭଦ୍ରକ ଓ ଧାମନଗରରେ ଉଭୟ ସ୍ଥିତି ସମୀକ୍ଷା କରିଛନ୍ତି । ସମୀକ୍ଷା ବୈଠକରେ ଡିଆଜି ଡ. ସତ୍ୟଜିତ ନାୟକ, ଏସ୍ପି ବରୁଣ ଗୁଣ୍ଠୁପାଲି ପ୍ରମୁଖ ବରିଷ୍ଠ ପ୍ରଶାସକ ଉପସ୍ଥିତ ଥିଲ। ଭଦ୍ରକ ସ୍ଥିତି ଉପରେ ନଜର ରଖାଯାଇଛି । ଧାମନଗରରେ କିଛି ସ୍ଥାନରେ କଟକଣା ଆଂଶିକ କୋହଳ କରାଯାଇଛି।
ସମୀକ୍ଷା ପରେ ଡିଜିପି ୱାଈ.ବି. ଖୁରାନିଆ କହିଛନ୍ତି, ସ୍ଥିତି ନିୟନ୍ତ୍ରଣରେ ଅଛି । ଦିନେ ଦୁଇ ଦିନରେ ସ୍ଵାଭାବିକ ହେବ । ଅଧିକାରୀଙ୍କ ସହ ଆଲୋଚନା କରାଯାଇଛି। ୨୨ ତାରିଖରେ ଘଟଣା ପରେ ପୋଲିସ ସଜାଗ ହୋଇଛି । ୫ଟି ଥାନା ଅଞ୍ଚଳ ପ୍ରଭାବିତ ହୋଇଥିଲା ଏବେ ସେଠାରେ ଶାନ୍ତି ଫେରିଛି। ଜିଲ୍ଲାରେ ସୁରକ୍ଷା ଦୃଷ୍ଟିରୁ ପୋଲିସ ଓ ରାପିଡ ଆକ୍ସନ ଫୋର୍ସ ନିୟମିତ ପାଟ୍ରୋଲିଂ କରୁଛନ୍ତି । ସୋସିଆଲ ମିଡ଼ିଆରେ ଭୁଲ୍ ପୋଷ୍ଟ ହେଉଥିବା ଆମ ନଜରକୁ ଆସୁଛି । ଆପତ୍ତିଜନକ ପୋଷ୍ଟ ଦେଖିଲେ ପୋଲିସକୁ ଜଣାନ୍ତୁ । ପୋଲିସ କାର୍ଯ୍ୟାନୁଷ୍ଠାନ ନେବ ବୋଲି ଡିଜିପି କହିଛନ୍ତି ।
ଅନ୍ୟପଟେ ଭଦ୍ରକ ହିଂସାକାଣ୍ଡ ଘଟଣାରେ ସୋମବାର ସୁଦ୍ଧା ୨୭ ଜଣ ଗିରଫ ହୋଇଛନ୍ତି । ସ୍ୱତନ୍ତ୍ର ଟିମ୍ ଘଟଣାର ତଦନ୍ତ ଜାରି ରଖିଥିବା ବେଳେ ଗିରଫ ସଂଖ୍ୟା ଆହୁରି ବଢ଼ିବ ।
