କଟକ,୨୧/୦୬: ବାରବାଟୀ ଷ୍ଟାଡିୟମ୍ରେ ଆସନ୍ତା ବର୍ଷ ଫେବ୍ରୁଆରୀ ୯ ତାରିଖରେ ଭାରତ-ଇଂଲଣ୍ଡ ଦ୍ୱିତୀୟ ଦିନିକିଆ ମ୍ୟାଚ ଖେଳାଯିବ । ତେଣୁ ଏହା ପୂର୍ବରୁ ଷ୍ଟାଡିୟମ୍ ନବକଳେବର କାର୍ଯ୍ୟ କିମ୍ବା ଷ୍ଟାଡିୟମ୍ର କୌଣସି ଭାଗ ଭଙ୍ଗା ଯିବନାହିଁ । ମ୍ୟାଚ ପରେ ନବକଳେବର କାମ ଆରମ୍ଭ ହେବ । ଆଗାମୀ ୭ ମାସ ଧରି ଦିନିକିଆ ଅନ୍ତର୍ଜତୀୟ ମ୍ୟାଚ ପାଇଁ ପ୍ରସ୍ତୁତି କରାଯିବ ବୋଲି ଓଡ଼ିଶା କ୍ରିକେଟ୍ ସଂଘ (ଓସିଏ) ସମ୍ପାଦକ ସଞ୍ଜୟ ବେହେରା ପ୍ରକାଶ କରିଛନ୍ତି ।
ବାରବାଟୀ ଷ୍ଟାଡିୟମ୍କୁ ଦିନିକିଆ ମ୍ୟାଚ ମିଳିବା ପରେ ସାଧାରଣ ଜନତା ଓ କ୍ରିକେଟପ୍ରେମୀଙ୍କ ମନରେ ଷ୍ଟାଡିୟମ୍ ନବକଳେବର କାମକୁ ନେଇ ପ୍ରଶ୍ନ ଉଠିଛି । ଷ୍ଟାଡିୟମ୍ ନୂଆ ରୂପ ନେବ କି ନାହିଁ? ଯଦି ନବକଳେବର କାମ ହୁଏ ତେବେ ମ୍ୟାଚ ହେବ କି ନାହିଁ? ଯେହେତୁ ଷ୍ଟାଡିୟମ୍ କାମ ଅତିକମ୍ରେ ତିନିବର୍ଷ ଲାଗିବ ତେଣୁ ଅନ୍ତର୍ଜାତୀୟ ମ୍ୟାଚକୁ ପ୍ରାଥମିକତା ଦିଆଯାଇଛି । ତା’ଛଡ଼ା ଷ୍ଟାଡିୟମ୍ ନବକଳେବର ଲାଗି ଏପର୍ଯ୍ୟନ୍ତ ବଜେଟ୍ ଅନୁମୋଦିତ ହୋଇନାହିଁ । ୬୦୦ କୋଟି ଟଙ୍କାରେ ନୂଆ କରି ନିର୍ମାଣ କରାଯିବାକୁ ଥିବା ବାରବାଟୀ ଷ୍ଟାଡିୟମ୍ ଲାଗି ଉଭୟ ରାଜ୍ୟ ସରକାର ଓ ବିସିସିଆଇର ସହାୟତା ନେବ ଓସିଏ । ଯେହେତୁ ନିକଟରେ ସରକାର ବଦଳିଛି ତେଣୁ ଅନୁଦାନ ମିଳିବା ନେଇ ଏବେ ଓସିଏକୁ ଏତେ ସହଜ ହେବନାହିଁ । ତେଣୁ ନବକଳେବର କାମକୁ ସ୍ଥଗିତ ରଖିବାକୁ ଓସିଏ ଯୋଜନା କରିଛି ।
ସୂଚନାଯୋଗ୍ୟ, ଗତ ଜାନୁୟାରୀ ୨୭ରେ ବାରବାଟୀ ନବକଳେବର ପ୍ରକଳ୍ପର ଶିଳାନ୍ୟାସ କରାଯାଇଥିଲା । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ଅନ୍ତର୍ଜାତୀୟ କ୍ରିକେଟର୍ ଇର୍ଫାନ୍ ପଠାନ୍, ପ୍ରଜ୍ଞାନ୍ ଓଝା, ଆଇପିଏଲ୍ ଗଭର୍ଣ୍ଣିଂ କାଉନସିଲ ଅଧ୍ୟକ୍ଷ ଅରୁଣ ସିଂହ ଧୂମାଲ ପ୍ରମୁଖ ଯୋଗ ଦେଇଥିଲେ । ଓଡ଼ିଶା ସରକାର, ବିସିସିଆଇ ଓ ଓସିଏ ମିଳିତ ଭାବେ ଏହି ଷ୍ଟାଡିୟମ୍ର ନବକଳେବର ବାବଦରେ ଖର୍ଚ୍ଚ କରିବେ ବୋଲି ଘୋଷଣା କରାଯାଇଥିଲା । ଷ୍ଟାଡିୟମ୍ର ଦର୍ଶକ ଧାରଣ କ୍ଷମତା ୬୦ହଜାରକୁ ବୃଦ୍ଧି ହେବ ।
ଏହାସହ ଭାରତର ପ୍ରଥମ ଇନ୍ଡୋର କ୍ରିକେଟ ଷ୍ଟାଡିୟମ୍ ଭାବେ ବାରବାଟୀ ଷ୍ଟାଡିୟମ୍ର ନବୀକରଣ କରିବାକୁ ବି ଓସିଏ ଲକ୍ଷ୍ୟ ରଖିଛି । କିନ୍ତୁ ଏହା ପୂର୍ବରୁ ବାରବାଟୀ ଷ୍ଟାଡିୟମ୍ ଜମି ମାଲିକାନା ଓଡ଼ିଶା ଅଲିମ୍ପିକ୍ ଆସୋସିଏସନ୍(ଓଓଏ) ହାତକୁ ଆଣିବାକୁ ଯୋଜନା କରାଯାଇଥିଲା । ଓଓଏ ତରଫରୁ ଏନେଇ ବିଧିବଦ୍ଧ ଭାବେ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଥିଲା । ବିଜେଡି ସରକାରର ଶେଷ କ୍ୟାବିନେଟ୍ରେ ଓଓଏକୁ ଜମି ହସ୍ତାନ୍ତର କରିବା ନେଇ ନିଷ୍ପତ୍ତି ନିଆଯାଇଥିଲା । ପ୍ରଶାସନ ତରଫରୁ ଏନେଇ ପ୍ରକ୍ରିୟା ଜାରି ରହିଥିବା ଜଣାପଡିଛି । ଏଭଳି ସ୍ଥିତିରେ ବାରବାଟୀ ନବକଳେବର ଲାଗି କେବଳ ଅନୁଦାନର ଅପେକ୍ଷା ରହିଛି । କିନ୍ତୁ ନୂଆ ସରକାର ଏ ଦିଗରେ ବିଚାର କରିବେ ।
ବାରବାଟୀ ଷ୍ଟାଡିୟମ୍କୁ ମିଳିଥିବା ମ୍ୟାଚର ସଫଳ ପରିଚାଳନା ପାଇଁ ଓସିଏ ଦୃଢ ଆଶା ରଖିଛି । ଓସିଏ ସମ୍ପାଦକ ସଞ୍ଜୟ ବେହେରା କହିଛନ୍ତି, ମ୍ୟାଚ ନେଇ ଗତ ୧୫ଦିନ ତଳେ ବିସିସିଆଇ ସାଧାରଣ ସମ୍ପାଦକ ଜୟ ଶାହାଙ୍କ ସହ ବୈଠକ ହୋଇଥିଲା । ବାରବାଟୀକୁ ମ୍ୟାଚ ଦେବା ନେଇ ଅନୁରୋଧ କରିଥିଲି । ଆମ ଅନୁରୋଧ ରକ୍ଷା କରି ବିସିସିଆଇ କଟକକୁ ମ୍ୟାଚ ଦେଇଥିବାରୁ ଆମେ କୃତଜ୍ଞତା ଜ୍ଞାପନ କରୁଛୁ । କ୍ରିକେଟପ୍ରେମୀଙ୍କ ଉତ୍ସାହକୁ ଦେଖି ପ୍ରଥମେ ମ୍ୟାଚ କରିବୁ ।’
