ଇସଲାମାବାଦ,୨୩।୩: ବେଲୁଚିସ୍ତାନର ନୋଶକି ଜିଲ୍ଲାରେ ପାକିସ୍ତାନୀ ସୁରକ୍ଷା ବାହିନୀ ଉପରେ ବଡ଼ ହମଲା। ବେଲୁଚ୍ ବିଦ୍ରୋହୀମାନେ କରିଛନ୍ତି ଆକ୍ରମଣ। ପାକିସ୍ତାନୀ ଗଣମାଧ୍ୟମ ମିଡିଆ ଆଉଟଲେଟ୍ ଏଆରୱାଇ ନ୍ୟୁଜ୍ ରିପୋର୍ଟ କରିଛି ଯେ, ଆକ୍ରମଣରେ ୪ ଜଣ ପୁଲିସ କର୍ମଚାରୀଙ୍କ ମୃତ୍ୟୁ ହୋଇଛି। ଅଧିକାରୀଙ୍କ ସୂଚନା ଅନୁଯାୟୀ, ଗରିବାବାଦ ଅଞ୍ଚଳରେ ଗୁଳିକାଣ୍ଡ ଘଟଣା ଘଟିଛି। ସଶସ୍ତ୍ର ଆକ୍ରମଣକାରୀମାନେ ଏକ ପୁଲିସ ପାଟ୍ରୋଲିଂ ଭ୍ୟାନକୁ ଘେରି ଗୁଳି ଚଳାଇଥିଲେ, ଯାହାଫଳରେ ଚାରି ଜଣ ସୁରକ୍ଷା କର୍ମୀଙ୍କ ମୃତ୍ୟୁ ହୋଇଥିଲା। ଘଟଣା ଘଟାଇବା ପରେ ସଶସ୍ତ୍ର ଆକ୍ରମଣକାରୀମାନେ ଘଟଣାସ୍ଥଳରୁ ଖସି ପଳାଇବାରେ ସଫଳ ହୋଇଥିଲେ।
ରିପୋର୍ଟ ଅନୁସାରେ, ସୁରକ୍ଷା ବାହିନୀ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ ସ୍ଥାନୀୟ ହସ୍ପିଟାଲକୁ ନେଇଯାଇଥିଲେ। ବେଲୁଚିସ୍ତାନ ମୁଖ୍ୟମନ୍ତ୍ରୀ ମୀର ସରଫରାଜ ବୁଗତି ଏହି ଆକ୍ରମଣକୁ ଦୃଢ଼ ନିନ୍ଦା କରିଛନ୍ତି ଏବଂ ମୂଲ୍ୟବାନ ଜୀବନ ହରାଇବା ପାଇଁ ଗଭୀର ଶୋକ ପ୍ରକାଶ କରିଛନ୍ତି। ବୁଗଲି ଏହି ଆକ୍ରମଣକୁ ନିନ୍ଦା କରି ଏହାକୁ ଏକ କାପୁରୁଷତାପୂର୍ଣ୍ଣ କାର୍ଯ୍ୟ ବୋଲି କହିଥିଲେ ଏବଂ କହିଛନ୍ତି ଯେ ବେଲୁଚିସ୍ତାନରେ ଶାନ୍ତି ଏବଂ ବିକାଶ ପ୍ରକ୍ରିୟାକୁ ବାଧା ଦେବା ପାଇଁ ଏପରି ପ୍ରୟାସ ସଫଳ ହେବ ନାହିଁ। 'ଯେଉଁମାନେ ନିରୀହ ଲୋକଙ୍କ ଜୀବନ ସହିତ ଖେଳନ୍ତି, ସେମାନଙ୍କୁ ଗମ୍ଭୀର ପରିଣାମ ଭୋଗ କରିବାକୁ ପଡିବ।
ଉଲ୍ଲେଖନୀୟ ଯେ, ନୌଶକିରେ ନିକଟରେ ଏହା ଘଟିଥିବା ଦ୍ବିତୀୟ ଘଟଣା। ଏହା ପୂର୍ବରୁ, ବେଲୁଚିସ୍ତାନ ଲିବରେସନ ଆର୍ମି (ବିଏଲଏ) ପାକିସ୍ତାନୀ ସେନାର ଏକ କନଭୟ ଉପରେ ଆକ୍ରମଣ କରିଥିଲା ଏବଂ ସୈନିକ ଭର୍ତ୍ତି ଏକ ବସ୍ ବିସ୍ଫୋରଣ କରିଥିଲା। ବିଦ୍ରୋହୀମାନେ ୯୦ ଜଣ ସୈନିକଙ୍କ ମୃତ୍ୟୁ ଦାବି କରିଥିଲେ। କିନ୍ତୁ ଅଧିକାରୀମାନେ ୭ ଜଣ ସୈନିକଙ୍କ ମୃତ୍ୟୁକୁ ସ୍ୱୀକାର କରିଥିଲେ। ଅନ୍ୟପକ୍ଷରେ, ଶନିବାର ଦିନ ବେଲୁଚିସ୍ତାନର କଳାତ ଜିଲ୍ଲାରେ ସଶସ୍ତ୍ର ଆକ୍ରମଣକାରୀଙ୍କ ଗୁଳିରେ ପଞ୍ଜାବର ଚାରି ଜଣ ଶ୍ରମିକଙ୍କ ମୃତ୍ୟୁ ଘଟିଛି। ଆକ୍ରମଣକାରୀମାନେ ଖସି ପଳାଇବାରେ ସଫଳ ହୋଇଥିବା ବେଳେ ଶ୍ରମିକମାନଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ରିପୋର୍ଟ ଅନୁସାରେ, ପୀଡିତମାନେ ଜଣେ ସ୍ଥାନୀୟ ଜମିଦାରଙ୍କ ପାଇଁ ଏକ ନଳକୂଅ ଖୋଳୁଥିଲେ।
