ନୂଆଦିଲ୍ଲୀ: ବ୍ରିଟେନ ମାନବାଧିକାର ଉଲ୍ଲଂଘନ ଅଭିଯୋଗରେ ଶ୍ରୀଲଙ୍କାର ଶୀର୍ଷ ସାମରିକ କମାଣ୍ଡରଙ୍କ ସମେତ ଚାରି ଜଣଙ୍କ ଉପରେ ପ୍ରତିବନ୍ଧକ ଲଗାଇଛି। ଏହି ସାମରିକ କମାଣ୍ଡର ମାନେ ୨୦୦୯ ମସିହାରେ LTTE ବିରୁଦ୍ଧରେ ସାମରିକ ଅଭିଯାନ ସମୟରେ ଗମ୍ଭୀର ମାନବାଧିକାର ଉଲ୍ଲଂଘନ କରିଥିବା ଅଭିଯୋଗ ହୋଇଛି। ସୋମବାର ଦିନ ବ୍ରିଟେନ ବୈଦେଶିକ କାର୍ଯ୍ୟାଳୟ ଏକ ବିବୃତ୍ତି ଜାରି କରି ଏହି ସୂଚନା ଦେଇଛି। ବିବୃତ୍ତି ଅନୁଯାୟୀ, ଯେଉଁ ସାମରିକ କମାଣ୍ଡର ମାନଙ୍କ ଉପରେ ପ୍ରତିବନ୍ଧକ ଲଗାଯାଇଛି, ସେମାନଙ୍କ ମଧ୍ୟରେ ପୂର୍ବତନ ଶ୍ରୀଲଙ୍କା ସଶସ୍ତ୍ର ବାହିନୀର ପୂର୍ବତନ ମୁଖ୍ୟ ଶୈବେନ୍ଦର ସିଲଭା, ପୂର୍ବତନ ନୌସେନା କମାଣ୍ଡର ବସନ୍ଥା କରନାଗୋଡା ଏବଂ ପୂର୍ବତନ ଶ୍ରୀଲଙ୍କା ସେନା କମାଣ୍ଡର ଜଗତ ଜୟସୁରିଆ ସାମିଲ।

ଏମାନଙ୍କ ବ୍ୟତୀତ, ପୂର୍ବତନ LTTE ଉପନେତା ବିନୟମୂର୍ତ୍ତି ମୁରଲୀଧରନଙ୍କ ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି। ବିନୟମୂର୍ତ୍ତି LTTE ବିରୋଧରେ ବିଦ୍ରୋହ କରିଥିଲେ ଏବଂ ପରେ ଶ୍ରୀଲଙ୍କା ସରକାରରେ ମନ୍ତ୍ରୀ ହୋଇଥିଲେ। ଏହି ପ୍ରତିବନ୍ଧକ ଅନୁଯାୟୀ, ଏହି ଚାରି ଜଣଙ୍କୁ ବ୍ରିଟେନ ଯାତ୍ରା କରିବା ପାଇଁ ନିଷେଧ କରାଯିବ ଏବଂ ବ୍ରିଟେନରେ ଥିବା ସେମାନଙ୍କର ସମ୍ପତ୍ତି ମଧ୍ୟ ଜବତ କରାଯାଇଛି। ବିବୃତ୍ତିରେ କୁହାଯାଇଛି ଯେ ଯେଉଁମାନଙ୍କୁ ନିଷିଦ୍ଧ କରାଯାଇଛି ସେମାନେ ଶ୍ରୀଲଙ୍କାର ଗୃହଯୁଦ୍ଧ ସମୟରେ ଗମ୍ଭୀର ମାନବାଧିକାର ଉଲ୍ଲଂଘନ କରିଥିଲେ। ଏହି ଲୋକମାନେ ନ୍ୟାୟିକ ହାଜତରେ ହତ୍ୟା, ନିର୍ଯାତନା ଏବଂ ଯୌନ ହିଂସା ଘଟଣାରେ ସମ୍ପୃକ୍ତ ଥିଲେ।

ସୂଚନାଥାଉକି, ଶ୍ରୀଲଙ୍କାରେ, ଲିବରେସନ ଟାଇଗର୍ସ ଅଫ୍ ତାମିଲ ଏଲମ୍ (LTTE) ନେତୃତ୍ୱରେ ତାମିଲ ଲୋକ ମାନେ ଏକ ସ୍ୱତନ୍ତ୍ର ଦେଶ ଦାବି କରୁଥିଲେ। LTTE ତିନି ଦଶନ୍ଧି ଧରି ଏଥିପାଇଁ ଲଢ଼ିଥିଲା, ଯେଉଁଥିରେ ୨୦ ହଜାରରୁ ଅଧିକ ଲୋକ ନିଖୋଜ ହୋଇଯାଇଥିଲେ ଏବଂ ଏହି ଗୃହଯୁଦ୍ଧ ସମୟରେ ଅତି କମରେ ଏକ ଲକ୍ଷ ଲୋକ ପ୍ରାଣ ହରାଇଥିଲେ। ୧୮ ମଇ ୨୦୦୯ରେ LTTE ମୁଖ୍ୟ ଭେଲୁପିଲାଇ ପ୍ରଭାକରନଙ୍କ ମୃତ୍ୟୁ ସହିତ ଏହି ଗୃହଯୁଦ୍ଧର ଅନ୍ତ ଘଟିଥିଲା।