ନୂଆଦିଲ୍ଲୀ,୨୫/୦୩: ପୁଣି ଭାରତକୁ ଟ୍ରମ୍ପଙ୍କ ଝଟକା । ବଢିପାରେ ତେଲର ମୂଲ୍ୟ । ଭେନେଜୁଏଲାରୁ ତେଲ କିମ୍ବା ଗ୍ୟାସ କିଣୁଥିବା ଯେକୌଣସି ଦେଶକୁ ଆମେରିକା ସହିତ ବାଣିଜ୍ୟ ଉପରେ ୨୫ ପ୍ରତିଶତ ଶୁଳ୍କ ଦେବା ନେଇ ଘୋଷଣା କରିଛନ୍ତି ଟ୍ରମ୍ପ। 

ଟ୍ରମ୍ପ ପ୍ରଶାସନ ପୂର୍ବରୁ ଭେନେଜୁଏଲା ଉପରେ ଅନେକ କଟକଣା ଲଗାଇ ସାରିଛି। ସେ ରାଷ୍ଟ୍ରପତି ନିକୋଲାସ ମାଦୁରୋଙ୍କ ସରକାରଙ୍କୁ ମାନ୍ୟତା ଦେଇ ନାହାନ୍ତି। ଟ୍ରମ୍ପ ଭେନେଜୁଏଲା ଉପରେ ଟ୍ରେନ୍ ଡି ଆରାଗୁଆ ଗ୍ୟାଙ୍ଗ ସମେତ ଅପରାଧୀଙ୍କୁ ଆମେରିକା ପଠାଉଥିବାର ଅଭିଯୋଗ କରିଥିଲେ। ଆମେରିକା ସରକାର ଏହାକୁ ଏକ ବିଦେଶୀ ଆତଙ୍କବାଦୀ ସଂଗଠନ ଘୋଷଣା କରିଛି। ଏହି ସମସ୍ତ କାରଣ ଯୋଗୁଁ ଟ୍ରମ୍ପ ଭେନେଜୁଏଲାକୁ ଆର୍ଥିକ ଦୃଷ୍ଟିରୁ ମଧ୍ୟ ଦୁର୍ବଳ କରିବାକୁ ଚାହୁଁଛନ୍ତି।

ଭାରତ ବିଶ୍ୱର ତୃତୀୟ ବୃହତ୍ତମ ତୈଳ ଉପଭୋକ୍ତା ଏବଂ ଭେନେଜୁଏଲାରୁ ଅଶୋଧିତ ତୈଳ ଆମଦାନୀ କରେ। ଭେନେଜୁଏଲାରୁ  ଭାରତ ଡିସେମ୍ବର ୨୦୨୩ରେ ପ୍ରତିଦିନ ୧୯୧,୬୦୦ ବ୍ୟାରେଲ (BPD) ତେଲ କିଣିଥିଲା। ସେହିପରି ଜାନୁଆରୀ ୨୦୨୪ରେ  ଭାରତର ଆମଦାନି ୨୫୪,୦୦୦ ବିପିଡିକୁ ବୃଦ୍ଧି ପାଇଛି। ଯାହା ଭେନେଜୁଏଲାର ମୋଟ ତୈଳ ରପ୍ତାନିର ୫୦ ପ୍ରତିଶତ ଅଟେ। ଯଦି ଭାରତ ଭେନେଜୁଏଲାରୁ ତେଲ କିଣିବା ଜାରି ରଖେ, ତେବେ ଆମେରିକା ସହିତ ବାଣିଜ୍ୟ ଉପରେ ଏହାକୁ ଅତିରିକ୍ତ ୨୫ ପ୍ରତିଶତ ଶୁଳ୍କ ଦେବାକୁ ପଡ଼ିପାରେ।

ଏହା ମଧ୍ୟ ପଢନ୍ତୁ- ଋଷିଆରୁ କମୁଥିବା ତୈଳ ବିପଣନକୁ ବଢାଇବ ଭାରତ; ତୈଳ ରିଫାଇନରମାନେ ଦେଲେ ସୂଚନା

ଭାରତ ଭେନେଜୁଏଲାରୁ ଶସ୍ତା ତେଲ ପାଏ। ଯଦି ଶୁଳ୍କ ଲାଗୁ ହୁଏ, ତେବେ ଭାରତକୁ ସାଉଦି ଆରବ, ଇରାକ କିମ୍ବା ରୁଷରୁ ତେଲ କିଣିବାକୁ ପଡ଼ିପାରେ। ଏହା ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି କରିପାରେ। ଆମେରିକାର ଏହି ନିଷ୍ପତ୍ତି ତେଲ ମୂଲ୍ୟ ବୃଦ୍ଧି କରିପାରେ। ଚୀନ୍ ଏବଂ ତୁର୍କୀ ଭଳି ଦେଶ ମଧ୍ୟ ପ୍ରଭାବିତ ହୋଇପାରନ୍ତି। ଭେନେଜୁଏଲା ଉପରେ ଆମେରିକାର କଟକଣା ପୂର୍ବରୁ ଲାଗୁ ହୋଇଛି। ନୂତନ ଶୁଳ୍କ ଦୁଇ ଦେଶ ମଧ୍ୟରେ ସମ୍ପର୍କକୁ ଆହୁରି ଖରାପ କରିବ। ଟ୍ରମ୍ପ କହିଛନ୍ତି ଯେ ଏହି ଶୁଳ୍କ ୨ ଏପ୍ରିଲ୍ ୨୦୨୫ ରେ ଲାଗୁ ହେବ।