ନୂଆଦିଲ୍ଲୀ: ବାଂଲାଦେଶ ସେନା ରବିବାର ନ୍ୟାସନାଲ ସିଟିଜେନ୍ ପାର୍ଟି (ଏନସିପି) ନାମକ ଛାତ୍ର ନେତୃତ୍ୱାଧୀନ ଦଳର ଏକ ଅଭିଯୋଗକୁ ପ୍ରତ୍ୟାଖ୍ୟାନ କରିଛି। ଏନସିପି ନେତା ହସନାତ ଅବଦୁଲ୍ଲାହ ଶନିବାର ସେନାକୁ ନେଇ ଏକ ଅଜବ ଦାବି କରିଥିଲେ। ବାଂଲାଦେଶ ସେନା ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ଅୱାମୀ ଲିଗ୍କୁ ପୁଣି ଥରେ ଶାସନ ଭାରରେ ଆଣିବାକୁ ଚକ୍ରାନ୍ତ ଚଳାଇଛି ବୋଲି ସେ ଅଭିଯୋଗ ଅଣିଛନ୍ତି। ତେବେ ତାଙ୍କର ଏହି ଅଭିଯୋଗକୁ ସେନା ଖଣ୍ଡନ କରିବା ସହ ଏହାକୁ ଏକ ହାସ୍ୟାସ୍ପଦ କଥା କହିଛି।
ବାଂଲାଦେଶର ମୁଖ୍ୟ ଉପଦେଷ୍ଟା ମହମ୍ମଦ ୟୁନୁସଙ୍କ ସମର୍ଥନରେ ଏନସିପି ଦଳ ଗଠିତ ହୋଇଛି ବୋଲି ଅନୁମାନ କରାଯାଉଛି। ଏହି ଛାତ୍ରଦଳ ଶନିବାର ଢାକା ବିଶ୍ୱବିଦ୍ୟାଳୟ ପରିସରରେ ବିକ୍ଷୋଭ ପ୍ରଦର୍ଶନ କରିବା ସହ ସେନା ସରକାର ପଛରେ ଷଡ଼ଯନ୍ତ୍ର କରୁଛି ବୋଲି ସ୍ଲୋଗାନ ଦିଆଯାଇଥିଲା। ଛାତ୍ରନେତା ଅବଦୁଲ୍ଲା କହିଥିଲେ ଯେ, "ସେନା ନିଜ ସୀମା ମଧ୍ୟରେ ରହି କାର୍ଯ୍ୟ କରିବା କଥା। 'ବିପ୍ଳବ ପରବର୍ତ୍ତୀ ବାଂଲାଦେଶ'ରେ ସେନାର କୌଣସି ହସ୍ତକ୍ଷେପ ଗ୍ରହଣ କରାଯିବ ନାହିଁ।"
ଏନସିପି ସଂଯୋଜକ ନାହିଦ ଇସଲାମ ଅବଦୁଲ୍ଲାହଙ୍କୁ ସମର୍ଥନ କରିଛନ୍ତି। ସେନା କିମ୍ବା ଅନ୍ୟ କୌଣସି ରାଷ୍ଟ୍ରୀୟ ସଂସ୍ଥାର ରାଜନୀତି ପ୍ରସ୍ତାବ କିମ୍ବା ନିଷ୍ପତ୍ତି ନେବାର କୌଣସି ଅଧିକାର ନାହିଁ ବୋଲି ସେ କହିଛନ୍ତି। ସେନା ଏହି ମାମଲାରେ ଶାନ୍ତ ରହିବା ସହ ବିକ୍ଷୋଭକାରୀଙ୍କ ସହ ସଂଘର୍ଷରୁ ଦୂରେଇ ରହିଥିଲା।
ଏହି ଘଟଣା ବାଂଲାଦେଶରେ ରାଜନୈତିକ ଉତ୍ତେଜନାକୁ ଆହୁରି ବୃଦ୍ଧି କରିଛି। ଆପଣଙ୍କୁ ଜଣାଇରଖୁ ଯେ, ଗତ ବର୍ଷ ଅଗଷ୍ଟ ମାସରେ ଛାତ୍ର ଆନ୍ଦୋଳନ ପରେ ଶେଖ ହସିନାଙ୍କ ସରକାରର ପତନ ହୋଇଥିଲା। ଏନସିପି ଅୱାମୀ ଲିଗ୍ର ଘର ବାହୁଡାକୁ ଦୃଢ଼ ବିରୋଧ କରୁଛି। ଯାହା ଦେଶରେ ଏକ ନୂତନ ରାଜନୈତିକ ସଂଘର୍ଷର ସମ୍ଭାବନାକୁ ଦର୍ଶାଉଛି।
