ନୂଆଦିଲ୍ଲୀ, ୧୩।୧୨: ସମ୍ବିଧାନର ୭୫ ବର୍ଷ ପୂର୍ତ୍ତି ଅବସରରେ ଦୁଇଦିନ ଧରି ଲୋକସଭାରେ ହେବ ସ୍ୱତନ୍ତ୍ର ବିତର୍କ । ସମ୍ବିଧାନ ଉପରେ ହେବାକୁ ଥିବା ବିତର୍କରେ ଭାଗ ନେଇ ନିଜର ମତ ରଖିବେ ବିଭିନ୍ନ ଦଳର ସାଂସଦ । ଲୋକସଭାରେ ଚର୍ଚ୍ଚାର ଆରମ୍ଭ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ଆସନ୍ତାକାଲି ବିତର୍କରେ ଭାଗ ନେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ନିଜ ସଦସ୍ୟଙ୍କ ପାଇଁ ହ୍ୱିପ୍ ଜାରି କରିଛନ୍ତି ବିଜେପି ଓ କଂଗ୍ରେସ ।
ଭାରତୀୟ ସମ୍ୱିଧାନକୁ ପୂରିଛି ୭୫ ବର୍ଷ । ୨୦୦୧ରେ ଠିକ୍ ଏହି ଦିନ ସଂସଦ ଉପରେ ହୋଇଥିଲା ଆତଙ୍କବାଦୀ ଆକ୍ରମଣ । ଆଜି ଏହି ଆତଙ୍କୀ ଆକ୍ରମଣକୁ ବର୍ଷେ ପୂରିଛି । ଏହି ଅବସରରେ ସଂସଦରେ ହୋଇଥିବା ଆତଙ୍କବାଦୀ ଆକ୍ରମଣକୁ ବିଫଳ କରିଥିବା ସହିଦମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ସମ୍ବିଧାନ ଉପରେ ଆଲୋଚନା କରିଛନ୍ତି । ବିଜେପି ଏବଂ କଂଗ୍ରେସ ନିଜର ସମସ୍ତ ସଦସ୍ୟକୁ ୧୩-୧୪ ଡିସେମ୍ବରରେ ଗୃହରେ ଉପସ୍ଥିତ ରହିବାକୁ ହ୍ୱିପ୍ ଜାରି କରିଛି । ଅପରାହ୍ନ ୧୨ଟାରୁ ଆରମ୍ଭ ହୋଇଥିଲା ପ୍ରଶ୍ନକାଳ । ଲୋକସଭା କାର୍ଯ୍ୟକ୍ରମ ଅନୁଯାୟୀ, ୭ଜଣ ମନ୍ତ୍ରୀ ନିଜ ବିଭାଗ ସହ ଜଡ଼ିତ ବିଭିନ୍ନ ପ୍ରସଙ୍ଗରେ ମୁଦ୍ଦା ଉଠାଇଥିଲେ । ଏଥିସହିତ ବିଭିନ୍ନ କମିଟି ମଧ୍ୟ ନିଜ ନିଜର ରିପୋର୍ଟ ଉପସ୍ଥାପନ କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ସଂସଦରେ ଉପସ୍ଥିତ ରହିବେ । କହିରଖୁ କି, ପ୍ରଧାନମନ୍ତ୍ରୀ ମୋଦୀ ପୂର୍ବରୁ ଏକ ବୈଠକ ଆୟୋଜନ କରିଥିଲେ, ଯେଉଁଥିରେ ବିଜେପି ମୁଖ୍ୟ ଜେ.ପି. ନାଡାଙ୍କ ସମେତ ଗୃହମନ୍ତ୍ରୀ ଅମିତ୍ ଶାହା ଏବଂ ରାଜନାଥ ସିଂ ଉପସ୍ଥିତ ଥିଲେ । ଗୃହମନ୍ତ୍ରୀ ମଧ୍ୟ ବିଜେପିର ବରିଷ୍ଠ ମନ୍ତ୍ରୀଙ୍କ ସହ ଏକ ବୈଠକ ଡାକିଥିଲେ ।
