ନୂଆଦିଲ୍ଲୀ, ୨୨।୧୧: ସାଧାରଣତଃ କୌଣସି ସ୍ଥାନର ଲୋକେସନ୍ ଜାଣିବା ପାଇଁ ଜିପିଏସ୍ ବ୍ୟବହାର କରାଯାଏ । ଏ କାମ ସ୍ମାର୍ଟଫୋନ୍ ମାଧ୍ୟମରେ ହୋଇଥାଏ । ହେଲେ ଖୁବ୍ଶୀଘ୍ର ଏହାର ବ୍ୟବହାର ବଦଳିବାକୁ ଯାଉଛି । ବୈଜ୍ଞାନିକମାନେ ଏମିତି ଏକ ଟେକ୍ନୋଲୋଜି ବିକଶିତ କରିଛନ୍ତି, ଯାହାକି ମଣିଷ ଶରୀରରେ ଥିବା ବ୍ୟାକ୍ଟେରିଆ ବା ଜୀବାଣୁ ଦ୍ୱାରା ଲୋକେସନକୁ ଚିହ୍ନିବ । ଏହାର ଅର୍ଥ ହେଉଛି, ଏବେ ଲୋକେସନକୁ ଚିହ୍ନଟ କରିବା ପାଇଁ ଜିପିଏସ୍ର ଆବଶ୍ୟକତା ନାହିଁ ।
ସ୍ୱିଡେନର ଲୁଣ୍ଡ ବିଶ୍ୱବିଦ୍ୟାଳୟର ଗବେଷକମାନେ ଜାଣିବାକୁ ପାଇଛନ୍ତି ଯେ, ଶରୀରରେ ଦେଖାଦେଉଥିବା ଜୀବାଣୁଗୁଡ଼ିକ ପରିବେଶ ହିସାବରେ ବଦଳିଥାନ୍ତି । ଅର୍ଥାତ୍, ଜଣେ ବ୍ୟକ୍ତି ପାର୍ବତ୍ୟାଞ୍ଚଳରେ ଥିବାବେଳେ ଜୀବାଣୁ ଅଲଗା ପ୍ରକାର ହୋଇଥିବା ବେଳେ ଘରେ ଥିବାବେଳେ ଏହା ଭିନ୍ନ ପ୍ରକାର ହୋଇଥାଏ । ବୈଜ୍ଞାନିକମାନେ ଏକ ଏଆଇ ଟୁଲ୍ ବିକଶିତ କରିଛନ୍ତି, ଯାହାର ନାଁ ମାଇକ୍ରୋବାୟୋଜିମ୍ ଜିୟୋଗ୍ରାଫିକାଲ୍ ପପୁଲେସନ୍ ଷ୍ଟ୍ରକ୍ଚର ଟେକ୍ନୋଲୋଜି । ଏହି ଟୁଲ୍ ବେଶ୍ ସହଜରେ ଜୀବାଣୁଗୁଡ଼ିକୁ ଚିହ୍ନଟ କରିପାରିବ । ଏହାସହ କେଉଁ ଜୀବାଣୁ କେଉଁଠାରେ ଦେଖାଯାନ୍ତି, ତାହା ମଧ୍ୟ ଜଣାପଡ଼ିବ । କେବଳ ସେତିକି ନୁହେଁ, ଜଣେ ଘରେ, ପାର୍କରେ କିମ୍ୱା ରେଳ ଷ୍ଟେସନ ଯେ କୌଣସି ସ୍ଥାନରେ ଅଛନ୍ତି, ତାହା ଏହି ଟୁଲ୍ ମାଧ୍ୟମରେ ଜଣାପଡ଼ିବ । ଅବଶ୍ୟ ଏବେ ଏହି ଟୁଲ୍ ବ୍ୟବହାର କରିବା ପାଇଁ ଏକ ବିଶେଷ ପ୍ରକାର ଗ୍ୟାଜେଟ୍ର ଆବଶ୍ୟକତା ପଡ଼ିବ ।
ଭବିଷ୍ୟତରେ ଏହି ଟୁଲ୍ର ଉପଯୋଗ ସ୍ମାର୍ଟଫୋନରେ କରାଯିବ । ଫଳରେ ଫୋନ୍ ବ୍ୟବହାର କରୁଥିବା ଲୋକଟି ସ୍କ୍ରିନ୍ରେ ସ୍ପର୍ଶ କରିବା ଦ୍ୱାରା ଆଙ୍ଗୁଳିରେ ଥିବା ଜୀବାଣୁ ଦ୍ୱାରା ସେ କେଉଁଠାରେ ଅଛନ୍ତି ବୋଲି ଜଣାପଡ଼ିଯିବ । ତେବେ ଏହି ଟେକ୍ନୋଲୋଜି ଦ୍ୱାରା ରୋଗ ବ୍ୟାପିବାରୁ ମଧ୍ୟ ରକ୍ଷା ପାଇହେବ । ବୈଜ୍ଞାନିକମାନେ ଅନେକ ସ୍ଥାନରୁ ଆସିଥିବା ଜୀବାଣୁ ଉପରେ ପରୀକ୍ଷା କରି ଏହା ୯୨ ପ୍ରତିଶତ ମାମଲାରେ ସଠିକ୍ ସ୍ଥାନ ନିରୂପଣ କରିଥିବା ଜାଣିବାକୁ ପାଇଛନ୍ତି ।
