ନୂଆଦିଲ୍ଲୀ: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଶନିବାର ସଂସଦରେ ୨୦୨୫-୨୬ ବଜେଟ୍ର ଉପସ୍ଥାପନ କରିଛନ୍ତି । ଏହା ମୋଦି ସରକାରଙ୍କ ୩.୦ର ପ୍ରଥମ ପୂର୍ଣ୍ଣକାଳୀନ ବଜେଟ୍। ଚଳିତବର୍ଷର ବଜେଟ୍ ରେ ରେଳ ବିଭାଗକୁ ୨.୨୫ ଲକ୍ଷ କୋଟି ଟଙ୍କା ଆବଣ୍ଟିତ କରାଯାଇଛି। ଏହା ମଧ୍ୟରେ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ବନ୍ଦେ ବାରତ ଟ୍ରେନକୁ ନେଇ ଏକ ନୂଆ ଅପଡେଟ ଦେଇଛନ୍ତି। ନୂତନ ବଜେଟରେ ମୋଟ ୨୦୦ଟି ବନ୍ଦେ ଭାରତ ଟ୍ରେନ ବନାଇବା ପାଇଁ ମଞ୍ଜୁରି ଦିଆଯାଇଛି ବୋଲି ଅଶ୍ୱିନୀ ବୈଷ୍ଣବ ସୂଚନା ଦେଇଛନ୍ତି।
ଶନିବାର ୨୦୨୫-୨୬ ଆର୍ଥିକ ବର୍ଷ ପାଇଁ ସାଧାରଣ ବଜେଟ୍ ଉପସ୍ଥାପନ ପରେ ଅଶ୍ୱିନୀ ବୌଷ୍ଣବ ରେଳ ଭବନରେ ଏକ ସାମ୍ବାଦିକ ସମ୍ମିଳନୀ ଆୟୋଜନ କରିଥିଲେ। ଏହି ସମ୍ମିଳନୀରେ ସେ ରେଳବାଇ ପାଇଁ ଆବଣ୍ଟିତ ବିଭିନ୍ନ ପ୍ରକଳ୍ପ ଓ ରେଳ ବିଭାଗର ଆଗାମୀ ଭବିଷ୍ୟତର ସମ୍ପର୍କରେ ସୂଚନା ପ୍ରଦାନ କରିଛନ୍ତି। ଚଳିତ ବଜେଟରେ ଭାରତୀୟ ରେଳର ବିକାଶ ପାଇଁ ୧୭ ହଜାର ୫୦୦ ସାଧାରଣ କୋଚ୍, ୨୦୦ ବନ୍ଦେ ଭାରତ ଓ ୧୦୦ ଅମୃତ ଭାରତ ଟ୍ରେନ୍ ନିର୍ମାଣ ପାଇଁ ଅନୁମୋଦନ କରାଯାଇଛି ବୋଲି ସେ ସାମ୍ବାଦିକ ସମ୍ମିଳନିରେ ସୂଚନା ପ୍ରଦାନ କରିଛନ୍ତି।
ବଜେଟରେ ୪.୬ ଲକ୍ଷ କୋଟି ଟଙ୍କାର ନୂତନ ପ୍ରକଳ୍ପ ଅନ୍ତର୍ଭୁକ୍ତ ହୋଇଛି। ଯାହା ୪ ରୁ ୫ ବର୍ଷ ମଧ୍ୟରେ ଶେଷ ହେବ ବୋଲି ଆଶା କରାଯାଉଛି। ଏଥି ମଧ୍ୟରେ ନୂତନ ରେଳ ଲାଇନ ସ୍ଥାପନ, ରେଳ ଲାଇନର ଦୋହରିକରଣ, ନୂତନ ନିର୍ମାଣ, ବିଭିନ୍ନ ଷ୍ଟେସନର ବିକାଶ ଆଦି ରହିଛି। ଏହା ସହ ରେଳ ଯାତ୍ରା ପାଇଁ ବଢୁଥିବା ଚାହିଦାକୁ ଦୃଷ୍ଟିରେ ରଖି ଆସନ୍ତା ଦୁଇ-ତିନି ବର୍ଷ ମଧ୍ୟରେ ୧୦୦ ଅମୃତ ଭାରତ, ୫୦ ନାମୋ ଭାରତ ଓ ୨୦୦ ବନ୍ଦେ ଭାରତ ଟ୍ରେନ୍ ନିର୍ମାଣ କରାଯିବ ବୋଲି ଅଶ୍ୱିନୀ ବୈଷ୍ଣବ ସୂଚନା ଦେଇଛନ୍ତି।
ସାଧାରଣ କୋଚ୍ ନିର୍ମାଣ କାର୍ଯ୍ୟ ବହୁ ପୂର୍ବରୁ ଚାଲିଛି ଏବଂ ମାର୍ଚ୍ଚ ୩୧ ଶେଷ ସୁଦ୍ଧା ୧୪୦୦ ଟି କୋଚ୍ ପ୍ରସ୍ତୁତ ହୋଇଯିବ। ଆସନ୍ତା ଆର୍ଥିକ ବର୍ଷ ସୁଦ୍ଧା ୨,୦୦୦ ରୁ ଅଧିକ ସାଧାରଣ କୋଚ୍ ନିର୍ମାଣ କରିବା ଲକ୍ଷ୍ୟ ରହିଛି। ଏହା ସହିତ ବହୁ ଜଲଦି ୧୦୦୦ଟି ନୂତନ ଫ୍ଲାଏ ଓଭର ବ୍ରିଜ ନିର୍ମାଣ ଅନୁମୋଦନ ଦିଆଯିବ ବୋଲି ଅଶ୍ୱିନୀ ବୈଷ୍ଣବ ସୂଚନା ଦେଇଛନ୍ତି। ରେଳବାଇ ୩୧ ମାର୍ଚ୍ଚ ୨୦୨୫ ସୁଦ୍ଧା ମାଲ ପରିବହନ କ୍ଷମତା ସହ ଜଡିତ ଏକ ପ୍ରମୁଖ ମାଇଲଖୁଣ୍ଟ ଅତିକ୍ରମ କରିବାକୁ ଯାଉଛି। ସେ କହିଛନ୍ତି ଯେ ମାର୍ଚ୍ଚ ୩୧ ସୁଦ୍ଧା ଆମେ ୧.୬ ବିଲିୟନ ଟନ୍ ମାଲ ପରିବହନ ଲକ୍ଷ୍ୟ ହାସଲ କରିବୁ। ଯାହା ଚୀନ୍ର ରେଳ ବିଭାଗ ପରେ ମାଲ ପରିବହନ କ୍ଷେତ୍ରରେ ଭାରତୀୟ ରେଳ ବିଭାଗ ବିଶ୍ୱରେ ଦ୍ୱିତୀୟ ସ୍ଥାନରେ ପହଞ୍ଚିବ ବୋଲି ସେ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ଭାରତୀୟ ରେଳ ବିଭାଗ ଶତପ୍ରତିଶତ ବିଦ୍ୟୁତିକରଣ ଲକ୍ଷ୍ୟ ହାସଲ କରିବାକୁ ଯାଉଛି। ରେଳ କାର୍ଯ୍ୟର ନିରାପତ୍ତା ଉପରେ ଗୁରୁତ୍ୱ ଦେଇ ଭାରତ ସରକାର ଏଥିପାଇଁ ସହାୟତା ରାଶିକୁ ୧.୮ ଲକ୍ଷ କୋଟିରୁ ବଢାଇ ୧.୧୪ ଲକ୍ଷ କୋଟି ଟଙ୍କାକୁ ବୃଦ୍ଧି କରିଛନ୍ତି। ଯାହାକୁ ଆସନ୍ତା ଆର୍ଥିକ ବର୍ଷରେ ୧.୧୬ ଲକ୍ଷ କୋଟି ଟଙ୍କାକୁ ବୃଦ୍ଧି କରାଯିବ।
