ନୂଆଦିଲ୍ଲୀ: ଶନିବାର ଏୟାର କାନାଡ଼ାର ଏକ ବିମାନ ଦୁର୍ଘଟଣାଗ୍ରସ୍ତ ହୋଇଛି। ହାଲିଫ୍ୟାକ୍ସ ବିମାନବନ୍ଦରରେ ଅବତରଣ କରିବା ସମୟରେ ଲ୍ୟାଣ୍ଡି ଗିୟରରେ ସମସ୍ୟା ଦେଖାଦେବାରୁ ବିମାନଟି ଦୁର୍ଘଟଣାର ସମ୍ମୁଖୀନ ହୋଇଥିଲା। ଦୁର୍ଘଟଣାଟି ଏତେ ଭୟଙ୍କର ଥିଲା ଯେ ରନୱେରେ ବିମାନଟି ଘୁଷୁରିବା ସହ ଏଥିରେ ନିଆଁ ଲାଗିଯାଇଥିଲା। ତେବେ ଏହି ଦୁର୍ଘଟଣାରେ କେହି ମୃତାହତ ହୋଇ ନଥିବା ନେଇ ସୂଚନା ମିଳିଛି।
ଲ୍ୟାଣ୍ଡିଂ ଗିଅର ଠିକ ଭାବେ କାମ ନକରିବାରୁ ବିମାନଟି ରନୱେରେ କ୍ରାସ ଲ୍ୟାଣ୍ଡିଂ କରିଥିଲା। ଏହି କ୍ରାସ ଲ୍ୟାଣ୍ଡିଂରେ ବିମାନଟି ରନୱେରେ ଦୀର୍ଘ ସମୟ ଧରି ଘୁଷୁରିବାରୁ ଏଥିରେ ନିଆଁ ଲାଗିଯାଇଥିଲା। ଘଟଣାସ୍ଥଳରେ ସଙ୍ଗେସଙ୍ଗେ ଜରୁରୀକାଳୀନ କର୍ମଚାରୀ ପହଞ୍ଚି ନିଆଁକୁ ଆୟତ କରିଥିଲେ। ଫଳରେ ବହୁ ଜୀବନ ବଞ୍ଚି ଯାଇଛି।
ବିମାନରେ ଯାତ୍ରା କରୁଥିବା ଜଣେ ଯାତ୍ରୀ ସ୍ଥାନୀୟ ଗଣମାଧ୍ୟମକୁ ସାକ୍ଷାତକାର ଦେଇ କହିଛନ୍ତି ଯେ ଲ୍ୟାଣ୍ଡିଂ ସମୟରେ ବିମାନର ଚକା ଠିକ୍ ସମୟରେ ନ ଖୋଲିବାରୁ ଏହି ଦୁର୍ଘଟଣା ଘଟିଥିଲା। ଅନ୍ୟପଟେ ସତର୍କତା ଦୃଷ୍ଟିରୁ ହାଲିଫ୍ୟାକ୍ସ ବିମାନ ବନ୍ଦରକୁ ଅସ୍ଥାୟୀ ଭାବେ ବନ୍ଦ କରିଦିଆଯାଇଛି।
ସେପଟେ ସାଉଥକୋରିଆରେ ମଧ୍ୟ ଦୁଃଖଦ ଘଟଣା ଘଟିଛି। ମୁଆନ ବିମାନ ବନ୍ଦରରେ ବୋଇଂ ୭୩୭ ବିମାନ ଅବତରଣ ସମୟରେ ଏଥିରେ ନିଆଁ ଲାଗି ୧୭୯ ଜଣଙ୍କର ମୃତ୍ୟୁ ହୋଇଛି। ବିମାନରେ ୧୮୨ ଯାତ୍ରୀ ଥିବା ବେଳେ ଦୁଇ ଜଣଙ୍କ ସ୍ୱାସ୍ଥ୍ୟାବସ୍ଥା ସଂକଟାପନ୍ନ ରହିଛି।
ଖବର ଅନୁସାରେ, ରବିବାର ମୁଆନ ବିମାନ ବନ୍ଦରରେ ଜେଜୁ ଏୟାର ଫ୍ଲାଇଟର ଏକ ବିମାନ ଅବତରଣ କରୁଥିବା ସମୟରେ ଏହା ରନୱେରୁ ଖସି ଫେନସିଂରେ ଅଟକି ଯାଇଥିଲା। ଏହି ବିମାନରେ ମୋଟ ୧୮୧ ଜଣ ଲୋକ ଯାତ୍ରା କରୁଥିଲେ। ଦୁର୍ଘଟଣା ହେବା ପରେ ବିମାନରେ ଭୟାନକ ନିଆଁ ଲାଗିଯାଇଥିଲା।
