ନୂଆଦିଲ୍ଲୀ,୦୮/୧୨: ପଲିଟିକ୍ସରେ ଏବେ ପୁଷ୍ପା କ୍ରେଜ ଦେଖିବାକୁ ମିଳିଛି । ଫିଲ୍ମର ସ୍ପେଶାଲ ଡାଏଲଗ 'ମେଁ ଝୁକେଗା ନେହିଁ'କୁ ପୋଷ୍ଟର ୱାର ଦେଖିବାକୁ ମିଳିଛି । ଦିଲ୍ଲୀରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ଶାସକ ଆପ୍ ଓ ବିଜେପି ମଧ୍ୟରେ ପୁଷ୍ପା ଡାଏଲଗକୁ ନେଇ ପୋଷ୍ଟର ୱାର ଦେଖିବାକୁ ମିଳିଛି ।
ଏକ ପୋଷ୍ଟରେ ଆମ୍ ଆଦମୀ ପାର୍ଟି କରିଥିବା ବିଭିନ୍ନ ଘୋଟାଲାକୁ ଦର୍ଶାଇ ବିଜେପି ଟାର୍ଗେଟ କରିଥିଲା । ଏହାର ପାଲଟା ଜବାବ ଦେଇଛି ଆପ୍ । ଦିଲ୍ଲୀ ଶାସକ ଦଳ ଆପ୍ ଫିଲ୍ମ 'ପୁଷ୍ପା' ଷ୍ଟାଇଲରେ ବିଜେପି ଉପରେ ପାଲଟା ଆଟାକ୍ କରିଛି । ପୋଷ୍ଟରେ ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ତଥା ଆପ୍ ସୁପ୍ରିମୋ ଅରବିନ୍ଦ କେଜ୍ରିୱାଲଙ୍କ ଫଟୋ ଲାଗିଛି । ହାତରେ ଝାଡୁ ଧରି ଛିଡା ହୋଇଥିବା ଦେଖିବାକୁ ମିଳିଛି । ସେଥିରେ ଲେଖା ଅଛି କେଜ୍ରିୱାଲ ଝୁକେଗା ନେହିଁ ।
ପ୍ରକାଶ ଥାଉ କି, ଶନିବାର ବିଜେପି ଏକ ପୋଷ୍ଟର ଜରିଆରେ ଆପ୍ ସରକାର ଘୋଟଲା କରିଥିବା ଦର୍ଶାଇଥିଲା । ପୋଷ୍ଟରରେ ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଫଟୋ ଲଗାଯାଇଥିଲା । ଏହାର କ୍ୟାପ୍ସନରେ କେଜ୍ରିୱାଲଙ୍କ ଘୋଟାଲର ବୁଢୀଆଣୀ ଜାଲ ସହ ମଦ ଦୁର୍ନୀତି, ରାସନ, ମୋହଲ୍ଲା କ୍ଲିନିକ, ସିକ୍ୟୁରିଟି, ଶୀଶମହଲ, ଆଦି ଘୋଟାଲାକୁ ଦର୍ଶାଇଥିଲା । ଯାହାର ଜବାବରେ ଆଜି ଆପ୍ ପୁଷ୍ପା ଫିଲ୍ମର ସ୍ପେଶାଲ ଡାଏଲଗ 'ଝୁକେଗା ନେହିଁ' ପୋଷ୍ଟର ଜାରି କରିଛି ।
