ନୂଆଦିଲ୍ଲୀ,୦୮/୦୭: ଲୋକପ୍ରିୟ ଭିଡିଓ ଷ୍ଟ୍ରିମିଂ ପ୍ଲାଟଫର୍ମ ୟୁଟ୍ୟୁବ୍ । ଏହା ଆଗାମୀ ଦିନରେ କପି ଏବଂ ରିପିଟ୍ ବିଷୟବସ୍ତୁ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବ । ଏହି ନୂଆ ନିୟମ ଆସନ୍ତା ଜୁଲାଇ ୧୫ ତାରିଖଠାରୁ କାର୍ଯ୍ୟକାରୀ ହେବାକୁ ଯାଉଛି ।
ତେବେ ଏହି ନୂଆ ନୀତିରେ ବହୁଳ ଭାବରେ ପୁନଃବ୍ୟବହୃତ କଣ୍ଟେଣ୍ଟ ଉପରେ ରୋକ୍ ଲାଗିବ । ଏନେଇ ପ୍ଲାଟଫର୍ମ ବିଶେଷ ଧ୍ୟାନ ଦେଉଛି । ସଂଶୋଧିତ ନିର୍ଦ୍ଦେଶାବଳୀ ୟୁଟ୍ୟୁବର ଅଫିସିଆଲ୍ ପେଜ୍ରେ ପ୍ରକାଶିତ ହୋଇଛି । ଯେଉଁଥିରେ ସ୍ପଷ୍ଟ ଭାବରେ ଉଲ୍ଲେଖ କରାଯାଇଛି ଯେ ଆଗାମୀ ସମୟରେ କେବଳ ମୂଳ ଏବଂ ପ୍ରାମାଣିକ ବିଷୟବସ୍ତୁକୁ ପ୍ରଚାର କରାଯିବ ଏବଂ ପ୍ଲାଟଫର୍ମ ଦ୍ବାରା ମୁଦ୍ରୀକରଣ କରାଯିବ । ୟୁଟ୍ୟୁବ୍ ନିଜର ପ୍ରକୃତ କ୍ରିଏଟରଙ୍କୁ ସୁରକ୍ଷା ଦେବା ଏବଂ ଏହି ପ୍ଲାଟଫର୍ମର ଅପବ୍ୟବହାରକୁ ରୋକିବା ଲାଗି ନୂଆ ନିୟମ ଆଣିଛି । ଏହାଦ୍ବାରା କ୍ଲିକବେଟ୍, ନିମ୍ନ ଗୁଣବତ୍ତା ଏବଂ ରିପିଟ୍ ହେଉଥିବା ଭିଡିଓକୁ ରୋକା ଯାଇପାରିବ । କମ୍ପାନୀ କେବଳ ଭ୍ୟୁ ପାଇବା ଉଦ୍ଦେଶ୍ୟରେ ସୃଷ୍ଟି ହୋଇଥିବା ଭିଡିଓ ବ୍ୟତୀତ, ଶିକ୍ଷା ବା ମନୋରଞ୍ଜନରେ ଯୋଗଦାନ ଦେଉଥିବା ବିଷୟବସ୍ତୁ ଉପରେ ଅଧିକ ଗୁରୁତ୍ବ ଦେଉଛି । ଏପରି ଭିଡିଓ ୟୁଜର୍ସଙ୍କୁ ଅଧିକ ଲାଭଦାୟୀ ହୋଇଥାଏ ।
ପ୍ରକାଶ ଥାଉକି, ୟୁଟ୍ୟୁବ୍ ଭାରତର କ୍ରିଏଟର ଅର୍ଥନୀତିରେ ଗତ ୩ ବର୍ଷ ଧରି ୨୧୦ ବିଲିଅନ ବା ୨୧,୦୦୦ କୋଟି ଟଙ୍କା ନିବେଶ କରିଛି । ତେବେ ଆଗାମୀ ୨ ବର୍ଷ ମଧ୍ୟରେ ଆଉ ୮୫୦ କୋଟି ଟଙ୍କା ନିବେଶ କରିବ । ଏନେଇ ନିକଟରେ ମୁମ୍ବାଇରେ ଆୟୋଜିତ ବିଶ୍ବ ଅଡିଓ ଭିଜୁଆଲ୍ ଏବଂ ମନୋରଞ୍ଜନ ସମ୍ମିଳନୀ ୨୦୨୫ରେ ଯୋଗଦେଇ ଗୁଗଲ୍ ମାଲିକାନାରେ ଥିବା ୟୁଟ୍ୟୁବର ସିଇଓ ନିଲ ମୋହନ ଘୋଷଣା କରିଥିଲେ
