ନୂଆଦିଲ୍ଲୀ: ହରିୟାଣା ନିର୍ବାଚନ ଲାଗି ପ୍ରଥମ ପ୍ରାର୍ଥୀ ତାଲିକା ଜାରି କରିଛି ଆମ ଆଦମୀ ପାର୍ଟି (ଆପ୍) । ପ୍ରଥମ ପର୍ଯ୍ୟାୟରେ ଆପ୍ ୨୦ ଜଣ ପ୍ରାର୍ଥୀଙ୍କ ନାଁ ପ୍ରକାଶ କରିଛି । କଂଗ୍ରେସ ସହ ଆସନ ବୁଝାମଣା ଭିତରେ ଆପ୍ ନିଜର ପ୍ରାର୍ଥୀ ତାଲିକା ଜାରି କରିବାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ୯୦ ବିଧାନସଭା ଆସନ ବିଶିଷ୍ଟ ହରିୟାଣାରେ ଅତିକମରେ ୧୦ଟି ଆସନରେ ଆପ୍ ପ୍ରାର୍ଥୀ ଦେବାକୁ ଦାବି କରିଥିଲା । କିନ୍ତୁ କଂଗ୍ରେସ ଆପ୍କୁ କେବଳ ୭ଟି ଆସନରେ ନିର୍ବାଚନ ଲଢ଼ିବାକୁ ଅନୁମତି ଦେଇଥିଲା । ଏଥିପାଇଁ ଆପ୍ କଂଗ୍ରେସକୁ ଚକ୍ମା ଦେଇ ପ୍ରଥମ ପର୍ଯ୍ୟାୟରେ ୨୦ ଜଣିଆ ପ୍ରାର୍ଥୀ ତାଲିକା ଜାରି କରିଥିବା କୁହାଯାଉଛି ।
ସେପଟେ ଆପ୍ର ୨୦ ଆସନ ମଧ୍ୟରୁ ୧୧ଟିରେ କଂଗ୍ରେସ ନିଜର ପ୍ରାର୍ଥୀ ଦେଇସାରିଛି । ଏଥିରୁ ଜଣାପଡ଼ୁଛି ଯେ, କଂଗ୍ରେସ ଏବଂ ଆପ ମଧ୍ୟରେ ମେଣ୍ଟ ହୋଇପାରି ନାହିଁ । ତେବେ ମେଣ୍ଟ ସଂପର୍କରେ ଆପ୍ କିମ୍ବା କଂଗ୍ରେସ ଦଳ ପକ୍ଷରୁ କୌଣସି ଔପଚାରିକ ଘୋଷଣା କରାଯାଇ ନାହିଁ ।
ଆପ୍ ପକ୍ଷରୁ ପ୍ରଥମ ପ୍ରାର୍ଥୀ ତାଲିକା ଜାରି ହୋଇଥିବା ବେଳେ ଖୁବଶୀଗ୍ର ଦ୍ବିତୀୟ ତାଲିକା ଆସିବ ବୋଲି ଦଳର ରାଜ୍ୟ ସଭାପତି ସୁଶୀଲ ଗୁପ୍ତା କହିଛନ୍ତି । ଏହା ସହ ଇଣ୍ଡି ମେଣ୍ଟର କୌଣସି ଦଳ ସହ ମେଣ୍ଟ ହେବାର ସମ୍ଭାବନା କମ ବୋଲି ସେ ଇସାରା କରିଛନ୍ତି । ଗତ ସପ୍ତାହରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ଦଳ ଆସନ ବୁଝାମଣାକୁ ନେଇ ‘ଓ୍ବେଟ୍ ଆଣ୍ଡ ଓ୍ବାଚ୍’ ମୋଡ୍ରେ ରହିଥିଲା । ବିଜେପିକୁ ମାତ୍ ଦେଇ କ୍ଲିନ୍ ସ୍ବିପ କରିବା ଲାଗି କଂଗ୍ରେସ ଏବଂ ଆପ୍ ମେଣ୍ଟ କରିବା ସପକ୍ଷରେ ଥିଲେ । କିନ୍ତୁ ଆଜି ଆପ୍ କଂଗ୍ରେସର ଯୋଜନାକୁ ପଣ୍ଡ କରିଦେଇଥିବା କୁହାଯାଉଛି ।
