ବାରିପଦା, ୨୭/୦୮ : ପୁତୁରାର ଶବ ସତ୍କାର କରିବାକୁ ଯାଇଥିଲେ, ନିଜେ ଶବ ହୋଇ ଫେରିଲେ। ବିଶୋଇ ଥାନା ମଣଦା ଫାଣ୍ଡି ଜଗନ୍ନାଥପୁର ପଞ୍ଚାୟତ ବଡ଼ ପୁରୁଣାପାଣି ଗ୍ରାମରେ ଘଟିଛି ଏଭଳି ଅଭାବନୀୟ ଘଟଣା। ପୋଖରୀରେ ବୁଡ଼ି ଗ୍ରାମର ଛୁଟାଇ ଟୁଡୁଙ୍କ ପୁଅ ରାମାୟ ଟୁଡୁଙ୍କ (୪୦ ବର୍ଷ) ମୃତ୍ୟୁ ହୋଇଛି।  

ସୂଚନାନୁଯାୟୀ, ମଣଦା ଫାଣ୍ଡି ବଡ଼ ପୁରୁଣାପାଣି ଗ୍ରାମର ରାମାୟ ଟୁଡୁଙ୍କ ନିଜ ପୁତୁରା ପିଥ ଟୁଡୁ ଗତ ୨୪ ତାରିଖରେ ଋଣ ସୁଝି ନପାରି କୀଟନାଶକ ପିଇ ଆତ୍ମହତ୍ୟା କରିଥିଲେ। ରାମାୟ ଟୁଡୁ ପୁତୁରାର ଅନ୍ତ୍ୟେଷ୍ଟିକ୍ରିୟାରେ ଯୋଗ ଦେବାକୁ ବୋଡୋଯୋଡି ଗ୍ରାମକୁ ଯାଇଥିଲେ। ଶବ ସତ୍କାର ପରେ ଅନ୍ଧାରରେ ଗାଁ ପୋଖରୀରେ ଗାଧୋଇବା ବେଳେ ବୁଡ଼ି ଯାଇଥିଲେ। ଗାଧୋଇ ସାରିବା ପରେ ରାମାୟଙ୍କୁ ନପାଇବାରୁ ଅନ୍ୟମାନେ ପାଣିରେ ଖୋଜାଖୋଜି କରି ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ମଣଦା ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଡାକ୍ତର ରାମାୟକୁ ମୃତ ଘୋଷଣା କରିଥିଲେ। 

ଖବର ପାଇ ବିଶୋଇ ପୋଲିସ ଶବ ଜବତ କରିବା ସହ ରାଇରଙ୍ଗପୁର ଉପଖଣ୍ଡ ସରକାରୀ ଡାକ୍ତରଖାନାକୁ ଶବ ବ୍ୟବଚ୍ଛେଦ ପାଇଁ ପଠାଇଛି। ଏନେଇ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଛି।