ନୂଆଦିଲ୍ଲୀ ୨୩/୧୨: ଏକଦା ସଭ୍ୟତା ଓ ଇତିହାସର ପ୍ରତୀକ ଥିବା ସିରିଆ ଏବେ ଗମ୍ଭୀର ଆର୍ଥିକ ସଙ୍କଟର ସାମ୍ନା କରୁଛି । ନିକଟରେ ରାଷ୍ଟ୍ରପତି ଅସଦ ଦେଶ ଛାଡ଼ି ପଳାଇବା ଓ କ୍ଷମତା ପରିବର୍ତ୍ତନ ପରେ ଏହି ସଙ୍କଟ ଆହୁରି ଘନେଇଛି । ଗୃହଯୁଦ୍ଧ, ଅନ୍ତର୍ଜାତୀୟ କଟକଣା ଦେଶକୁ ଦରଦାମ୍ ବୃଦ୍ଧିର ଏମିତି ଜାଲରେ ଫସାଇ ଦେଇଛି ଯେ ସାଧାରଣ ନାଗରିକଙ୍କ ଲାଗି ଜୀବନ ବିତାଇବା କଷ୍ଟକର ହୋଇପଡ଼ିଛି । ନିକଟରେ ଜଣେ ଟ୍ରାଭେଲ ବ୍ଲଗର ଏଲୋନା କରଫିନ୍ ଇନ୍ଷ୍ଟାଗ୍ରାମରେ ଏକ ଭିଡିଓ ପୋଷ୍ଟ କରି ସିରିଆର ନାଗରିକଙ୍କର ଦୁଃଖଦ ଅବସ୍ଥାକୁ ବର୍ଣ୍ଣନା କରିଛନ୍ତି । ସେଥିରେ ସେ ଦର୍ଶାଇଛନ୍ତି ଯେ, ଦେଶରେ ପରିସ୍ଥିତି ଏପରି ଖରାପ ହୋଇପଡି଼ଛି ଯେ ଲୋକେ ପର୍ସ ରଖିବା ଛାଡି଼ ଦେଇଛନ୍ତି । କାରଣ ଜିନିଷପତ୍ର କିଣିବାକୁ ସେମାନଙ୍କୁ ନୋଟ୍ର ବଣ୍ଡଲ ଦେବାକୁ ପଡୁଛି । ସେଠାକାର ରେସ୍ତୋରାଁଗୁଡି଼କର ମେନ୍ୟୁରେ ଦାମ୍ ଲେଖାଯାଉନାହିଁ । କାରଣ କୌଣସି ଦାମ୍ ସ୍ଥିର ରହୁନାହିଁ ।
ସେହିପରି ବିଦେଶୀ ବ୍ରାଣ୍ଡଗୁଡି଼କ ସିରିଆରୁ ନିଜର ଉତ୍ପାଦକୁ ହଟାଇ ନେଇଛନ୍ତି । ତେଣୁ ଲୋକେ ସ୍ଥାନୀୟ ଉତ୍ପାଦ ଉପରେ ନିର୍ଭରଶୀଳ ହେବାକୁ ବାଧ୍ୟ ହେଉଛନ୍ତି । ସିରିଆର ଏହି ଆର୍ଥିକ ସଙ୍କଟର ମୂଳରେ ରହିଛି ଦେଶର ମୁଦ୍ରା ସିରିଆନ୍ ପାଉଣ୍ଡର ମୂଲ୍ୟ କମିବା । ଏକଦା ଏକ ଆମେରିକୀୟ ଡଲାର ୫୦ ସିରିଆନ୍ ପାଉଣ୍ଡ ସହ ସମାନ ଥିଲା । କିନ୍ତୁ ବର୍ତ୍ତମାନ ଏକ ଆମେରିକୀୟ ଡଲାର ୧୫ ହଜାର ସିରିଆନ୍ ପାଉଣ୍ଡରେ ପହଞ୍ଚିସାରିଛି । ଏଭଳିସ୍ଥିତିରେ ଏକ କପ୍ କଫି ଲାଗି ୨୫ ହଜାର ସିରିଆନ୍ ପାଉଣ୍ଡ ଦେବାକୁ ପଡୁଛି । ତାଙ୍କର ଏହି ଭିଡିଓକୁ ୧୦ ନିୟୁତରୁ ଅଧିକ ଲୋକେ ଦେଖିସାରିଲେଣି । ଅନେକ ୟୁଜର ସିରିଆର ପୁନଃନିର୍ମାଣ ଲାଗି ସାରା ବିଶ୍ୱ ଅଧିକ ସହାୟତା ପ୍ରଦାନ କରିବା ଆବଶ୍ୟକ ବୋଲି ଲେଖିଛନ୍ତି ।
