ମାଲକାନଗିରି,୬/୨ : ରିଲ୍ସ ନିଶା ହୋଇଛି କାଳ । ରିଲ୍ସ କରୁ କରୁ ଅସାବଧାନତା ବଶତଃ ପାଣି ଭିତରକୁ ଖସି ପଡିଲେ ଦୁଇ ଯୁବତୀ। ପାଣିର ପ୍ରଖର ସୁଅ ଏମାନଙ୍କୁ ଭସାଇ ନେଇଥିଲା। ଯୁବତୀମାନେ ବଂଚିବା ପାଇଁ ଚିତ୍କାର କରୁଥିଲେ। ପାଖରେ ପରିବାର ଲୋକ ଥିଲେ ବି କେହି କିଛି କରି ପାରୁନଥିଲେ ।ତେବେ ଏମାନଙ୍କ ଚିତ୍କାର ଶୁଣି ଶେଷରେ ଏମାନଙ୍କ ସହ ଯାଇଥିବା ୨ଜଣ ଡ୍ରାଇଭର ନିଜ ଜୀବନକୁ ବାଜି ଲଗାଇ ପାଣି ଭିତରକୁ ଡେଇଁ ପଡିଥିଲେ। ଆଉ ମରଣ ମୁହଁରୁ ଏମାନଙ୍କୁ ଟାଣି ଆଣିଥିଲେ। ଏଭଳି ଘଟଣା ଘଟିଛ ମାଲକାନଗିରି ଜିଲ୍ଲା ଗୋବିନ୍ଦପାଲ୍ଲି ନିଟକରେ ଥିବା ଗୁମ୍ମାଝରଣ ଜଳପ୍ରପାତର।
ମାଲକାନଗିରି ଜିଲ୍ଲା କୁଡୁମୁଲୁଗୁମ୍ମା ଅଞ୍ଚଳର ଏହି ୨ ଯୁବତୀ ପରିବାର ସହ ଗତକାଲି ପିକନିକ ପାଇଁ ସେଠାକୁ ଯାଇଥିଲେ। ତେବେ ସେଠାରେ ଏମାନେ ବୁଲାବୁଲି କରିବା ସହ ଖୁସିର ମୁହୁର୍ତ୍ତ ସାଇତି ରଖିବା ପାଇଁ ରିଲ୍ସ କରୁଥିଲେ। ଆଉ ଅସାବଧାନତା କାରଣରୁ ସେମାନଙ୍କ ଗୋଡ ସେଠାରେ ଥିବା ପଥରରେ ଖସି ଯାଇଥିଲା। ଫଳରେ ସେମାନେ ପାଣି ଭିତରକୁ ପଡିଯାଇଥିଲେ।
ପାଣିର ପ୍ରଖର ସ୍ରୋତ କାରଣରୁ ସେମାନେ ଆଉ ବାହାରକୁ ଆସି ନପାରି ଚିତ୍କାର କରୁଥିଲେ। ପରିବାର ଲୋକ ବି ଭୟଭୀତ ଓ ଅସହାୟ ହୋଇ ପଡିଥିଲେ। ଆଉ ଏହା ଦେଖି ସେମାନଙ୍କ ସହ ଯାଇଥିବା ଗୋବିନ୍ଦପାଲ୍ଲିର ଦୁଇ ଜଣ ଡ୍ରାଇଭର ଜିତୁ ଗୌଡ ଓ ଦୀପକ ଗୌଡ ନିଜ ଜୀବନକୁ ବାଜିରେ ଲଗାଇ ପାଣି ଭିତରକୁ ଡେଇଁ ପଡିଥିଲେ। ଆଉ ଏହି ୨ ଯୁବତୀଙ୍କୁ ପାଣି ଭିତରୁ ଟାଣି ଆଣି ସେମାନଙ୍କ ଜୀବନ ବଂଚାଇଥିଲେ। ଯୁବତୀ ଦୁଇଜଣ ଙ୍କୁ ମରଣ ମୁହଁରୁ ଉଦ୍ଧାର କରି ଜୀବନ ବଞ୍ଚାଇ ଥିବାରୁ ଡ୍ରାଇଭରଙ୍କୁ ପରିବାର ଲୋକେ ଓ ଗ୍ରାମ ବାସୀ ଧନ୍ୟବାଦ ଜଣାଇ ପ୍ରଶଂସା କରିଛନ୍ତି।
ଗୁମ୍ମାଝରଣ ଜଳପ୍ରପାତର ସୌନ୍ଦର୍ଯ୍ୟତା କାରଣରୁ ଏଠାକୁ ଅନେକ ପର୍ଯ୍ୟଟକ ଆସୁଛନ୍ତି ହେଲେ ଏଠାକୁ ଭଲରାସ୍ତା କିମ୍ବା ସୁରକ୍ଷା ବାଡ ବ୍ୟବସ୍ଥା ନଥିବାରୁ ଏମିତି ଅଘଟଣ ଘଟୁଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି।
ଆହୁରି ପଢନ୍ତୁ : ଚନ୍ଦ୍ରଭାଗା ତୀର୍ଥରେ ମାଘ ସପ୍ତମୀ ବୁଡ଼ ପାଇଁ ନୀତି ନିର୍ଦ୍ଧାରଣ ବୈଠକ