ନୂଆଦିଲ୍ଲୀ,୨୮/୧୧: ଦକ୍ଷିଣ ପୂର୍ବ କେନ୍ଦ୍ରୀୟ ରେଳବାଇ (ଏସ୍ଇସିଆର)ର ଛତିଶଗଡ ବିଳାସପୁର ଡିଭିଜନରେ କାର୍ଯ୍ୟ କରୁଥିବା ଜଣେ ବରିଷ୍ଠ ଇଞ୍ଜିନିୟରଙ୍କୁ ଅବସର ନେବାର ମାତ୍ର ୩ ଦିନ ପୂର୍ବରୁ ବଦଳି କରାଯାଇଛି । ତାହା ପୁଣି ଶତାଧିକ କି.ମି ଦୂରକୁ । ସମ୍ପୃକ୍ତ ଇଞ୍ଜିନିୟରଙ୍କ ନାମ କେ.ପି ଆର୍ଯ୍ୟ ।
ବଦଳି ଆଦେଶ ମିଳିବା ପରେ ସେ ଆଶ୍ଚର୍ଯ୍ୟ ହେବା ସହ ରେଳବାଇ ବୋର୍ଡର ସଚିବଙ୍କୁ ଏକ ଚିଠି ଲେଖିଛନ୍ତି । ସେଥିରେ ସେ ରେଳବାଇର ଏଭଳି ନିଷ୍ପତ୍ତିକୁ ପାଗଳାମୀ ବୋଲି ଉଲ୍ଲେଖ କରିଛନ୍ତି । ବଦଳି ଆଦେଶ ଅନୁସାରେ ଆର୍ଯ୍ୟଙ୍କୁ ନୂଆଦିଲ୍ଲୀସ୍ଥିତ ଉତ୍ତର ରେଳବାଇ (ଏନ୍ଆର)ର ମୁଖ୍ୟ କାର୍ଯ୍ୟାଳୟରେ ଉଚ୍ଚ ପ୍ରଶାସନିକ ଗ୍ରେଡ୍ (ଏଚ୍ଏଜି) ପଦବିରେ ନଭେମ୍ବର ୨୮ ତାରିଖରେ ଯୋଗଦେବାକୁ କୁହାଯାଇଛି। କିନ୍ତୁ ସେ ନଭେମ୍ବର ୩୦ ତାରିଖରେ ଅବସର ନେବାର ଅଛି । ଏହା ଉପରେ ପ୍ରତିକ୍ରିୟା ପ୍ରକାଶ କରି ଆର୍ଯ୍ୟ କହିଛନ୍ତି ସରକାରୀ ଭାବେ ବଦଳି କରାଯିବାର ଆଦେଶ ଠିକ୍ । କିନ୍ତୁ ସପ୍ତାହକ ଭିତରେ ଜଣେ ଅବସର ନେବାକୁ ଯାଉଥିବା ବେଳେ ତାଙ୍କୁ ବଦଳି କରାଯିବା ନିଶ୍ଚିତ ଭାବେ ପାଗଳାମୀ ଛଡା ଆଉ କିଛି ନୁହେଁ । ସେ ତାଙ୍କ ଜୀବନ ତମାମ ରେଲୱେ ପାଇଁ ସେବା କଲେ । କିନ୍ତୁ ଅବସର ନେବାର ଠିକ୍ ୩ ଦିନ ପୂର୍ବରୁ ତାଙ୍କୁ ବଦଳି କରାଯିବା ଦ୍ୱାରା ତାଙ୍କର ଅବସରକାଳୀନ ପ୍ରାପ୍ୟ ପାଇବାରେ ଘୋର ସମସ୍ୟା ସୃଷ୍ଟି ହେବ । ଚାକିରି କାଳର ଶେଷ ସମୟରେ ଏଭଳି ବଦଳି ଆଦେଶ ଦିଆଯିବା ତାଙ୍କୁ ମାନସିକ ଭାବେ ଉତ୍ପୀଡନ ଦେବା ସହ ସମାନ ।
ସେ କହିଛନ୍ତି ଏସ୍ଇସିଆରରେ ଏକ ଏଚ୍ଏଜି ପଦ ଖାଲିପଡିଛି । ରେଲୱେ ଚାହିଁଥିଲେ ତାଙ୍କୁ ସେହି ପଦରେ ନିଯୁକ୍ତି ଦେଇପାରିଥାନ୍ତା । କିନ୍ତୁ ତାହା ନ କରି ତାଙ୍କୁ ଦିଲ୍ଲୀକୁ ବଦଳି କରାଯିବା କେତେଦୂର ଯୁକ୍ତିଯୁକ୍ତ ତାହା ସେ ବୁଝିପାରୁନାହାନ୍ତି । ନୂଆ ପଦରେ ସେ ମାତ୍ର ୩ ଦିନ କାମ କରିବେ ଏବଂ ଅବସର ନେବେ । ବଦଳି ଭତ୍ତା ଭାବେ ରେଲୱେ ତାଙ୍କୁ ପାଖାପାଖି ୩ ଲକ୍ଷ ଟଙ୍କାର ଭତ୍ତା ମଧ୍ୟ ଦେବ । ଏହା ସାଧାରଣ ଜନତାଙ୍କ ଅର୍ଥକୁ ବରବାଦ କରିବା ବ୍ୟତୀତ ଅନ୍ୟ କିଛିନୁହେଁ ।
ଆର୍ଯ୍ୟ ଅଭିଯୋଗ କରିଛନ୍ତି ଯେ ତାଙ୍କ ପଦୋନ୍ନତିକୁ ଗତ ୬ମାସ ହେଲା ରେଲୱେର ବରିଷ୍ଠ ଅଧିକାରୀମାନେ ଅଟକାଇ ରଖିଛନ୍ତି । ୬ମାସ ପୂର୍ବରୁ ଯଦି ତାଙ୍କର ପଦୋନ୍ନତି ସହ ବଦଳି ହୋଇଥାନ୍ତା ତେବେ ସେ ତାର ସମ୍ପୂର୍ଣ୍ଣ ଲାଭ ପାଇପାରିଥାନ୍ତେ । କିନ୍ତୁ ରେଲୱେ ବୋର୍ଡର ଅଧିକାରୀଙ୍କ ଅପାରଗତା ଯୋଗୁ ସେ ତାର ଲାଭ ପାଇପାରିଲେ ନାହିଁ । ବର୍ତ୍ତମାନ ପଦୋନ୍ନତି ସହ ବଦଳି କରାଯିବା ଫଳରେ ସେ ଅନେକ ଚାଲେଞ୍ଜର ସମ୍ମୁଖୀନ ହେବେ । ତାଙ୍କୁ ଏଭଳି ମାନସିକ ଉତ୍ପୀଡନ ଦେଇଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉ ବୋଲି ଆର୍ଯ୍ୟ ତାଙ୍କ ଚିଠିରେ ଉଲ୍ଲେଖ କରିଛନ୍ତି ।
