କୋଲକାତା: ସଂସଦରେ ଟଙ୍କା ନେଇ ପ୍ରଶ୍ନ ପଚାରିବା ମାମଲାରେ ଛନ୍ଦି ହୋଇପଡ଼ିଥିବା ତୃଣମୂଳ କଂଗ୍ରେସ ସାଂସଦ ମହୁଆ ମୋଇତ୍ରଙ୍କ ସମର୍ଥନରେ ବାହାରିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ମହୁଆଙ୍କୁ ବାହାର କରିବା ଲାଗି ବିଜେପି ଷଡ଼ଯନ୍ତ୍ର କରୁଛି ବୋଲି ଟିଏମସି ସୁପ୍ରିମୋ ମମତା ବାନାର୍ଜୀ ଅଭିଯୋଗ କରିଛନ୍ତି । ଲୋକସଭାରୁ ବାହାର କରିବା ପାଇଁ ମହୁଆଙ୍କ ଲାଗି ବିଜେପି ଷଡ଼ଯନ୍ତ୍ର କରୁଛି । ଏହା ଦ୍ବାରା ମହୁଆଙ୍କ ଲୋକପ୍ରିୟତା ଆହୁରି ବଢ଼ିଯାଇଛି । ଏବେ ସେ ସଂସଦରେ ଯାହା କହୁଥିଲେ ତାହା ବାହାରେ କହିବେ ବୋଲି ମୁଖ୍ୟମନ୍ତ୍ରୀ ମମତା କହିଛନ୍ତି ।
ମହୁଆ ମୋଇତ୍ର ଅଡ଼ୁଆରେ ପଡ଼ିଥିବା ବେଳେ ତାଙ୍କ ପାଇଁ ସଂକଟମୋଚକ ସାଜିଛନ୍ତି ବଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତାଙ୍କ ଦଳର ସୁପ୍ରିମୋ ମମତା ବାନାର୍ଜୀ । ଏହା ପୂର୍ବରୁ ମହୁଆଙ୍କୁ ଗୁରୁତ୍ବପୂର୍ଣ୍ଣ ଦାୟିତ୍ବ ଦେଇଥିଲେ ମମତା । ସାଂସଦ ମହୁଆ ମୋଇତ୍ରଙ୍କୁ କୃଷ୍ଣନଗର ଅଧ୍ୟକ୍ଷ ନିଯୁକ୍ତ କରିଥିଲେ ମମତା ବାନାର୍ଜୀ । ଏହା ପରେ ମୁଖ୍ୟମନ୍ତ୍ରୀ ମମତାଙ୍କୁ ଏକ୍ସରେ ଧନ୍ୟବାଦ ଜଣାଇଥିଲେ ମହୁଆ ମୋଇତ୍ର ।
ତେବେ ବ୍ୟବସାୟୀ ଦର୍ଶନ ହୀରାନନ୍ଦାନୀଙ୍କ ପାଖରୁ ଟଙ୍କା ନେଇ ସଂସଦରେ ମହୁଆ ପ୍ରଶ୍ନ କରୁଛନ୍ତି ବୋଲି ଲୋକସଭା ବାଚସ୍ପତିଙ୍କୁ ଚିଠି ମାଧ୍ୟମରେ ଅଭିଯୋଗ କରିଥିଲେ ବିଜେପି ସାଂସଦ ନିଶିକାନ୍ତ ଦୁବେ । ଏହା ସହ ମହଙ୍ଗା ଉପହାର ଗ୍ରହଣ କରିଥିବା ନେଇ ଟିଏମସି ସାଂସଦ ମହୁଆଙ୍କ ଉପରେ ସେ ଅଭିଯୋଗ ଆଣିଥିଲେ । ଏହା ପରେ ମହୁଆ ମୋଇତ୍ର ସଂସଦର ଏଥିକ୍ସି କମିଟିରେ ହାଜର ହୋଇଥିଲେ । ଏହି ବୈଠକରେ ଖୁବ ପାଟିତୁଣ୍ଡ ହେବା ପରେ ମହୁଆଙ୍କ ସମେତ ବହୁ ବିରୋଧୀ ଦଳର ସାଂସଦ ମଧ୍ୟ ବାହାରକୁ ଚାଲିଆସିଥିଲେ ।
ବିଏସପି ସାଂସଦ ଡାନିସ ଅଲି ଏଥିକ୍ସ କମିଟି ଅଧ୍ୟକ୍ଷ ଅନୈତିକ ପ୍ରଶ୍ନ ପଚାରୁଥିବା ନେଇ ଅଭିଯୋଗ କରିଥିଲେ । ଏହା ପରେ ଟିଏମସି ସାଂସଦ ଅଭିଷେକ ବାନାର୍ଜୀ ମଧ୍ୟ ମହୁଆ ମୋଇତ୍ରଙ୍କୁ ସମର୍ଥନ କରିଥିଲେ । ମହୁଆ ମୋଇତ୍ର ନିଜକୁ ରକ୍ଷା କରିବା ଲାଗି ସମ୍ପୂର୍ଣ୍ଣ ସକ୍ଷମ ବୋଲି କହିବା ସହ ବିଜେପିକୁ ଟାର୍ଗେଟ କରିଥିଲେ ଅଭିଷେକ ବାନାର୍ଜୀ । ସେପଟେ ମହୁଆ ମୋଇତ୍ରଙ୍କ ମାମଲା ପରେ ସଂସଦରେ ନୂଆ ନିୟମ ଜାରି ହୋଇଛି । ଏବେ କେହି ସାଂସଦ ନିଜର ପୋର୍ଟାଲ ଲଗଇନ୍ ପାସଓ୍ବାର୍ଡ ଅନ୍ୟ କୌଣସି ବ୍ୟକ୍ତିଙ୍କୁ ସେୟାର କରିପାରିବେ ନାହିଁ ।