ମୁମ୍ବାଇ: ଭାରତୀୟ ଅଧିନାୟକ ରୋହିତ ଶର୍ମା ଛକାରେ ଅର୍ଦ୍ଧଶତକ ପୂରଣ କରିଛନ୍ତି । ନ୍ୟୁଜିଲାଣ୍ଡ ବିପକ୍ଷରେ ଓ୍ବାଙ୍ଖେଡେ ଷ୍ଟାଡିୟମରେ ଖେଳାଯାଉଥିବା ସେମି ଫାଇନାଲ ମୁକାବିଲାରେ ଏହି କୀର୍ତ୍ତିମାନ ସ୍ଥାପନ କରିଛନ୍ତି ରୋହିତ ଶର୍ମା । ୫୦ ତମ ଛକା ମାରିବା ସହ ଓ୍ବେଷ୍ଟ ଇଣ୍ଡିଜ୍ର ପୂର୍ବତନ ବ୍ୟାଟର କ୍ରିସ୍ ଗେଲଙ୍କୁ ପଛରେ ପକାଇ ଦେଇଛନ୍ତି ରୋହିତ । ଟୁର୍ଣ୍ଣାମେଣ୍ଟରେ ଗେଲ୍ ୪୯ଟି ଛକା ମାରିଥିଲେ। ଆଉ ଏବେ ସର୍ବାଧିକ ଛକା ମାରିବାର ରେକର୍ଡ ହିଟ ମ୍ୟାନ୍ ରୋହିତ ଶର୍ମା ନିଜ ନାଁରେ କରିଛନ୍ତି ।
ଆଜିର ମ୍ୟାଚ୍ରେ ନ୍ୟୁଜିଲାଣ୍ଡ ବିପକ୍ଷରେ ରୋହିତ ଶର୍ମା ୨୯ଟି ବଲ୍ରେ ୧୬୨.୦୭ ଷ୍ଟ୍ରାଇକ୍ ରେଟ୍ ସହ ୪୭ ରନ୍ କରି ପାଭିଲିୟନ୍ ଫେରିଥିଲେ । ଏଥିରେ ସେ ୪ଟି ଚୌକା ଏବଂ ୪ଟି ଛକା ମାରିଥିଲେ । ଏହି ୪ଟି ଛକା ସମେତ ରୋହିତ ଶର୍ମା ବିଶ୍ବକପରେ ମୋଟ୍ ୫୧ଟି ଛକା ମାରି ରେକର୍ଡ କରିଛନ୍ତି । ଚଳିତ ବିଶ୍ବକପରେ ୨୭ଟି ଛକା ମାରିସାରିଛନ୍ତି ରୋହିତ ଶର୍ମା । କ୍ରୀସ ଗେଲ୍ ୩୫ଟି ମ୍ୟାଚ୍ରେ ୪୯ଟି ଛକା ମାରିଥିଲେ । ହେଲେ ରୋହିତ ଶର୍ମା ୨୭ଟି ମ୍ୟାଚ୍ରେ ୫୧ଟି ଛକା ମାରିଛନ୍ତି ।
ଛକା ମାରିବା ବ୍ୟତୀତ ରନ୍ କରିବାରେ ମଧ୍ୟ କ୍ରିସ୍ ଗେଲ୍ଙ୍କୁ ପଛରେ ପକାଇ ଦେଇଛନ୍ତି ରୋହିତ ଶର୍ମା । ହିଟ ମ୍ୟାନ୍ ୨୭ଟି ପାଳିରେ ୬୧.୧୨ ଆଭେରେଜ୍ ସହ ୧୫୨୮ ରନ୍ କରିଛନ୍ତି । ହେଲେ କ୍ରିସ୍ ଗେଲ୍ ୩୪ଟି ପାଳିରେ ୩୫.୯୩ ଆଭେରେଜ୍ ସହ ୧୧୮୬ ରନ୍ କରିଥିଲେ। ଏହି ସବୁ ମ୍ୟାଚ୍ରେ ରୋହିତ ଶର୍ମା ୬ଟି ଅର୍ଦ୍ଧଶତକ କରିଥିବା ବେଳେ ଗେଲ ମାତ୍ର ଦୁଇଟି ଅର୍ଦ୍ଧଶତକ କରିଥିଲେ ।
୨୦୨୩ ସେମି ଫାଇନାଲ ମୁକାବିଲା ନ୍ୟୁଜିଲାଣ୍ଡ ଏବଂ ଭାରତ ମଧ୍ୟ ଓ୍ବାଙ୍କେଡେ ଷ୍ଟାଡିୟମରେ ଖେଳାଯାଉଛି । ରୋହିତ ଶର୍ମା ୪୭ ରନ୍ କରି ଆଉଟ ହୋଇଥିଲେ । ପରେ ଶୁବମନ ଗିଲ ୭୯ ରନ୍ କରିଥିବା ବେଳେ ରିଟାୟର୍ଡ ହଟ ହୋଇ ପାଭିଲିୟନ୍ ଫେରିଛନ୍ତି । ଏହା ପରେ ବିରାଟ କୋହଲି ଏବଂ ଶ୍ରେୟସ ଆୟାରଙ୍କ ଯୋଡ଼ି କମାଲ କରିଛି ।