ଜୟପୁର: ରାଜସ୍ଥାନରେ ବିଜେପି ସରକାର ଗଢ଼ିବାକୁ ଯାଉଛି । ରାଜସ୍ଥାନରେ ରାଜନୈତିକ ପରମ୍ପରା ବଜାୟ ରହିଛି । କଂଗ୍ରେସ ସରକାର ପରେ ପୁଣି ଥରେ ବିଜେପି ଶାସନକୁ ଫେରିବାକୁ ଯାଉଛି । ସେପଟେ ଭୋଟ ଗଣତି ଶେଷ ହେବାକୁ ଯାଉଥିବା ବେଳେ ମୁଖ୍ୟମନ୍ତ୍ରୀ ଅଶୋକ ଗେହଲଟ ଆଜି ସନ୍ଧ୍ୟା ୫.୩୦ରେ ରାଜଭବନ ଯାଇ ରାଜ୍ୟପାଳଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିବେ। ବିଦାୟୀ ମୁଖ୍ୟମନ୍ତ୍ରୀ ଗେହଲଟ ରାଜ୍ୟପାଳ କଲରାଜ ମିଶ୍ରଙ୍କୁ ଇସ୍ତଫା ପତ୍ର ଦେବେ ବୋଲି ଜଣାପଡ଼ିଛି ।
ବିଜେପିର ବମ୍ପର ବିଜୟ ପରେ କଂଗ୍ରେସ ଶିବିରରେ ନିରବତା ଖେଳିଯାଇଛି । ସେପଟେ ଜୟପୁରରେ ବିଜେପିର କାର୍ଯ୍ୟକର୍ତ୍ତାମାନେ ବିଜୟ ଉତ୍ସବ ମନାଉଥିବା ବେଳେ ପରସ୍ପରକୁ ମିଠା ଦେଇ ଶୁଭେଚ୍ଛା ଜଣାଉଛନ୍ତି । ତେବେ ଭୋଟିଂ ସରିବା ପରେ ଏକଜିଟ ପୋଲରେ ରାଜସ୍ଥାନରେ ବିଜେପିର ବିଜୟ ହେବ ବୋଲି ଚିତ୍ର ଏକପ୍ରକାର ସ୍ପଷ୍ଟ ହୋଇଥିଲା । ଆଉ ଆଜିର ଏକଜାଟ ରେଜଲ୍ଟ ଆସିବା ପୂର୍ବରୁ ଭୋଟ ଗଣତି ଟ୍ରେଣ୍ଡ ଅନୁସାରେ କଂଗ୍ରେସ ଠାରୁ ବହୁ ଆଗରେ ରହିଛି ବିଜେପି ।
ସେପଟେ ଏକଜିଟ ପୋଲକୁ ପ୍ରତ୍ୟାଖାନ କରିବା ସହ ରାଜ୍ୟରେ କଂଗ୍ରେସ ସରକାର କରିବ ବୋଲି ଦୃଢ଼ୋକ୍ତ ବାଢ଼ିଥିଲେ ଅଶୋକ ଗେହଲଟ । ରାଜସ୍ଥାନରେ ବହୁମତରୁ ବହୁ ପଛରେ କଂଗ୍ରେସ । ବହୁମତ ପାଇଁ ୧୦୧ ସିଟ ଦରକାର ଥିବା ବେଳେ ବର୍ତ୍ତମାନର ଟ୍ରେଣ୍ଡ ଅନୁସାରେ କଂଗ୍ରେସକୁ ୬୯ ଆସନ୍ ମିଳୁଛି । ତେବେ ୨୦୧୮ ତୁଳନାରେ ଖୁବ କମ ଆସନରେ ବିଜୟୀ ହେବାକୁ ଯାଉଛି କଂଗ୍ରେସ । ସେହିଭଳି ବିଜେପି ୧୧୫ ସିଟ୍ରେ ବିଜୟୀ ହୋଇ ସରକାର ଗଢ଼ିବାକୁ ଏକପ୍ରକାର ପ୍ରସ୍ତୁତ ଥିବା ଜଣାପଡ଼ିଛି ।
