ଓ୍ବାଶିଂଟନ ଡିସି: ଇସ୍ରାଏଲ-ହମାସ ଯୁଦ୍ଧକୁ ୨୫ ଦିନ ବିତିସାରିଥିବା ବେଳେ ଯୁଦ୍ଧର ତୀବ୍ରତା ବୃଦ୍ଧି ପାଇବାରେ ଲାଗିଛି । ଗାଜା ଷ୍ଟ୍ରିପରେ ଇସ୍ରାଏଲ ସେନା ଘନଘନ ବୋମା ମାଡ କରୁଥିବା ନେଇ ସୂଚନା ମିଳିଥିବା ବେଳେ ହଜାର ହଜାର ଲୋକଙ୍କ ଜୀବନ ଗଲାଣି । ଇତିମଧ୍ୟରେ ଆମେରିକାରେ ରହୁଥିବା ଏକ  ପାଲେଷ୍ଟାଇନ୍‌ ପରିବାର ଦାବି କରିଛି ଯେ, ଇସ୍ରାଏଲ ପଟୁ ହେଉଥିବା ଆକ୍ରମଣରେ ଗାଜାରେ ଥିବା ସେମାନଙ୍କ ପରିବାରର ୩ ପିଢ଼ି ଶେଷ ହୋଇଯାଇଛି । ଗୋଟିଏ ଦିନରେ ହିଁ ତାଙ୍କ ସଂପର୍କୀୟଙ୍କ ପରିବାର ନିଶେଷ ହୋଇଯାଇଛି ବୋଲି ସିଏନଏନକୁ କହିଛନ୍ତି ତାରିକ୍‌ ହମୁଦା ଏବଂ ତାଙ୍କ ପତ୍ନୀ ମନାଲ । 

ଇସ୍ରାଏଲ–ହମାସ ଯୁଦ୍ଧରେ ତାଙ୍କର ୪୨ ଜଣ ସଂପର୍କୀୟଙ୍କ ମୃତ୍ୟୁ ହୋଇସାରିଛି ବୋଲି ହମୁଦା ଏବଂ ମନାଲ କହିଛନ୍ତି । ତେବେ ଅକ୍ଟୋବର ୧୯ରେ ଇସ୍ରାଏଲ କରିଥିବା ଏକ ଏୟାର ଷ୍ଟ୍ରାଇକରେ ହିଁ ଏମାନେ ମୃତ୍ୟୁବରଣ କରିଥିବା ନେଇ ସେମାନେ ଦାବି କରିଛନ୍ତି । ହମୁଦା ସିଏନଏନକୁ କହିଛନ୍ତି ଯେ ତାଙ୍କ ପତ୍ନୀ ମନାଲଙ୍କ ୪ ଭାଇ, ଜଣେ ଭଉଣୀ ଏବଂ ସେମାନଙ୍କ ପିଲାଙ୍କ ମୃତ୍ୟୁ ହୋଇଛି । ଅକ୍ଟୋବର ୧୯ରେ ସେମାନଙ୍କ ଘର ଉପରେ ଦୁଇ ଦୁଇଟି ବୋମା ମାଡ ହେବା ପରେ ମନାଲଙ୍କ ସଂପର୍କୀୟଙ୍କ ଦୁଃଖଦ ମୃତ୍ୟୁ ହୋଇଛି । ତେବେ ମନାଲ ତାଙ୍କ ପରିବାରର ପ୍ରତିଟି ସଦସ୍ୟଙ୍କୁ ବହୁତ ଭଲ ପାଉଥିଲେ । 

ପ୍ରକୃତରେ ସ୍ବାମୀ ସ୍ତ୍ରୀ ଗାଜାର ଗୋଟିଏ ପ୍ରାନ୍ତର ବାସିନ୍ଦା ହୋଇଥିବା ବେଳେ ସେମାନେ ୨୦୦୪ରୁ ଆମେରିକାରେ ରହୁଛନ୍ତି ବୋଲି ହମୁଦା ସିଏନଏନକୁ କହିଛନ୍ତି । ଅନ୍ୟପଟେ ଗାଜାରେ ଥିବା ହମାସ ସଂଗଠନ ଏବଂ ଇସ୍ରାଏଲ ସେନା ମଧ୍ୟରେ ଯୁଦ୍ଧ ଆରମ୍ଭ ହେବା ଦିନରୁ ହିଁ ଗାଜାରେ ଅଶାନ୍ତି ତୀବ୍ର ରୂପ ଧାରଣ କରିଛି । ଜୀବିତଙ୍କ ପାଇଁ ଚିନ୍ତା ହେଉଥିବାରୁ ମୃତକଙ୍କ ଲାଗି ଶୋକ ବି କରିପାରିଲୁ ନାହିଁ ବୋଲି ହମୁଦା କହିଛନ୍ତି । 

ସେପଟେ ମନାଲଙ୍କ ଭାଇ ଇଆଦ ଅବୁ ଫ୍ଲୋରିଡାରେ ରହୁଥିବା ବେଳେ ସଂପର୍କୀୟଙ୍କ ମୃତ୍ୟୁ ତାଙ୍କୁ ମର୍ମାହତ କରିଛି।  ଜଣେ କି ଦୁଇ ଜଣେ ନୁହେଁ ପରିବାରର ୪୨ ସଦସ୍ୟଙ୍କୁ ହରାଇ ଇଆଦ ନିଜର କୋହ ସମ୍ଭାଳି ପାରୁନାହାନ୍ତି । ସବୁଠୁ ବଡ଼ କଥା ହେଉଛି ମୃତକଙ୍କ ମଧ୍ୟରେ ୩ ମାସରୁ ୭୭ ବର୍ଷର ସଦସ୍ୟ ଅଛନ୍ତି ବୋଲି ଇଆଦ କହିଛନ୍ତି । ତେବେ ଇସ୍ରାଏଲ ଏୟାର ଷ୍ଟ୍ରାଇକ୍‌ କରିବା ପୂର୍ବରୁ ସେମାନଙ୍କୁ କୌଣସି ସୂଚନା ଦେଇନଥିଲା ବୋଲି ସେ ଅଭିଯୋଗ ମଧ୍ୟ କରିଛନ୍ତି ।