ମୁମ୍ବାଇ: ଓ୍ଵାଙ୍ଖେଡ଼େ ଷ୍ଟାଡିୟମରେ ଟିମ ଇଣ୍ଡିଆ ଛିଡ଼ା କରିଛି ବିଶାଳ ସ୍କୋର । ଚଳିତ ବିଶ୍ଵକପର ୩୩ତମ ମ୍ୟାଚରେ ଭାରତୀୟ ବ୍ୟାଟରଙ୍କ ଚମତ୍କାର ପ୍ରଦର୍ଶନ ଦେଖିବାକୁ ମିଳିଛି । ପ୍ରଥମେ ବ୍ୟାଟିଂ କରିଥିବା ଭାରତ ନିର୍ଦ୍ଧାରିତ ଓଭରରେ ୮ ଓ୍ଵିକେଟ୍ ହରାଇ ୩୫୭ ରନର ବିଶାଳ ସ୍କୋର କରିଛି । ଭାରତ ପକ୍ଷରୁ ଶୁଭମନ ଗିଲ୍ ୯୨ ରନ ଓ ବିରାଟ କେହାଲି ୮୮ ରନର ଦମଦାର ଇନିଂସ ଖେଳିଥିବା ବେଳେ ଶ୍ରେୟସ ଆୟର ୮୨ ରନର ବିସ୍ଫୋରକ ପାଳି ଖେଳିଛନ୍ତି ।
ସେପଟେ ଶ୍ରୀଲଙ୍କା ସମ୍ମୁଖରେ ୩୫୮ ରନର ବିଶାଳ ବିଜୟ ଲକ୍ଷ୍ୟ ରହିଛି । ଅଧିନାୟକ ରୋହିତ ଶର୍ମା(୪) କ୍ଲିନ ବୋଲ୍ଡ ହୋଇ ପାଭିଲିୟନ ଫେରିଥିଲେ । ଏହା ପରେ ଶୁଭମନ ଗିଲ୍ ଓ ବିରାଟ କୋହଲି ଦଳର ମଙ୍ଗ ସମ୍ଭାଳିଥିଲେ । ଦୁଇ ବ୍ୟାଟର ଅର୍ଦ୍ଧଶତକୀୟ ପାଳି ଖେଳି ଭାରତକୁ ବିଶାଳ ସ୍କୋର କରିବାରେ ସହାୟକ ହୋଇଛନ୍ତି । ହେଲେ ଗିଲ ଏବଂ କୋହଲି ଶତକ ଆଡ଼କୁ ଅଗ୍ରସର ହେଉଥିବା ଆଉଟ୍ ହୋଇଥିଲେ । ଗିଲ ୯୨ ବଲରୁ ୧୧ ଚୌକା ଓ ୨ ଛକା ସହ ୯୨ ରନର ପାଳି ଖେଳିଥିଲେ । ଗିଲ୍ ଓ କୋହଲି ମିଳିତ ଭାବେ ୧୮୯ ରନର ଭାଗିଦାରୀ ପାଳି ଖେଳିଥିଲେ ।
ଗିଲଙ୍କ ପରେ କୋହଲି ୮୮ ରନ କରି ପାଭିଲିୟନ ଫେରିଥିଲେ । ଏହାପରେ ଶ୍ରେୟସ ଆୟର ଓ କେଏଲ ରାହୁଲ ଚତୁର୍ଥ ଓ୍ଵିକେଟରେ ୬୦ ରନ ଯୋଡ଼ିଥିଲେ । କେଏଲ ରାହୁଲ ୨୧ ରନ କରି ଆଉଟ୍ ହୋଇଇଥିଲେ। ଅନ୍ୟପଟେ ଶ୍ରେୟସ ଆୟର ଫର୍ମକୁ ଫେରି ଚଳିତ ବିଶ୍ଵକପରେ ଦ୍ଵିତୀୟ ଅର୍ଦ୍ଧଶତକ ହାସଲ କରିଛନ୍ତି । ସୂର୍ଯ୍ୟକୁମାର ଯାଦବ ନିରାଶ କରିଛନ୍ତି । ଶେଷ ଆଡ଼କୁ ଶ୍ରେୟସ ଦ୍ରୁତ ବ୍ୟାଟିଂ କରି ୫୫ ବଲରୁ ୩ ଚୌକା ଓ ୬ ଛକା ସହ ୮୨ ରନର ବିସ୍ଫୋରକ ଇନିଂସ ଖେଳିଛନ୍ତି ।
ରବୀନ୍ଦ୍ର ଜାଡ଼େଜା ୩୫ ରନ କରି ଆଉଟ ହୋଇଛନ୍ତି । ସେହିଭଳି ଶାମୀ ରନ୍ ଆଉଟ ହୋଇଥିବା ବେଳେ ବୁମରା ଏକ ରନ୍ କରି ଅପରାଜିତ ଅଛନ୍ତି । ଭାରତ ନିର୍ଦ୍ଧାରିତ ଓଭରରେ ୮ ଓ୍ଵିକେଟ୍ ହରାଇ ୩୫୭ ରନ କରିଛି । ସେପଟେ ବୋଲିଂରେ ଶ୍ରୀଲଙ୍କା ପକ୍ଷରୁ ଦିଲଶାନ ମଦୁଶଙ୍କା ସର୍ବାଧିକ ୫ ଓ୍ଵିକେଟ୍ ହାସଲ କରିଛନ୍ତି ।