ଜାମ୍ମୁକାଶ୍ମୀରରେ ୫ ଲସ୍କର ଆତଙ୍କବାଦୀ ଗିରଫ, ୨ ଟେରର ମଡ୍ୟୁଲ୍ର ପର୍ଦ୍ଦାଫାଶ
Image Courtesy: indiatoday
ଶ୍ରୀନଗର, ୨୪/୦୯: ଜାମ୍ମୁକାଶ୍ମୀରରେ ବଡ଼ ଧରଣର ଆତଙ୍କବାଦୀ ଯୋଜନା ପଣ୍ଡ କରିଛନ୍ତି କୁଲଗାମ୍ ପୋଲିସ ଏବଂ ସେନା । ୫ ଜଣ ଲସ୍କର ଆତଙ୍କବାଦୀଙ୍କୁ ଗିରଫ କରାଯାଇଥିବା ବେଳେ ୨ଟି ଟେରର୍ ମଡ୍ୟୁଲ (ଆତଙ୍କବାଦୀ ଯୋଜନା)ର ପର୍ଦ୍ଦାଫାଶ ହୋଇଛି । ଏହା ସହ ଅପରେସନ୍ ସମୟରେ ବହୁ ପରିମାଣର ଗୋଳାବାରୁଦ ଏବଂ ବନ୍ଧୁକ ଜବତ କରିଛନ୍ତି ଯବାନ ।
ଦୁଇଟି ପିସ୍ତଲ, ୩ ହ୍ୟାଣ୍ଡ ଗ୍ରେନେଡ୍, ଗୋଟିଏ ୟୁବିଜିଏଲ୍ ଏବଂ ଗୋଳାବାରୁଦ ଜବତ ହୋଇଥିବା ଜଣାପଡ଼ିଛି । ହାଇବ୍ରିଡ୍ ଆତଙ୍କବାଦୀ କୁହାଯାଉଥିବା ୫ ଜଣ ହେଉଛନ୍ତି- ଆଦିଲ ହୁସେନ ଓ୍ବାନି, ସୁହେଲ ଅହମ୍ମଦ ଦାର, ଏତମାଦ ଅହମଦ ଲାଓ୍ବେ , ମେହେରାଜ୍ ଅହମଦ ଲୋନେ ଏବଂ ସବଜାର ଅହମ୍ମଦ ଖାର । ତେବେ ଏହି ୫ ଆତଙ୍କବାଦୀ ଲସ୍କର-ଏ-ତୋଏବା ସଂଗଠନ ସହ ଜଡ଼ିତ ।
ଏମାନଙ୍କ ବିରୁଦ୍ଧରେ କାଇମୋ ପୋଲିସ ଷ୍ଟେସନରେ ମାମଲା ରୁଜୁ ହୋଇଥିବା ବେଳେ ତଦନ୍ତ ଜାରି ରହିଛି । ଗତମାସ ଦକ୍ଷିଣ କାଶ୍ମୀରର ବାନ୍ଦିପୁରାରେ ଏକ ଟେରର୍ ମଡ୍ୟୁଲ୍ ସଂପର୍କରେ ଜାଣିବା ପରେ ଦୁଇ ଜଣ ଆତଙ୍କବାଦୀଙ୍କୁ ଗିରଫ କରାଯାଇଥିଲା । ଏହା ପରେ ତଦନ୍ତ ଜୋରଦାର କରିଥିଲା ପୋଲିସ । ପରେ ଏତେବଡ଼ ସଫଳାତ ପାଇବା ସହ ୫ ହାଇବ୍ରିଡ୍ ଆତଙ୍କବାଦୀଙ୍କୁ ଗିରଫ କରାଯାଇଛି ।
ମିଳିଥିବା ସୂଚନା ଅନୁସାରେ, ଆଜିର ଏହି ଅପରେସନ୍ରେ ୨୬ ଆସାମ ରାଇଫଲସ ଏବଂ ସିଆରପିଏଫ ମିଳିତ ଭାବେ ସାମିଲ ହୋଇଥିଲେ । ଏହା ସହ କୁଲଗାମ ପୋଲିସର ମଧ୍ୟ ସକ୍ରିୟ ଯୋଗଦାନ ଥିଲା ବୋଲି ଜଣାପଡ଼ିଛି ।