ନୂଆଦିଲ୍ଲୀ, ୦୩/୧୧: ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ସ୍ଥିତି ଗମ୍ଭୀର ହେବାରେ ଲାଗିଛି । ସ୍ଥିତି ଏମିତି ହୋଇଛି ଯେ, ଧୂଆଁ ଧୂଆଁ ସକାଳରେ ଆଖି ଜଳୁଛି । ସ୍ଥିତିକୁ ଦେଖି ଦିଲ୍ଲୀ-ଏନସିଆରରେ ପ୍ରାଥମିକ ସ୍କୁଲ୍ ବନ୍ଦ ରଖିବାକୁ ନିର୍ଦ୍ଦେଶ ଦିଆ ଯାଇଛି । ଏହି ସମୟରେ ଅନଲାଇନରେ ପାଠପଢ଼ା ହେବ ।
ବାୟୁ ପ୍ରଦୂଷଣକୁ ଦେଖି ଦିଲ୍ଲୀ ସରକାର ନିର୍ଦ୍ଦେଶ ଦେଇଛନ୍ତି, ରାଜ୍ୟରେ ଆଗାମୀ ୨ ଦିନ ଯାଏଁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ବିଦ୍ୟାଳୟ ବନ୍ଦ ରହିବ । ଏହି ନିର୍ଦ୍ଦେଶ ଦିଲ୍ଲୀର ସମସ୍ତ ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ ପାଇଁ ଲାଗୁ ହେବ । ବଢ଼ୁଥିବା ପ୍ରଦୂଷଣକୁ ଦେଖି ଦିଲ୍ଲୀର କେଜ୍ରିୱାଲ୍ ସରକାର ଏହି ନିଷ୍ପତ୍ତି ନେଇଛନ୍ତି ।
କୁହୁଡ଼ି ଚାଦର ତଳେ ପାଟଣା, ଗାଡି ମୋଟର ଚଳାଚଳ ବାଧାପ୍ରାପ୍ତ
ଏଥିସହ ଦିଲ୍ଲୀରେ ପ୍ରଦୂଷଣରୁ ମୁକ୍ତି ପାଇବା ଲାଗି ଜିଆର୍ଏପି-୩ ଲାଗୁ ହୋଇଛି । ଦିଲ୍ଲୀ ମେଟ୍ରୋ ତାର ନେଟୱର୍କରେ ଶୁକ୍ରବାର ଆହୁରି ୨୦ଟି ଅତିରିକ୍ତ ଟ୍ରେନ୍ ଯୋଡ଼ିବ । ଅକ୍ଟୋବର ୨୫ରେ ଜିଆର୍ଏପି-୨ ଲାଗୁ ପରେ ଦିଲ୍ଲୀ ମେଟ୍ରୋରେ ସୋମବାରରୁ ଶୁକ୍ରବାର ଯାଏଁ ଅତିରିକ୍ତ ୪୦ଟି ଟ୍ରେନ୍ ଚାଲିଥିଲା । ସାଧାରଣ ପରିବହନକୁ ଲୋକେ ବ୍ୟବହାର କରିବା ଲାଗି ପ୍ରୋତ୍ସାହିତ କରିବା ଲାଗି ଏହି ପଦକ୍ଷେପ ନିଆ ଯାଇଛି ।
ଦିଲ୍ଲୀରେ ବାୟୁ ଗୁଣବତ୍ତା ହ୍ରାସ୍ ପାଉଥିବା ବେଳେ ଦିଲ୍ଲୀ ରାଜ୍ୟ କ୍ୟାନସର ସଂସ୍ଥାର ମୁଖ୍ୟ କ୍ଲିନିକାଲ୍ ଅଙ୍କୋଲୋଜି ଡକ୍ଟର ପ୍ରଜ୍ଞା ଶୁକ୍ଳା କହିଛନ୍ତି, ବାୟୁ ପ୍ରଦୂଷଣ ପାଇଁ ଲୋକଙ୍କ ଆଖି ଜଳିବ । ଆଖିରୁ ପାଣି ବାହାରିବା ସହ ଗୋଡ଼ହାତ ବିନ୍ଧିବା ସହ କ୍ଲାନ୍ତ ଲାଗିବ । ଏହାର କୁପ୍ରଭାବ ଅଧିକ ଦିନ ଧରି ରହିବ ।
ପ୍ରଦୂଷଣ ମାତ୍ରା ବଢ଼ୁଥିବାରୁ ଗୁରୁଗ୍ରାମ ଜିଲ୍ଲାପାଳ ଆବର୍ଜନା ଜାଳିବା ଉପରେ ପ୍ରତିବନ୍ଧକ ଲଗାଇଛନ୍ତି । ଗୁରୁଗ୍ରାମରେ ଏୟାର କ୍ୱାଲିଟି ଇଣ୍ଡେକ୍ସ ହ୍ରାସ୍ ପାଇଛି । ଦିଲ୍ଲୀ-ଏନସିଆରରେ ଜରୁରୀ ନଥିବା ନିର୍ମାଣ ଉପରେ ପ୍ରତିବନ୍ଧକ ଲଗାଯାଇଛି । ଏଥିସହ ବିଏସ୍-୩ ପେଟ୍ରୋଲ୍ ଓ ବିଏସ୍-୪ ଡିଜେଲ୍ ଗାଡ଼ି ଉପରେ ପ୍ରତିବନ୍ଧକ ଲଗାଯାଇଛି । ଏହି ନିୟମ ନ ମାନିଲେ ୨୦ ହଜାର ଟଙ୍କା ଜରିମାନା ଦେବାକୁ ପଡ଼ିବ ।
ସାମୀ-ସିରାଜଙ୍କ ଘାତକ ବୋଲିଂରେ ମାତ୍ର ୫୫ରନ୍ରେ ରହିଗଲା ଶ୍ରୀଲଙ୍କା : ରୋହିତ ବିଗ୍ରେଡଙ୍କ ସେମିଫାଇନାଲରେ ଏଣ୍ଟ୍ରି