କଲମ୍ବୋ,୧୦/୦୯: କ୍ରିକେଟ୍ ମଇଦାନରେ ରବିବାର ଏସିଆ କପ୍ ସୁପର-୪ରେ ଭାରତ-ପାକିସ୍ତାନ ମଧ୍ୟରେ ହେବ ଏକ ମହାମୁକାବିଲା। ଗ୍ରୁପ୍ ପର୍ଯ୍ୟାୟର ମ୍ୟାଚ୍ ବର୍ଷା ଯୋଗୁ ବାଧାପ୍ରାପ୍ତ ହୋଇଥିଲା । ତେଣୁ ଦ୍ୱିତୀୟ ମୁକାବିଲାକୁ ନେଇ ଉଭୟ ଦେଶର କ୍ରିକେଟ୍ ପ୍ରଶଂସକ ବେଶ ଉତ୍ସାହ ସହ ଅପେକ୍ଷା କରିଛନ୍ତି । ଏହି ମ୍ୟାଚ୍ରେ ବି ବର୍ଷା ବାଧକ ସାଜିବାର ସମ୍ଭାବନା ରହିଛି । ତେଣୁ ଅତିରିକ୍ତ ଦିବସର ବ୍ୟବସ୍ଥା ରହିଛି । ମ୍ୟାଚ୍ ଭାରତୀୟ ସମୟ ଅପରାହ୍ଣ ୩ଟାରୁ ଆରମ୍ଭ ହେବ ।
ସୁପର-୪ରେ ପାକିସ୍ତାନ ପ୍ରଥମ ମ୍ୟାଚ୍ରେ ବାଂଲାଦେଶକୁ ହରାଇଛି । ରବିବାର ବିଜୟୀ ହେଲେ ଦଳ ଫାଇନାଲରେ ପ୍ରବେଶ କରିବ । ଭାରତ କିନ୍ତୁ ପ୍ରଥମ ମ୍ୟାଚ୍ ଖେଳିବ । ପାକିସ୍ତାନର ବୋଲିଂ ବାହିନୀକୁ ସାମ୍ନା କରିବା ନେଇ ଦଳ ସ୍ୱତନ୍ତ୍ର ପ୍ରସ୍ତୁତି କରିଛି। ଲୋକେଶ ରାହୁଲ ଚୂଡ଼ାନ୍ତ ଏକାଦଶରେ ସ୍ଥାନ ପାଇବା ନିଶ୍ଚିତ ରହିଛି । ସେମିତି ଯଶପ୍ରୀତ ବୁମରା ପୁଣି ଦଳରେ ଯୋଗ ଦେଇ ସାରିଛନ୍ତି । ରବିବାର ଭାରତୀୟ ବ୍ୟାଟିଂ ଓ ପାକିସ୍ତାନର ବୋଲିଂ ବାହିନୀ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିବ ।
ସହିନ ଶାହ ଆଫ୍ରିଦି, ନସିମ ଶାହା ଓ ହାରିଶ ରୌଫ ପାକିସ୍ତାନ ବୋଲିଂ ବାହିନୀର ୩ ଘାତକ ପେସର । ଗତ ୨ ତାରିଖରେ ଭାରତୀୟ ବ୍ୟାଟିଂ ବିପର୍ଯ୍ୟୟ ଘଟାଇବାରେ ସେମାନେ ପ୍ରମୁଖ ଭୂମିକା ନିର୍ବାହ କରିଥିଲେ । ରୋହିତ ଶର୍ମା, ଶୁଭମନ ଗିଲ, ବିରାଟ କୋହଲି ଓ ଶ୍ରେୟାସ ଆୟାରଙ୍କୁ ସହଳ ଆଉଟ୍ କରି ସ୍ଥିତି ଦୋହଲାଇ ଦେଇଥିଲେ । କିନ୍ତୁ ମଧ୍ୟଭାଗରେ ଇଶାନ କିଷନ ଓ ହାର୍ଦ୍ଦିନ ପାଣ୍ଡ୍ୟା ଦାୟିତ୍ୱପୂର୍ଣ୍ଣ ଇନିଂସ ଖେଳି ଦଳକୁ ବିପର୍ଯ୍ୟୟରୁ ରକ୍ଷା କରିଥିଲେ ।
ପୁଣି ସୁପର-୪ରେ ଭାରତୀୟ ବ୍ୟାଟର ପାକ୍ର ଘାତକ ପେସରଙ୍କୁ ସାମ୍ନା କରିବେ । ଯାହା ଏବେ ରୋହିତବାହିନୀଙ୍କ ପାଇଁ ବଡ଼ ଚ୍ୟାଲେଞ୍ଜ ଭାବେ ଉଭା ହୋଇଛି । ପାକ୍ ବୋଲରଙ୍କ ଚମତ୍କାର ସୁଇଂ ସାଙ୍ଗକୁ ଆକର୍ଷଣୀୟ ଲାଇନ ଲେଙ୍ଗଥ୍ ଭାରତୀୟ ବ୍ୟାଟରଙ୍କୁ ଅସୁବିଧାରେ ପକାଇଥିଲା । କିନ୍ତୁ ଯୁବ ଓପନର ଶୁଭମନ ଗିଲ ରବିବାର ମ୍ୟାଚ୍ ପାଇଁ ବେଶ ଭଲ ଭାବେ ପ୍ରସ୍ତୁତ ହୋଇଛନ୍ତି । ଦୀର୍ଘ ସମୟ ସେ ନେଟ୍ସରେ ଅଭ୍ୟାସ କରୁଥିବା ଦେଖିବାକୁ ମିଳିଥିଲା ।
ଅଧିନାୟକ ବାବର ଆଜାମ ନିଜ ବୋଲିଂବାହିନୀକୁ ନେଇ ବେଶ ଉତ୍ସାହିତ ରହିଛନ୍ତି । ବ୍ୟାଟିଂରେ ମଧ୍ୟ ନିଜେ ବାବର ଭଲ ଫର୍ମରେ ଅଛନ୍ତି । ସେମିତି ମହମ୍ମଦ ରିଜୱାନ, ଇଫତିକାର ଅହମ୍ମଦ ଓ ଇମାମ-ଉଲ-ହକ ମଧ୍ୟ ଭଲ ପ୍ରଦର୍ଶନ କରୁଛନ୍ତି ।
ରବିବାର ରାହୁଲ ଚୂଡ଼ାନ୍ତ ଏକାଦଶରେ ସାମିଲ ହେବାକୁ ଯାଉଛନ୍ତି । ଏନ୍ସିଏରୁ ଫିଟନେସ ସାର୍ଟିଫିକେଟ୍ ପାଇବା ପରେ ସେ ଭାରତୀୟ ଦଳ ସହ ଯୋଗ ଦେଇଥିଲେ । ତେବେ ରାହୁଲ ଦଳରେ ସାମିଲ ହେଲେ କାହାକୁ ବିଶ୍ରାମ ମିଳିବ । ଶ୍ରେୟାସ ଆୟର ନା ଇଶାନ କିଷନ, ଏହା ଏକ ବଡ଼ ପ୍ରଶ୍ନ । ସେମିତି ବୁମ୍ରା ପିତୃତ୍ୱ ଅବକାଶରେ ସ୍ୱଦେଶ ଫେରିଥିଲେ । ତେଣୁ ନେପାଳ ବିପକ୍ଷ ମ୍ୟାଚ୍ ଖେଳିନଥିଲେ । ପୁଣି ସେ ଦଳ ସହ ଯୋଗଦେଇ ଥିବାରୁ ମହମ୍ମଦ ସାମିଙ୍କୁ ବିଶ୍ରାମ ମିଳିବ ।
କାଣ୍ଡିରୁ ଟୁର୍ଣ୍ଣାମେଣ୍ଟ କଲମ୍ବୋ ସ୍ଥାନାନ୍ତର ହେଲା । କିନ୍ତୁ କଲମ୍ବୋରେ ବି ବର୍ଷା ଲାଗି ରହିଛି । ଅତିରିକ୍ତ ଦିବସର ସୁବିଧା ଥିବାରୁ ମ୍ୟାଚ୍ ଧୋଇ ଯିବାର ଆଶା ନାହିଁ । ପୂର୍ବ ମ୍ୟାଚ୍ ଗୁଡ଼ିକର ଫଳାଫଳ ଅନୁସାରେ ବ୍ୟାଟିଂ ଅପେକ୍ଷା କଲମ୍ବୋରେ ପିଚ ଉଭୟ ପେସର ଓ ସ୍ପିନରଙ୍କୁ ସୁହାଇବ ବୋଲି ଆକଳନ କରାଯାଉଛି ।
ସମ୍ଭାବ୍ୟ ଦଳ
ଭାରତୀୟ ଦଳ: ରୋହିତ ଶର୍ମା (ଅଧିନାୟକ), ଶୁଭମନ ଗିଲ, ବିରାଟ କୋହଲି, ଶ୍ରେୟାସ ଆୟର, ଲୋକେଶ ରାହୁଲ/ଇଶାନ କିଷନ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ସର୍ଦ୍ଦୁଲ ଠାକୁର, କୁଲଦୀପ ଯାଦବ, ଯଶପ୍ରୀତ ବୁମରା ଓ ମହମ୍ମଦ ସିରାଜ ।
ପାକିସ୍ତାନ: ଫଖର ଜମାନ, ଇମାମ ଉଲ ହକ, ବାବର ଆଜାମ (ଅଧିନାୟକ), ମହମ୍ମଦ ରିଜୱାନ, ଅଘା ସଲମାନ, ଇଫତିଖର ଅହମ୍ମଦ, ସଦାବ ଖାନ, ଫଇମ ଅସ୍ରଫ, ସହିନ ଶାହ ଆଫ୍ରିଦି, ନସିମ ଶାହା ଓ ହାରିଶ ରୌଫ ।
