ନୂଆଦିଲ୍ଲୀ ୧୦/୧୧: ଗତ ଶୁକ୍ରବାର ୬୭ତମ ଗ୍ରାମି ପୁରସ୍କାର ନୋମିନେସନ୍ ଘୋଷଣା ହୋଇଛି । ସଙ୍ଗୀତ ଜଗତରେ ପ୍ରତିଷ୍ଠିତ ଓ ଉଦୀୟମାନ ଭାରତୀୟ ବଂଶୋଦ୍ଭବଙ୍କ ପ୍ରତିଭାକୁ ଏଥର ଗ୍ରାମି ଉଜାଗର କରିଛି । ସଙ୍ଗୀତ କ୍ଷେତ୍ରରେ ଚମତ୍କାର କାର୍ଯ୍ୟ ଲାଗି ୬ ଜଣ ଭାରତୀୟ ଗ୍ରାମି ନୋମିନେସନ୍ରେ ସ୍ଥାନ ପାଇଛନ୍ତି । ସେମାନେ ହେଲେ ରିକି କେଜ୍, ଅନୁଷ୍କା ଶଙ୍କର, ଭରିଜାଶ୍ରୀ ବେନୁଗୋପାଲ, ରାଧିକା ଭେକାରିଆ, ନୋସିର ମୋଦି ଓ ଚନ୍ଦ୍ରିକା ଟଣ୍ଡନ ।
୩ ଥର ଗ୍ରାମି ପୁରସ୍କାର ବିଜେତା ରିକି କେଜ୍ ନ୍ୟୁ ଏଜ୍ ଆଲ୍ବମ ବିଭାଗରେ ନୋମିନେଟ୍ ହୋଇଛନ୍ତି । ‘ବ୍ରେକ୍ ଅଫ୍ ଡନ୍’ ଶୀର୍ଷକ ଆଲ୍ବମ ପାଇଁ ତାଙ୍କୁ ଚୟନ କରାଯାଇଛି । ଚଳିତ ବର୍ଷ ରିକିଙ୍କ ସହ ସମାନ ବିଭାଗରେ ସୀତାରିଷ୍ଟ ଓ କମ୍ପୋଜର ଅନୁଷ୍କା ଶଙ୍କର ବି ସାମିଲ ହୋଇଛନ୍ତି । ତାଙ୍କ ଆଲବମ୍ ‘ଚାପ୍ଟର ୨: ହାଓ ଡାର୍କ ଇଟ୍ ଇଜ୍ ବିଫୋର ଡନ୍’କୁ ମଧ୍ୟ ପରିଚିତି ମିଳିଛି । ‘ୱାରିଅର୍ସ ଅଫ୍ ଲାଇଟ୍’ ପାଇଁ ରାଧିକା ଭେକାରିଆ ଏବଂ ‘ତ୍ରିବେଣୀ’ ପାଇଁ ଚନ୍ଦ୍ରିକା ଟଣ୍ଡନଙ୍କୁ ଚୟନ କରାଯାଇଛି । ଅନୁଷ୍କା ଶଙ୍କର ନିଜର ଏକକ କାର୍ଯ୍ୟ ବାହାରେ ମଧ୍ୟ ଖାସ୍ ପରିଚୟ ହାସଲ କରିଛନ୍ତି । ବ୍ରିଟିଶ ମଲ୍ଟି ଇନ୍ଷ୍ଟ୍ରୁମେଣ୍ଟାଲିଷ୍ଟ୍ ଜାକବ୍ କୋଲିଅରଙ୍କ ସହ ‘ଏ ରକ୍ ସମ୍ହ୍ୱେର’ ଗୀତ ପାଇଁ ଶ୍ରେଷ୍ଠ ଗ୍ଲୋବାଲ୍ ମ୍ୟୁଜିକ୍ ପ୍ରଦର୍ଶନ ବିଭାଗରେ ତାଙ୍କୁ ନୋମିନେଟ୍ କରାଯାଇଛି । ଏହି ଗୀତରେ ବେଙ୍ଗାଲୁର ସ୍ଥିତ ଗାୟକ ଓ ବଂଶୀବାଦକ ଭରିଜାଶ୍ରୀ ବେନୁଗୋପାଲ କାମ କରିଛନ୍ତି । ସେ ପ୍ରଥମ ଥର ଗ୍ରାମି ପାଇଁ ନୋମିନେଟ୍ ହୋଇଛନ୍ତି ।
ରିକି କେଜ୍ଙ୍କ ‘ବ୍ରେକ୍ ଅଫ୍ ଡନ୍’ରେ ମଧ୍ୟ ବେନୁଗୋପାଲଙ୍କର ଯୋଗଦାନ ରହିଛି । ଗ୍ରାମି ନୋମିନେସନ୍ ମାଧ୍ୟମରେ ସେ ବିଶ୍ୱସ୍ତରୀୟ ସମ୍ମାନିତ ସଙ୍ଗୀତ ପ୍ରତିଭାଙ୍କ ତାଲିକାରେ ସାମିଲ ହୋଇଛନ୍ତି । ଗ୍ରାମିରେ ରିକି କେଜ୍ଙ୍କ ଯାତ୍ରା ଏକ ଗୁରୁତ୍ୱପୂର୍ଣ୍ଣ ଉପଲବ୍ଧିକୁ ଦର୍ଶାଏ । ୨୦୧୫ ମସିହାରେ ସେ ପ୍ରଥମ ଥର ଏହି ସମ୍ମାନାସ୍ପଦ ପୁରସ୍କାର ଲାଭ କରିଥିଲେ । ‘ୱିଣ୍ଡ୍ସ ଅଫ୍ ସମ୍ସାରା’ ଆଲବମ୍ ପାଇଁ ଉଟର କେଲରମ୍ୟାନ୍ଙ୍କ ସହ ତାଙ୍କୁ ଏହି ସମ୍ମାନ ମିଳିଥିଲା । ୨୦୨୨ ମସିହାରେ ‘ଡିଭାଇନ୍ ଟାଇଡ୍ସ’ ପାଇଁ ସେ ୨ୟ ଗ୍ରାମି ପୁରସ୍କାର ପାଇଲେ । ୨୦୨୩ ମସିହାରେ ‘ଡିଭାଇନ୍ ଟାଇଡ୍ସ’ର ଇମର୍ସିଭ ଅଡିଓ ସଂସ୍କରଣ ପାଇଁ ଶ୍ରେଷ୍ଠ ଇମର୍ସିଭ୍ ଅଡିଓ ଆଲ୍ବମ ବିଭାଗରେ ତାଙ୍କୁ ୩ୟ ଗ୍ରାମି ପୁରସ୍କାର ମିଳିଲା ।
ଗ୍ରାମି ନୋମିନେସନ୍ ନୋଶିର ମୋଦିଙ୍କ ପାଇଁ ଚଳିତ ବର୍ଷ ମାଇଲଖୁଣ୍ଟ ପ୍ରମାଣିତ ହୋଇଛି । ସେ ପ୍ରଥମ ଥର ଗ୍ରାମିରେ ନୋମିନେଟ୍ ହୋଇଛନ୍ତି । ‘କଶିରା’ ଗୀତରେ ନିଜର ଯୋଗଦାନ ଲାଗି ଶ୍ରେଷ୍ଠ ଗ୍ଲୋବାଲ ମ୍ୟୁଜିକ୍ ପରଫର୍ମାନ୍ସ ବିଭାଗରେ ତାଙ୍କୁ ନୋମିନେଟ୍ କରାଯାଇଛି । ଚଳିତ ଗ୍ରାମି ନୋମିନେସନ୍ରେ ଇତିହାସ ରଚିଛନ୍ତି ବିୟୋନ୍ସ । ତାଙ୍କୁ ସର୍ବାଧିକ ୧୧ ବିଭାଗରେ ନୋମିନେଟ୍ କରାଯାଇଛି । ଏଥିସହିତ କ୍ୟାରିଅର୍ରେ ମୋଟ୍ ୯୯ ଗ୍ରାମି ନୋମିନେସନ୍ରେ ସେ ସ୍ଥାନ ପାଇଛନ୍ତି । ୨୦୨୫, ଫେବ୍ରୁଆରୀ ୨ ତାରିଖରେ ଲସ୍ ଆଞ୍ଜେଲସଠାରେ ଗ୍ରାମି ପୁରସ୍କାର ଉତ୍ସବ ଆୟୋଜିତ ହେବ । ଏହି ସମ୍ମାନାସ୍ପଦ ପୁରସ୍କାର ପାଇଁ ସମଗ୍ର ବିଶ୍ୱର ପ୍ରତିଷ୍ଠିତ କଳାକାରମାନେ ପ୍ରତିଯୋଗିତା କରିବେ ।
