ନୂଆଦିଲ୍ଲୀ, ୨୮/୦୨: ଭୂକମ୍ପ ଝଟକାରେ ଥରିଲା ନେପାଳ । ରିକ୍ଟର ସ୍କେଲରେ ଏହାର ତୀବ୍ରତା ୬.୧ ରେକର୍ଡ କରାଯାଇଛି । ଏହାର କେନ୍ଦ୍ରସ୍ଥଳ ନେପାଳ ଥିଲା । ଶୁକ୍ରବାର ବିଳମ୍ୱିତ ରାତି ପ୍ରାୟ ୨ଟା ୫୧ରେ ସିନ୍ଧୁପାଲଚୌକ ଜିଲ୍ଲାର ଭୈରବକୁଣ୍ଡରେ ଭୂମିକମ୍ପ ଅନୁଭୂତ ହୋଇଥିଲା । ଭୂକମ୍ପ ପରେ ସ୍ଥାନୀୟ ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଥିଲା । ଶୁକ୍ରବାର ସକାଳୁ ସକାଳୁ ନେପାଳର ବିଭିନ୍ନ ଅଞ୍ଚଳରେ, ବିଶେଷକରି ପୂର୍ବ ଏବଂ କେନ୍ଦ୍ରୀୟ ଅଞ୍ଚଳରେ ଲୋକମାନେ ଭୂମିକମ୍ପ ଅନୁଭବ କରିଥିବା ସୂଚନା ମିଳିଛି । ଏହି ଭୂକମ୍ପ ଭାରତ ଏବଂ ଚୀନର ସୀମାନ୍ତ ଅଞ୍ଚଳରେ ମଧ୍ୟ ଭୂମିକମ୍ପ ଅନୁଭୂତ ହୋଇଛି । ଆହତ କିମ୍ୱା କ୍ଷୟକ୍ଷତିର କୌଣସି ସୂଚନା ବର୍ତ୍ତମାନ ମିଳିପାରି ନାହିଁ ।
ନେପାଳରେ ଭୂମିକମ୍ପ ହେବା ପରେ ଭାରତରେ ମଧ୍ୟ ଅନୁଭୂତ ହୋଇଥିଲା । ଏହାର ପ୍ରଭାବ ବିହାରର ଅନେକ ଅଞ୍ଚଳରେ ଦେଖିବାକୁ ମିଳିଥିଲା । ଏହା ପରେ ପାକିସ୍ତାନରେ ସକାଳ ୫ଟା ୧୨ରେ ମାଟି ଥରି ଉଠିଥିଲା । ଯାହାର କେନ୍ଦ୍ରସ୍ଥଳ ୧୦ କିଲୋମିଟର ଗଭୀରରେ ରହିଥିଲା । ରିକ୍ଟର ସ୍କେଲରେ ଏହାର ତୀବ୍ରତା ୪.୫ ରେକର୍ଡ କରାଯାଇଛି । ଏହା ପରେ ତିବ୍ବତରେ ମଧ୍ୟ ଭୂକମ୍ପ ଝଟକା ଲାଗିଥିଲା । ରିକ୍ଟର ସ୍କେଲରେ ଏହାର ତୀବ୍ରତା ୪.୧ ରେକର୍ଡ ହୋଇଛି ।
ପୁଣିଥରେ ଭୂମିକମ୍ପ ଝଟକାରେ ପୁଣି ଥରି ଉଠିଛି ପୃଥିବୀ । ପ୍ରତିଦିନ କେଉଁଠି ନା କେଉଁଠି ଭୂମିକମ୍ପର ଝଟକା ଅନୁଭୂତ ହେଉଛି । ଗତକାଲି ଆସାମରେ ଭୂମିକମ୍ପ ଅନୁଭୂତ ହୋଇଥିଲା। ରିକ୍ଟର ସ୍କେଲରେ ଏହାର ତୀବ୍ରତା ୫.୦ ରେକର୍ଡ ହୋଇଥିଲା । ସେହିପରି ଦୁଇଦିନ ପୂର୍ବରୁ ବଙ୍ଗୋପସାଗରରେ ଭୂକମ୍ପର ଝଟକା ଅନୁଭୂତ ହୋଇଥିଲା। ଏହା ଏତେ ଶକ୍ତିଶାଳୀ ଥିଲା ଯେ ଏହା କୋଲକାତା ଏବଂ ଆଖପାଖ ଅଞ୍ଚଳକୁ ଥରାଇ ଦେଇଥିଲା। ତଥାପି କୌଣସି କ୍ଷତିର ଖବର ମିଳିନାହିଁ । ଏହା ପୂର୍ବରୁ ମେରଠ, ଦିଲ୍ଲୀ ଏନସିଆର ଏବଂ ଅନେକ ରାଜ୍ୟରେ ଭୂକମ୍ପ ଝଟକା ଅନୁଭୂତ ହୋଇଥିଲା। ଦିଲ୍ଲୀ-ଏନସିଆରରେ ମଧ୍ୟ ୫.୪ ତୀବ୍ରତାର ଭୂମିକମ୍ପ ଝଟକା ଅନୁଭୂତ ହୋଇଥିଲା । ଯାହା ବେଶ୍ ଶକ୍ତିଶାଳୀ ଥିଲା।
