ବିନିକା,୬।୪ : ବିନିକା ନୂଆବଜାର ଠାରେ ଯାନବାହନ ଯାଞ୍ଚ ବେଳେ ବିନିକା ପୁଲିସ ଏକ ଇନୋଭା ଗାଡି ରୁ ବିପୁଳ ମାତ୍ରା ରେ ଟଙ୍କା ଜବତ କରିଛି । ଉକ୍ତ ଇନୋଭା କାର ଯାହାର ନଂ (ଏପି ୦୫-ଟିସି -୮୧୮୧) କୁ ସନ୍ଦେହ କରି ଚେକିଂ କରିବା ପରେ କାର ଭିତରୁ ୫୫ଲକ୍ଷ ୨୦ହଜାର ଟଙ୍କା ପୁଲିସ ଜବତ କରିଛି। ତେବେ ସାଧାରଣ ନିର୍ବାଚନ ପୂର୍ବରୁ ଏତେ ଟଙ୍କା ଜବତ ହେବା ଘଟଣାକୁ ନେଇ ସାଧାରଣରେ ଆଲୋଚନା ହେଉଥିବା ବେଳେ ପ୍ରକୃତରେ ଉକ୍ତ ଟଙ୍କା କେଉଁ ଉଦ୍ଦେଶ୍ୟରେ ଥିଲା ବୋଲି ତାହା ସ୍ପଷ୍ଟ ହୋଇପାରିନାହିଁ ।
ଗାଡ଼ିରେ ବସିଥିବା ୩ ଜଣ ଉକ୍ତ ଟଙ୍କା ଧରି ଆନ୍ଧ୍ରପ୍ରଦେଶ କାକିନାଡ଼ା ଯାଉଥିଲେ। ଜବତ ୫୫ ଲକ୍ଷ ୨୦ ହଜାର ଟଙ୍କାକୁ ସୋନପୁର ଏସବିଆଇ ବ୍ୟାଙ୍କ ରେ ଜମା କରି ଘଟଣାର ଅଧିକ ତଦନ୍ତ ଚାଲୁ ରଖିଥିବା ପୁଲିସ ସୂତ୍ରରୁ ଜଣାପଡ଼ିଛି। ବିନିକା ଥାନା ତରଫରୁ ଆୟକର ବିଭାଗ ଏବଂ ଜିଲ୍ଲା ଜଣ ଶୁଣାଣୀ କମିଟି କୁ ଏହାର ତଦନ୍ତ କରିବାକୁ ଅନୁରୋଧ କରାଯାଇଛି | ଅନ୍ୟପକ୍ଷରେ ଟଙ୍କା ରଖିଥିବା ବ୍ୟକ୍ତି ମାନଙ୍କ ପ୍ରତିକ୍ରିୟା ନେବାରୁ ସିଂଘିଯୁବା ଠାରେ ଥିବା ତାଙ୍କର ୪ ଏକର ୬୦୦ଡିସମିଲ ଜମି ବିକ୍ରୀ ଟଙ୍କା ବୋଲି ସେମାନେ କହିଛନ୍ତି | ଏହି ଚଢ଼ାଉ ବେଳେ ଏଏସଡିପିଓ ପ୍ରତାପ ତ୍ରିପାଠୀ, ବିନିକା ଥାନା ଅଧିକାରୀ ସରଙ୍ଗାଧର ପାଣିଗ୍ରାହୀ ଙ୍କ ନେତୃତ୍ୱ ରେ ପୁଲିସ କର୍ମଚାରୀ ସାମିଲ ଥିଲେ |
