ବିନିକା/କୌଡିଆମୁଣ୍ଡା, ୦୭/୦୮ : ସୋନପୁର ବିଧାୟକଙ୍କ ପିଏସ୍ଓ ମନୋଜ ଝାଙ୍କର ଓ ତାଙ୍କ କାକା ପୁଅ ଭାଇ ଶେଷଦେବ ଝାଙ୍କର ମୁଣ୍ଡରେ ଗୁଳିବାଜି ଉଭୟେ ପ୍ରାଣ ହରାଇଛନ୍ତି । ଘଟଣାସ୍ଥଳରେ ମନୋଜଙ୍କ ସର୍ଭିସ ରିଭଲଭର ଓ ଏକ ଅଫୁଟା ଗୁଳି ପଡ଼ିଥିବା ବେଳେ କେଉଁ ପରିସ୍ଥିତିରେ ଗୁଳି ଫୁଟିଲା? କିଏ କାହିଁକି ଗୁଳି ଚଳାଇଲା ତାହା ଜଣାପଡ଼ିନାହିଁ । ଖବରପାଇ ବିନିକା ପୁଲିସ ଘଟଣାସ୍ଥଳରୁ ଉଭୟଙ୍କ ମୃତ ଦେହ ଉଦ୍ଧାରକରି ବ୍ୟବଚ୍ଛେଦ ପାଇଁ ପଠାଇଛି । ସୁବର୍ଣ୍ଣପୁର ଏସପି ୟସ ପ୍ରତାପ ଶ୍ରୀମଲ ଘଟଣାସ୍ଥଳକୁ ପହଞ୍ଚି ତଦନ୍ତ କରୁଥିବା ବେଳେ ରାତି ୯ଟାରେ ଉତ୍ତରାଞ୍ଚଳ ଆଇଜି ହିମାଂଶୁ ଲାଲ ବିନିକା ପହଞ୍ଚିଛନ୍ତି ।
ଅପରପକ୍ଷେ ଘଟଣା ସମ୍ପର୍କରେ କେହି ମଧ୍ୟ ମୁହଁ ଖୋଲୁ ନାହାନ୍ତି । ଏଣେ ପୁଲିସ ସମ୍ପୃକ୍ତି ରହୁଥିବାରୁ ଏନେଇ ପୁଲିସ ମଧ୍ୟ କୌଣସି ସୂଚନା ଦେବାକୁ ମନା କରିଛି । ଗ୍ରାମବାସୀଙ୍କ ସୂତ୍ରରୁ ମିଳିଥିବା ସୂଚନା ଅନୁସାରେ, ସୋନପୁର ବିଧାୟକ ନିରଞ୍ଜନ ପୂଜାରୀଙ୍କ ପିଏସ୍ଓ ମନୋଜ ରାମପୁରଠାରେ ବିଧାୟକଙ୍କ ସହିତ ରହିଯାଆନ୍ତି । ରାମପୁରଠାରୁ ତାଙ୍କ ଘର ଚୁଲିମାଳ ମାତ୍ର ୧୦ କିଲୋମିଟର ହୋଇଥିଲେ ହେଁ ବିଧାୟକଙ୍କ ସୁରକ୍ଷାରେ ନିୟୋଜିତ ହୋଇଥିବାରୁ ସେ ସେଠାରେ ରହିଯାଉଥିବା ଗ୍ରାମବାସୀ କହିଛନ୍ତି । ତେବେ ସୋମବାର ସନ୍ଧ୍ୟାରେ ସେ ନିଜ ଘର ଚୁଲିମାଳକୁ ଯାଇଥିଲେ । ଗତକାଲି ସକାଳେ ମନୋଜ, ତାଙ୍କ କକାପୁଅ ଭାଇ ଶେଷଦେବଙ୍କ ସମେତ ଆଉ ୪ଜଣ ବନ୍ଧୁଙ୍କୁ ମିଶାଇ ମୋଟ ୬ଜଣ ଏକ ପାର୍ଟି ଆୟୋଜନ କରିବାକୁ ଯୋଜନା କରିଥିଲେ । ଯୋଜନା ମୁତାବକ ଗାଁର ମୁଣ୍ଡରେ ଥିବା ଏକ କୁକୁଡ଼ା ଫାର୍ମ ନିକଟସ୍ଥ ଖୋଲା ପଡ଼ିଆରେ ଭୋଜିଭାତ ହୋଇଥିଲା । ବର୍ଷାଦିନ ଯୋଗୁ ସେଠାରେ ରନ୍ଧାରନ୍ଧି ନକରି ବାହାରୁ ଖାଦ୍ୟ ଆଣି ଖାଇଥିଲେ । ସେଲିବ୍ରେସନ୍ର ଆସର ସନ୍ଧ୍ୟାଯାଏଁ ଚାଲିଥିଲା । ତେବେ ମନୋଜ ପୁଲିସ କନେଷ୍ଟବଳ ହୋଇଥିବାରୁ ଗ୍ରାମର କେହି ସେ ଆଖପାଖ ଯାଇନଥିଲେ । ପରେ ସନ୍ଧ୍ୟା ପ୍ରାୟ ସାଢେ ୫ଟାରେ ଗାଁ ପଡ଼ିଆରେ ମନୋଜ ଏବଂ ଶେଷଦେବଙ୍କ ରକ୍ତ ଜୁଡୁବୁଡୁ ମୃତଦେହ ପଡିଥିବା ଖବର ମିଳିଥିଲା । ଏହି ଘଟଣା ପ୍ରଘଟ ହେବାପରେ ସେଠାରେ ଗ୍ରାମବାସୀଙ୍କ ଭିଡ଼ ଲାଗିଥିଲା । ଖବରପାଇ ବିନିକା ପୁଲିସ ପହଞ୍ଚି ଏକ ଆମ୍ବୁଲାନ୍ସ ଯୋଗେ ଉଭୟଙ୍କୁ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଉଦ୍ଧାରକରି ସନ୍ଧ୍ୟା ପ୍ରାୟ ୭ଟା ସମୟରେ ବିନିକା ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲା । ଉଭୟଙ୍କ ମୁଣ୍ଡରେ ଗୁଳି ବାଜିଥିବା ବେଳେ ସେମାନେ ଘଟଣାସ୍ଥଳରେ ପ୍ରାଣ ହରାଇଥିଲେ । ଡାକ୍ତର ଉଭୟଙ୍କୁ ମୃତ ଘୋଷଣା କରି ଶବ ବ୍ୟବଚ୍ଛେଦ ପାଇଁ ରଖିଛନ୍ତି ।
ଆଜି ସକାଳେ ସେମାନଙ୍କ ଶବ ବ୍ୟବଚ୍ଛେଦ ହେବ ବୋଲି ଜଣାପଡ଼ିଛି । ଅପରପକ୍ଷେ ଉଭୟ ମନୋଜ ଓ ଶେଷଦେବଙ୍କ ପରିବାର ସଦସ୍ୟଙ୍କୁ ଗୋଟିଏ କୋଠାରୀରେ ରଖି ପୁଲିସ ସେଠାରେ ପଇଁତରା ମାରୁଛି । ଗୁଳିକାଣ୍ଡ ପରେ ପୁଲିସ ଦୁଇଜଣ ବ୍ୟକ୍ତିଙ୍କୁ ଥାନାରେ ଅଟକରଖି ପଚରାଉଚୁରା ଚଳାଇଛି । ରାତି ପ୍ରାୟ ୯ଟା ସମୟରେ ଉତ୍ତରାଞ୍ଚଳ ଆଇଜି ହିମାଂଶୁ ଲାଲ ବିନିକା ଥାନାକୁ ପହଞ୍ଚି ଘଟଣାର ଅନୁଧ୍ୟାନ କରିଛନ୍ତି । ଅପରପକ୍ଷେ ଆଖପାଖ ଗ୍ରାମବାସୀଙ୍କଠାରୁ ମିଳିଥିବା ସୂଚନା ଅନୁସାରେ, ଝାଙ୍କର ପରିବାରରେ କୌଣସି ବିବାଦ ନଥିଲା । ଜମିଜମା ସମ୍ପର୍କିତ କୌଣସି ଗଣ୍ଡଗୋଳ ମଧ୍ୟ କେହି କେବେ ଜାଣିନଥିବା କହିଛନ୍ତି । ତେବେ ଉଭୟେ ଅଳ୍ପ ବୟସର ହୋଇଥିବାରୁ କୌଣସି ପ୍ରେମ କାରବାରକୁ ନେଇ ଉଚ୍ଚବାଚ ପରେ ଏଭଳି କାଣ୍ଡ ଘଟିଥିବା ଚର୍ଚ୍ଚା ହେଉଛି । ତେବେ ଘଟଣାର ତଦନ୍ତ ଚାଲିଛି ଏବଂ ତଦନ୍ତରେ ଯେଭଳି ବ୍ୟାଘାତ ନହେବ ତାହାକୁ ଦୃଷ୍ଟିରେ ରଖି କୌଣସି ସୂଚନା ଦେବାକୁ ପୁଲିସ ଆଇଜି ଶ୍ରୀ ଲାଲ ମନା କରିଛନ୍ତି ।
