ବିନିକା, ୨୬/୭ : ବ୍ଲକ ପରିସରରେ ସରପଞ୍ଚଙ୍କୁ ମରଣାନ୍ତକ ଆକ୍ରମଣ । ଏଭଳି ଏକ ଅଭାବନୀୟ ଘଟଣା ଘଟିଛି ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ପରିସରରେ । ଗୁରୁତର ସରପଞ୍ଚ ହେଲେ ଈଛାପୁର ସରପଞ୍ଚ ପ୍ରଶାନ୍ତ ସାହୁ ।
ସୂଚନା ଅନୁଯାୟୀ, ସରପଞ୍ଚ ପ୍ରଶାନ୍ତ ସାହୁ ବ୍ଲକକୁ କିଛି କାମ ପାଇଁ ଆସି ଗାଡ଼ିଟି ବିଡିଓଙ୍କ ବାସଭବନ ଆଗରେ ଅଟକାଇଥିଲେ । ସେହି ସମୟରେ ଏକ ମୋଟରସାଇକେଲରେ ଦୁଇ ଜଣ ଯୁବକ ଏକ ଧାରୁଆ ଅସ୍ତ୍ର ଓ ଏକ ଲୁହା ପାଇପ୍ ଧରି ପ୍ରଥମେ ସରପଞ୍ଚଙ୍କ କାର୍ ଡୋର କାଚ ଭାଙ୍ଗି ଦେଇଥିଲେ । ତା’ପରେ ଦୁର୍ବୃତ୍ତମାନେ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ l
ସରପଞ୍ଚ ପ୍ରଶାନ୍ତ ସାହୁଙ୍କ ମୁଣ୍ଡରେ ଓ ହାତରେ ଗଭୀର ଆଘାତ ଲାଗିଛି । ସେଠୁ ସେ ସଙ୍ଗେ ସଙ୍ଗେ ଦଉଡ଼ି ଦଉଡ଼ି ବ୍ଲକ ଅଫିସ ଭିତରକୁ ପଶିଯାଇଥିଲେ । ପରେ ସେଠାରୁ ଦୁର୍ବୃତ୍ତମାନେ ଫେରାର ହୋଇଯାଇଥିଲେ । ସଙ୍ଗେ ସଙ୍ଗେ ସ୍ଥାନୀୟ ଲୋକେ ସରପଞ୍ଚ ପ୍ରଶାନ୍ତ ସାହୁଙ୍କୁ ଉଦ୍ଧାର କରି ଡୁଙ୍ଗୁରିପାଲି ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରକୁ ନେଇ ଯାଇଥିଲେ । ସେଠାରେ ତାଙ୍କର ପ୍ରାଥମିକ ଚିକିତ୍ସା କରି ଅବସ୍ଥା ଗୁରୁତର ଥିବାରୁ ବୁର୍ଲା ଡ଼ାକ୍ତରଖାନାକୁ ୧୦୮ଆମ୍ବୁଲାନ୍ସ ଯୋଗେ ସ୍ଥାନାନ୍ତର କରି ଦିଆଯାଇଛି l ଏ ନେଇ ଡୁଙ୍ଗୁରିପାଲି ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଥିବା ଜଣାପଡ଼ିଛି l