ସୁନ୍ଦରଗଡ଼,୦୧/୦୮:ସୁନ୍ଦରଗଡ଼ ଜିଲ୍ଲାର ଆଦିବାସୀ ଅଧ୍ୟୁଷିତ ଛାତ୍ରଛାତ୍ରୀଙ୍କୁ ପ୍ରୋତ୍ସାହିତ କରିବା ପାଇଁ ରହିଥିବା ଷ୍ଟାଇପେଣ୍ଡ ବ୍ୟବସ୍ଥାର କରୁଣ ଚିତ୍ର ସାମ୍ନାକୁ ଆସିଛି । ସରକାର ଅନୁଦାନ ଦେଇ ନ ଥିବାରୁ ପ୍ରି-ମାଟ୍ରିକ୍ ଓ ପୋଷ୍ଟ ମାଟ୍ରିକ୍ର ପ୍ରାୟ ୫୦ ହଜାର ଛାତ୍ରଛାତ୍ରୀ ଷ୍ଟାଇପେଣ୍ଡ ପାଇନାହାନ୍ତି । ଘରୋଇ ଶିକ୍ଷାନୁଷ୍ଠାନର ଛାତ୍ରଛାତ୍ରୀ ପାଉଥିବା ଷ୍ଟାଇପେଣ୍ଡ ବ୍ୟବସ୍ଥା ଉଚ୍ଛେଦ ହୋଇଥିବାରୁ ଅନ୍ୟୁନ ୧୩ ହଜାର ଛାତ୍ରଛାତ୍ରୀ ଏଥିରୁ ବାଦ୍ ପଡ଼ିବେ ।
ସରକାର ଗରିବ ଆଦିବାସୀ ଛାତ୍ରଛାତ୍ରୀଙ୍କୁ ମାଗଣାରେ ପାଠ ପଢ଼ାଇବା ସହ ଷ୍ଟାଇପେଣ୍ଡ ପ୍ରଦାନ କରି ଆସୁଥିଲେ । ଗତ ଶିକ୍ଷା ବର୍ଷରୁ ଏହି ଷ୍ଟାଇପେଣ୍ଡ ବନ୍ଦ ହୋଇଯାଇଛି । ଫଳରେ ବିଭିନ୍ନ ଘରୋଇ ଶିକ୍ଷାନୁଷ୍ଠାନରେ ପାଠ ପଢ଼ୁଥିବା ଆଦିବାସୀ ଛାତ୍ରଛାତ୍ରୀ ନିରାଶ ହେଉଛନ୍ତି । ଘରୋଇ ଶିକ୍ଷାନୁଷ୍ଠାନରେ ଆଦିବାସୀ ଛାତ୍ରଛାତ୍ରୀଙ୍କୁ ସରକାରଙ୍କ ଷ୍ଟାଇପେଣ୍ଡ ବ୍ୟବସ୍ଥା ଥିବା ବେଳେ ଅଧିକରୁ ଅଧିକ ପିଲା ନାମ ଲେଖାଉଥିଲେ । ମାତ୍ର ବର୍ତ୍ତମାନ ସରକାର ଏହି ବ୍ୟବସ୍ଥା ବନ୍ଦ କରିଥିବାରୁ ଘରୋଇ ଶିକ୍ଷାନୁଷ୍ଠାନ ପ୍ରତି ଛାତ୍ରଛାତ୍ରୀ ଓ ସେମାନଙ୍କ ଅଭିଭାବକମାନେ ବିମୁଖ ହେଉଛନ୍ତି ।
ସୂଚନାଯୋଗ୍ୟ, ୨୦୨୪-୨୫ ଶିକ୍ଷାବର୍ଷ ପାଇଁ ସୁନ୍ଦରଗଡ଼ ଜିଲ୍ଲାରେ ପୋଷ୍ଟ ମାଟ୍ରିକ୍ର ୪୮,୭୦୭ ଛାତ୍ରଛାତ୍ରୀ ଷ୍ଟାଇପେଣ୍ଡ ପାଇବା ଲାଗି ଆବେଦନ କରିଥିଲେ । କାଗଜ ପତ୍ର ଠିକ୍ ନ ଥିବାରୁ ୧୬୨୩ ଜଣଙ୍କ ଆବେଦନ ଫର୍ମ ନାକଚ ହୋଇଯାଇଥିଲା । ୪୭ ହଜାର ୮୪ ଛାତ୍ରଛାତ୍ରୀ ଷ୍ଟାଇପେଣ୍ଡ ପାଇବା ଲାଗି ଯୋଗ୍ୟ ବିବେଚିତ ହୋଇଥିଲେ । ଇତିମଧ୍ୟରେ ୨୦୨୪- ୨୫ ଶିକ୍ଷା ବର୍ଷଶେଷ ହେଲାଣି । କିନ୍ତୁ ଯୋଗ୍ୟ ବିବେଚିତ ଛାତ୍ରଛାତ୍ରୀଙ୍କୁ ଷ୍ଟାଇପେଣ୍ଡ ମିଳିନାହିଁ ।
ସେହିପରି ସରକାରୀ ମହାବିଦ୍ୟାଳୟ ଓ ବିଦ୍ୟାଳୟରେ ପ୍ରି-ମାଟ୍ରିକ ପଢ଼ୁଥିବା ୩୩,୯୫୦ ଜଣଙ୍କୁ ଷ୍ଟାଇପେଣ୍ଡ ପ୍ରଦାନ କରାଯାଇଛି । ଘରୋଇ ଶିକ୍ଷାନୁଷ୍ଠାନରେ ପଢ଼ୁଥିବା ୧୩,୧୩୪ ଜଣଙ୍କୁ ଏପର୍ଯ୍ୟନ୍ତ ପ୍ରୋତ୍ସାହନ ରାଶି ମିଳିପାରିନାହିଁ । ପ୍ରି-ମାଟ୍ରିକ ଷ୍ଟାଇପେଣ୍ଡ ଲାଗି ୨୨,୭୭୩ ଜଣ ଆବେଦନ କରିଥିଲେ । ସେମାନଙ୍କ କାଗଜପତ୍ର ଯାଞ୍ଚ ପରେ ୨୧,୮୨୨ ଜଣ ଷ୍ଟାଇପେଣ୍ଡ ପାଇବା ପାଇଁ ଯୋଗ୍ୟ ବିବେଚିତ ହୋଇଛନ୍ତି । ଯୋଗ୍ୟ ବିବେଚିତ ୨୧,୮୨୨ ଜଣଙ୍କ ମଧ୍ୟରୁ ୨୦୨୪-୨୫ ଶିକ୍ଷାବର୍ଷରେ ୧୮,୭୪୬ ଜଣଙ୍କୁ ଷ୍ଟାଇପେଣ୍ଡ ମିଳିଛି । ୩ ହଜାର ୮୬ ଜଣ ଛାତ୍ରଛାତ୍ରୀ ଏବେ ବି ଅପେକ୍ଷାରେ ରହିଛନ୍ତି ।
୨୦୨୪-୨୫ ଶିକ୍ଷାବର୍ଷ ଶେଷ ହୋଇ ନୂତନ ଶିକ୍ଷାବର୍ଷ ୨୦୨୫-୨୬ ଆରମ୍ଭ ହୋଇଯାଇଛି । ସରକାର ଗତ ଶିକ୍ଷାବର୍ଷର ଷ୍ଟାଇପେଣ୍ଡ ଦେଇ ପାରି ନ ଥିବାରୁ ନୂତନ ଶିକ୍ଷା ବର୍ଷର ଷ୍ଟାଇପେଣ୍ଡ ପାଇବା ପାଇଁ ଆବେଦନ ନିମନ୍ତେ ସରକାରୀ ୱେବ୍ସାଇଟ୍ ଖୋଲି ନାହିଁ । ଛାତ୍ରଛାତ୍ରୀ ଷ୍ଟାଇପେଣ୍ଡ ଲାଗି ଆବେଦନ କରି ପାରୁନାହାନ୍ତି । ବହୁ ବର୍ଷ ପରେ ରାଜ୍ୟରେ ଷ୍ଟାଇପେଣ୍ଡ ଦେବାରେ ସରକାର ବିଳମ୍ବ କରିଥିବା ନେଇ ଛାତ୍ରଛାତ୍ରୀ ମହଲରେ ଚର୍ଚ୍ଚା ହେଉଛି । ଛାତ୍ରଛାତ୍ରୀଙ୍କୁ ଷ୍ଟାଇପେଣ୍ଡ ଏଯାଏ କାହିଁକି ମିଳିନି ବୋଲି ଜିଲ୍ଲା ମଙ୍ଗଳ ଅଧିକାରୀ ଭାଗିରଥୀ ପଟେଲଙ୍କୁ ପଚରାଯିବାରେ ସେ କହିଲେ ସରକାର ଟଙ୍କା ଦେଇନାହାନ୍ତି³ ଆମେ କେଉଁଠୁ ଆଣି ଦେବୁ । ସରକାର ଦେଲେ ଆମେ ଛାତ୍ରଛାତ୍ରୀଙ୍କ ଆକାଉଣ୍ଟରେ ଟଙ୍କା ଜମା କରିବୁ ବୋଲି ସେ ପ୍ରକାଶ କରିଛନ୍ତି ।
