ନୂଆଦିଲ୍ଲୀ: ଶୁକ୍ରବାର ପାକିସ୍ତାନର ଅଶାନ୍ତ ବାଲୁଚିସ୍ତାନ ପ୍ରଦେଶରେ ଏକ ରିମୋଟ ଚାଳିତ ବୋମା ବିସ୍ଫୋରଣ ଘଟିଛି। ବିସ୍ଫୋରଣରେ ୫ ଜଣ ସ୍କୁଲ ଛାତ୍ର ଏବଂ ଜଣେ ପୋଲିସ କର୍ମୀଙ୍କ ସମେତ ଅତି କମ୍ରେ ୭ ଜଣଙ୍କ ମୃତ୍ୟୁ ହୋଇଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ପ୍ରଦେଶର ମାସ୍ଟୁଙ୍ଗ ଜିଲ୍ଲାର ସିଭିଲ୍ ହସ୍ପିଟାଲ୍ ଛକରେ ଅବସ୍ଥିତ ଏକ ବିଦ୍ୟାଳୟ ନିକଟରେ ସକାଳ ୮.୩୫ ସମୟରେ ଏହି ବିସ୍ଫୋରଣ ଘଟିଛି । କାଲାଟ ଡିଭିଜନ କମିଶନର ଏନେଇ ସୂଚନା ଦେଇଛନ୍ତି । ରିପୋର୍ଟରେ କୁହାଯାଇଛି ଯେ ଏକ ମୋଟର ସାଇକେଲରେ IED ଲଗାଯାଇଥିବା ଜଣାପଡିଛି । ଏହା ପୋଲିସ ମୋବାଇଲ୍ ଗାଡି ନିକଟରେ ବିସ୍ଫୋରଣ ହୋଇଥିଲା।
କମିଶନର ବଜାଇ କହିଛନ୍ତି ଯେ, ଏପର୍ଯ୍ୟନ୍ତ ୭ ଜଣଙ୍କର ମୃତ୍ୟୁ ହୋଇଛି । ଏଥି ମଧ୍ୟରେ ପାଞ୍ଚ ଜଣ ସ୍କୁଲ ଛାତ୍ର ମଧ୍ୟ ଅଛନ୍ତି। ଏହି ଆକ୍ରମଣରେ ଅତି କମରେ ୨୨ ଜଣ ଆହତ ହୋଇଛନ୍ତି । ଆହତ ମାନଙ୍କ ମଧ୍ୟରୁ ଅଧିକାଂଶ ସ୍କୁଲ ପିଲା, ଯେଉଁମାନେ ନିକଟସ୍ଥ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ଏହି ବିସ୍ଫୋରଣରେ ପୋଲିସ ଗାଡି ଏବଂ ଅନେକ ଅଟୋ-ରିକ୍ସା କ୍ଷତିଗ୍ରସ୍ତ ହୋଇଛି।
ଏହି ସମୟରେ, ପ୍ରାଦେଶିକ ସ୍ୱାସ୍ଥ୍ୟ ବିଭାଗର ମୁଖପାତ୍ର କହିଛନ୍ତି ଯେ ବିସ୍ଫୋରଣ ପରେ କ୍ୱେଟାର ସମସ୍ତ ଡାକ୍ତରଖାନାରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି। ସମସ୍ତ ଡାକ୍ତର,ଫାର୍ମାସିଷ୍ଟ,ଷ୍ଟାଫ୍ ନର୍ସ ଏବଂ ଅନ୍ୟାନ୍ୟ ଡାକ୍ତରୀ କର୍ମଚାରୀଙ୍କୁ ସଜାଗ ରଖାଯାଇଛି।
