ଫୁଲବାଣୀ,୧୪/୦୮: କନ୍ଧମାଳ ଜିଲ୍ଲାର ତିନିଶହରୁ ବେଶୀ ଗାଁ ଦେଖିନାହାନ୍ତି ବିଦ୍ୟୁତ ଆଲୋକ । ବିଶେଷ କରି ଦୁର୍ଗମ ଅଞ୍ଚଳରେ ରହିଛି ସର୍ବାଧିକ ସମସ୍ୟା । ପାହାଡ଼ ଜଙ୍ଗଲ ମଧ୍ୟରେ ରହିଥିବା ଏହିସବୁ ଗାଁରେ ସଞ୍ଜ ନଇଁଲେ ମାଡ଼ି ଆସେ ଅନ୍ଧାର । ବନ୍ୟଜନ୍ତୁଙ୍କ ଭୟରେ ବିତେ ରାତି । ଏପଟେ ବିଦ୍ୟୁତ୍ ଅଭାବରୁ ମୋବାଇଲ୍ ସେବା ଠାରୁ ଆରମ୍ଭ କରି ସମସ୍ତ ପ୍ରକାର ଅନ୍ଲାଇନ୍ କାମ ପାଇଁ ସମସ୍ୟାର ସମ୍ମୁଖୀନ ହେବାକୁ ପଡୁଛି ।
ସ୍ୱାଧୀନତାର ୭୮ ବର୍ଷ ପରେ ମଧ୍ୟ କନ୍ଧମାଳ ଜିଲ୍ଲାର ଏଭଳି ଅବସ୍ଥା । ଜିଲ୍ଲାରେ ୧୭୧ଟି ପଞ୍ଚାୟତରେ ରହିଛି ୨୫୯୯ ଗ୍ରାମ । ଏଥି ମଧ୍ୟରୁ ୩୪୨ଟିରେ ପହଞ୍ଚି ପାରିନି ବିଦ୍ୟୁତ୍ ଆଲୋକ । ବିଶେଷ କରି ବାଲିଗୁଡା, କୋଟଗଡ, ତୁମୁଡ଼ିବନ୍ଧ, ଦାରିଙ୍ଗବାଡ଼ି ବ୍ଲକରେ ରହିଛି ସର୍ବାଧିକ ସମସ୍ୟା । ଜିଲ୍ଲାର ଫୁଲବାଣୀ ଓ ଜି.ଉଦୟଗିରିରେ ୧୩୨ କେଭି କ୍ଷମତା ବିଶିଷ୍ଟ ଦୁଇଟି ବିଦ୍ୟୁତ ଗ୍ରୀଡ୍ ରହିଛି । ଦାରିଙ୍ଗବାଡ଼ି ନିକଟବର୍ତ୍ତୀ ସିର୍ତ୍ତିଗୁଡ଼ାରେ ପ୍ରାୟ ୧୦୦ କୋଟି ଟଙ୍କା ବ୍ୟୟରେ ୨୨୦ କେଭି କ୍ଷମତା ବିଶିଷ୍ଟ ଗ୍ରୀଡ୍ ନିର୍ମିତ ହୋଇ ୬ ବର୍ଷ ବିତିଥିଲେ ମଧ୍ୟ ଏହା କାର୍ଯ୍ୟକ୍ଷମ ହୋଇ ପାରିନାହିଁ । ଜଙ୍ଗଲ ବିଭାଗ ଅନୁମତି ମିଳୁ ନଥିବାରୁ ଟାୱାର ନିର୍ମାଣ କାମ ଅଟକି ରହିଛି । ଅନ୍ୟ ପକ୍ଷରେ ବିଦ୍ୟୁତ୍କରଣ ହୋଇ ନ ଥିବା ସମସ୍ତ ଗ୍ରାମକୁ ବିଦ୍ୟୁତ ସଂଯୋଗ ପାଇଁ ଜିଲ୍ଲା ପ୍ରଶାସନ ପକ୍ଷରୁ ଯୋଜନା କରାଯାଇଛି । ଏଥିପାଇଁ ସରକାରଙ୍କ ନିକଟକୁ ୩୦ କୋଟି ଟଙ୍କାର ଏକ ଡିପିଆର ପଠା ଯାଇଥିବା ସୂଚନା ଦେଇଛନ୍ତି ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ ଶମ୍ଭୁନାଥ ନନ୍ଦୀ । ଏହି ପ୍ରସ୍ତାବ ଗୃହୀତ ହେଲେ ବିଦ୍ୟୁତ୍କରଣ କାର୍ଯ୍ୟ ଆରମ୍ଭ ହେବ ବୋଲି ସେ କହିଛନ୍ତି ।
ସୂଚନାଯୋଗ୍ୟ, ଫୁଲବାଣୀ ଡିଭିଜନ ଅଧୀନରେ ବିଦ୍ୟୁତ ସଂଯୋଗ ହୋଇଥିବା ଘର ସଂଖ୍ୟା ୧ ଲକ୍ଷ ୬୭ ହଜାର । ଆବଶ୍ୟକତା ଅନୁଯାୟୀ ବିଦ୍ୟୁତ୍ ଶକ୍ତି ଅଭାବରୁ ଅନେକ ସ୍ଥାନରେ ଲୋ ଭାଲଟେଜ୍ ସମସ୍ୟା ରହୁଛି । ଏହାର ସମାଧାନ ପାଇଁ ନୂତନ ଗ୍ରୀଡ୍ ସ୍ଥାପନର ଆବଶ୍ୟକତା ରହିଥିବା କୁହାଯାଉଛି । ଏପଟେ କନ୍ଧମାଳ ଜିଲ୍ଲାରେ ବିକଳ୍ପ ଶକ୍ତି ଉପଯୋଗ ପାଇଁ କେନ୍ଦ୍ର ସରକାରଙ୍କ ମହତ୍ୱକାଂକ୍ଷୀ ସୂର୍ଯ୍ୟଘର ଯୋଜନାର ଅଗ୍ରଗତି ନିରୁତ୍ସାହ ଜନକ ରହିଛି । ବିଦ୍ୟୁତ୍ ବିଭାଗର ସୂଚନା ଅନୁସାରେ ସମଗ୍ର ଜିଲ୍ଲାରେ ଆଜି ପର୍ଯ୍ୟନ୍ତ ମାତ୍ର ୧୨ଟି ଘରକୁ ଏହି ଯୋଜନାରେ ସାମିଲ କରାଯାଇଛି । ଡିଭିଜନ ପାଇଁ ଲକ୍ଷ୍ୟ ରହିଛି ୧୦ ହଜାର । ବିଭାଗୀୟ ଅଧିକାରୀଙ୍କ କହିବା ଅନୁସାରେ ଏହି ଯୋଜନା ପାଇଁ ଆବେଦନ ଆସୁନାହିଁ । ମାଗଣା ବିଜୁଳି ମିଳୁଥିବାରୁ ଆକର୍ଷଣୀୟ ସବ୍ସିଡି ବ୍ୟବସ୍ଥା ଥିବା ସତ୍ତେ୍ୱ ଟଙ୍କା ଖର୍ଚ୍ଚ କରି ସୌର ବିଦ୍ୟୁତ ନେବା ପାଇଁ ଲୋକ ଅନିଚ୍ଛା ପ୍ରକାଶ କରୁଥିବା ପ୍ରକାଶ କରିଛନ୍ତି ଅଧିକାରୀ । ବିଭାଗ ପକ୍ଷରୁ ସଚେତନତା ସୃଷ୍ଟି କରାଯାଉଥିଲେ ମଧ୍ୟ ଲକ୍ଷ୍ୟ ହାସଲ ହେଉନାହିଁ । ବର୍ଷକ ଭିତରେ ଜିଲ୍ଲାରେ ଶତ ପ୍ରତିଶତ ବିଦ୍ୟୁତ ସଂଯୋଗୀକରଣ ପାଇଁ ଲକ୍ଷ୍ୟ ରଖା ଯାଇଥିବା କହିଛନ୍ତି ବିଭାଗୀୟ ନିର୍ବାହୀ ଯନ୍ତ୍ରୀ ମାନସ ରଞ୍ଜନ ମହାରଣା ।
