ମାଲକାନଗିରି/ଚିତ୍ରକୋଣ୍ଡା, ୨୭/୬ :  ଏକ ଦୋକାନରୁ ମୋବାଇଲ ଚୋରି ଅଭିଯୋଗରେ ୩ଜଣ ପୋଲିସ ହାତରେ ଧରାପଡିଛି। ସେମାନଙ୍କ ମଧ୍ୟରେ ୨ଜଣ ନାବାଳକ ଅଛନ୍ତି। ୨୬ଟି ମୋବାଇଲ ପୋଲିସ ଜବତ  କରିଛି। 

 ମାଲକାନଗିରି ଜିଲ୍ଲା ଚିତ୍ରକୋଣ୍ଡା ଦୈନିକ ବଜାରରୁ ମଙ୍ଗଳବାର ରାତିରେ ଗୋଟିଏ ମୋବାଇଲ ଦୋକାନରୁ ୩୦ରୁ ଅଧିକ ମୋବାଇଲ ଚୋରି ହୋଇଥିଲା । ଚିତ୍ରକୋଣ୍ଡା ଥାନା ଅଧୀନରେ ଚିତ୍ରକୋଣ୍ଡା ଦୈନିକ ବଜାରର ମୁଖ୍ୟ ଛକଠାରେ ଥିବା ସଞ୍ଜୟ ଥାପା ମୋବାଇଲ ଦୋକାନରୁ ମୁଖ୍ୟ ଗେଟ୍ ଦୁଇଟି ଚାବି ଭାଙ୍ଗି ପଶିଥିଲେ ଚୋରମାନେ। ୩୦ଟି ଦାମୀ ମୋବାଇଲ ସହ ବିଭିନ୍ନ ସ୍ପେୟାର ପାର୍ଟସ ନେଇଯାଇଥିଲେ।  ସିସିଟିଭି ଫୁଟେଜ୍ ଆଧାରରେ ପ୍ରାଥମିକ ତଦନ୍ତରୁ ୩ ଜଣ ପୋଲିସ ହାତରେ ଧରାପଡିଛନ୍ତି ବୋଲି ଚିତ୍ରକୋଣ୍ଡା ଆଇଆଇସି ମୁକୁନ୍ଦ ମେଳକା ସୂଚନା ଦେଇଛନ୍ତି। ଅଭିଯୁକ୍ତମାନଙ୍କ ନିକଟରୁ ୨୬ଟି ମୋବାଇଲ ଜବତ କରାଯାଇଥିବା ପୁଲିସ ସୂଚନା ଦେଇଛି। ସେମାନଙ୍କ ମଧ୍ୟରେ ଦୁଇଜଣ ନାବାଳକ ଥିବାବେଳେ ଅନ୍ୟ ଜଣେ ହସିନି ସାଗର (୨୧) ବୋଲି ଜଣାପଡ଼ିଛି। ସମସ୍ତେ ଚିତ୍ରକୋଣ୍ଡା ଅଞ୍ଚଳର। ଚିତ୍ରକୋଣ୍ଡା ଥାନାରେ ୧୩୦/୨୪ରେ ଏନେଇ ମାମଲା ରୁଜୁ ହୋଇଛି। ନାବାଳକ ଦୁଇଜଣଙ୍କୁ ଜୁଭେନାଇଲ୍ ଜଷ୍ଟିସ ବୋର୍ଡରେ ହାଜର କରାଯିବ ଓ ଜଣେ ଅଭିଯୁକ୍ତକୁ ଆଜି କୋର୍ଟ ଚାଲାଣ କରାଯାଇଛି ବୋଲି ଆଇଆଇସି ସୂଚନା ଦେଇଛନ୍ତି।