ନୂଆଦିଲ୍ଲୀ, ୩୦/୦୮: ଦିନକ ପରେ ସରିଯିବ ଅଗଷ୍ଟ ମାସ । ତଥାପି ଭଲ ବର୍ଷା ନାହିଁ । ପାଣିପାଗ ବିଭାଗର ଆକଳନ ଅନୁସାରେ, ଆଗାମୀ ୨ ଦିନ ଉତ୍ତରପୂର୍ବର କିଛି ରାଜ୍ୟ ଓ ଦକ୍ଷିଣର କିଛି ଅଞ୍ଚଳକୁ ଛାଡ଼ିଦେଲେ ଅନ୍ୟ ଅଞ୍ଚଳରେ ପ୍ରବଳ ବର୍ଷାର ସମ୍ଭାବନା ନାହିଁ ।
୧୯୦୧ ମସିହାର ଅଗଷ୍ଟ ପରେ ଚଳିତ ଅଗଷ୍ଟ ସବୁଠୁ ଶୁଖିଲା ହେବାକୁ ଯାଉଛି । ମୌସୁମୀ ଦୁର୍ବଳ ରହିଥିବା ବେଳେ ହିମାଚଳ ଓ ଉତ୍ତରାଖଣ୍ଡକୁ ଛାଡ଼ିଦେଲେ ଅଗଷ୍ଟରେ କମ୍ ବର୍ଷା ହୋଇଛି । ଫଳରେ ଅଗଷ୍ଟରେ ହାରାହାରି ତାପମାତ୍ରା ୨୭.୫୫ ଡିଗ୍ରୀ ରହିଛି । ଦିନକ ପରେ ଅଗଷ୍ଟ ମାସ ସରିଲେ ଏହା ଇତିହାସରେ ସବୁଠୁ ତତଲା ଅଗଷ୍ଟ ହେବା ଆଶଙ୍କା କରାଯାଉଛି ।
ସେପ୍ଟେମ୍ବର ପ୍ରଥମ ସପ୍ତାହରେ ଲଘୁଚାପ; ୫, ୬ରେ ପ୍ରବଳ ବର୍ଷା
ଚଳିତ ଅଗଷ୍ଟର ୨୯ ଦିନ ମଧ୍ୟରୁ ୨୫ ଦିନ ସ୍ୱାଭାବିକ ଠାରୁ କମ୍ ବର୍ଷା ହୋଇଛି । ଏବେ ମନସୁନ୍ ବ୍ରେକ୍ ଚାଲିଥିବା ବେଳେ ଅଗଷ୍ଟରେ ସ୍ୱାଭାବିକ ଠାରୁ ୩୩ ପ୍ରତିଶତ କମ୍ ବର୍ଷା ହୋଇଛି । ଯାହା ୩୫ ପ୍ରତିଶତକୁ ବୃଦ୍ଧି ପାଇପାରେ । ଅଗଷ୍ଟ ୨୯ ଯାଏ ଦେଶରେ ୨୪୧ ମିମି ବର୍ଷା ହେଉଥିବା ବେଳେ ଚଳିତ ବର୍ଷ ୧୬୦ ମିମି ବର୍ଷା ହୋଇଛି । ଅର୍ଥାତ୍ ମୌସୁମୀ ବର୍ଷା ୯ ପ୍ରତିଶତ କମ୍ ହୋଇଛି । ଆଗକୁ ସେପ୍ଟେମ୍ବରର ବର୍ଷା ଏହାର ଭରଣା କରିବା ସମ୍ଭବ ନୁହେଁ । ଏମିତି ହେଲେ ବିଗତ ୮ ବର୍ଷରେ ଏହା ସବୁଠୁ କମ୍ ବର୍ଷା ହୋଇଥିବା ମୌସୁମୀ ହେବ ।
ତେବେ ଅଗଷ୍ଟରେ କମ୍ ବର୍ଷାର କାରଣ ଏଲ ନିନୋ ସକ୍ରିୟ ହେବା କୁହାଯାଉଛି । ବିଗତ ୬୫ ବର୍ଷରେ ୧୪ଥର ଏଲ ନିନୋ ପ୍ରଶାନ୍ତ ମହାସାଗରରେ ସକ୍ରିୟ ହୋଇଛି । ଫଳରେ ୯ ଥର ଭାରତରେ ଏହାର ବଡ଼ ପ୍ରଭାବ ପଡ଼ିଛି । ମେଟ୍ରୋଲୋଜି ଆଣ୍ଡ କ୍ଲାଇମେଟ୍ ଚେଞ୍ଜ ସ୍କାଏମେଟର ଅଧ୍ୟକ୍ଷ ଜି.ପି. ଶର୍ମା ୧୯୯୧ ସ୍ଥିତି ୨୦୨୩ରେ ଉପୁଜିବା ଆଶଙ୍କା କରିଛନ୍ତି ।
ପାକିସ୍ତାନରେ ବିଜୁଳି ସଂକଟ, ୟୁନିଟ୍ ପିଛା ୫୬ ଟଙ୍କା
ପାଣିପାଗ ବିଜ୍ଞାନ ଅନୁସାରେ, ୧୦ ପ୍ରତିଶତରୁ କମ୍ ବର୍ଷା ହେଲେ ତାକୁ ସ୍ୱଳ୍ପ ମରୁଡ଼ି କୁହାଯାଏ । ଦେଶରେ ଚାଷ, ନାଳ ଓ ଜଳତ୍ସୋତ ପୂରଣ ପାଇଁ ଆବଶ୍ୟକ ପାଣିର ୭୦ ପ୍ରତିଶତ ବର୍ଷାରୁ ମିଳିଥାଏ । ଅଗଷ୍ଟ ମାସରେ ଦକ୍ଷିଣ, ପଶ୍ଚିମ ଓ ମଧ୍ୟ ଭାରତରେ ବହୁତ କମ୍ ବର୍ଷା ହୋଇଛି । ମୌସୁମୀ ଆରମ୍ଭ ପରେ ଚାଷୀ ଚାଷ ଆରମ୍ଭ କରିଥିବା ବେଳେ ଫସଲ ପ୍ରଭାବିତ ହୋଇଛି । ଗଛର ବୃଦ୍ଧି ଆଶାନୁରୂପ ହୋଇ ନଥିବା ବେଳେ ଉତ୍ପାଦନ ହ୍ରାସ ଆଶଙ୍କା କରିଛନ୍ତି ଚାଷୀ ।
ମୌସୁମୀ ମଡେଲକୁ ଅନୁସରଣ କଲେ, ସେପ୍ଟେମ୍ବର ୪ ପରେ ୧୦ ଦିନ ଯାଏ ଶେଷ ପର୍ଯ୍ୟାୟ ମୌସୁମୀ ବର୍ଷା ହୋଇପାରେ । ଏପରିକି ଦେଶର ପଶ୍ଚମ ଭାଗରୁ ମୌସୁମୀ ସମୟ ପୂର୍ବରୁ ୧୫ ଅଥବା ୧୬ ସେପ୍ଟେମ୍ବର ବେଳକୁ ବିଦାୟ ନେଇପାରେ । ତେବେ ମୌସୁମୀ କେବେ ବିଦାୟ ନେବ ସେ ସ୍ଥିତି ଏବେ ଅନିଶ୍ଚିତ ଥିବା ପାଣିପାଗ ବିଭାଗ କହିଛି । ସାଧାରଣତଃ ପଶ୍ଚିମ ରାଜସ୍ଥାନରୁ ସେପ୍ଟେମ୍ବର ୧୭ ବେଳକୁ ମୌସୁମୀ ବିଦାୟ ନେଇଥାଏ ।
ଓଡ଼ିଶାକୁ ପ୍ରଶଂସା କଲେ ସୁପ୍ରିମ୍କୋର୍ଟ କମିଟି, ସଡ଼କ ଦୁର୍ଘଟଣା କମାଇବାରେ ସଫଳ