ଭୁବନେଶ୍ୱର, ୧୯/୦୩: ଗଞ୍ଜେଇ ଚୋରା ଚାଲାଣ ପାଇଁ ରଖା ଯାଇଥିବା ବେଳେ ମାଡି ବସିଲା ପୋଲିସ। ଯାତ୍ରୀ ବିଶ୍ରାମାଗାର ନିକଟରୁ ଜବତ ହେଲା ୨ କ୍ୱିଣ୍ଟାଲ ୬୨କେଜି ଗଞ୍ଜେଇ । ରାୟଗଡା ଜିଲ୍ଲା ମୁନିଗୁଡା ଥାନା ଅନ୍ତର୍ଗତ ବାଲକାବାଜୁ ଗାଁ ନିକଟରେ ଏଭଳି ଘଟଣା ଦେଖିବାକୁ ମିଳିଛି ।
ସୂଚନା ମୁତାବକ, ମୁନିଗୁଡ଼ା ଥାନା ଅଧିନରେ ଥିବା ଡାଙ୍ଗସୋରଡା ଫାଣ୍ଡିର ଏସଆଇ ନରେଦ୍ର ବେହେରା ପାଟ୍ରୋଲିଂ କରୁଥିଲେ । ପାଟ୍ରୋଲିଂ କରିବା ସମୟରେ ବାଲକାବାଜୁ ଗାଁ ନିକଟରେ ଥିବା ଏକ ଯାତ୍ରୀ ବିଶ୍ରାମାଗାର ନିକଟରେ କିଛି ବସ୍ତା ରଖା ଯାଇଥିବା ଦେଖିଥିଲେ । ବସ୍ତା ଗୁଡ଼ିକ ଦେଖି ସେଥିରେ ଗଞ୍ଜେଇ ଥିବା ସନ୍ଦେହ କରି ତୁରନ୍ତ ମୁନିଗୁଡା ଥାନାକୁ ଖବର ଦେଇଥିଲେ । ଖବର ପାଇ ମୁନିଗୁଡା ଥାନା ଅଧିକାରୀ ସୌଦାମିନୀ ବେହେରାଙ୍କ ନେତୃତ୍ୱରେ ଏକ ଟିମ୍ ଘଟଣା ସ୍ଥଳରେ ପହଞ୍ଚିଥିଲେ । ସେଠାରେ ପହଞ୍ଚି ବସ୍ତା ଗୁଡ଼ିକୁ ଯାଞ୍ଚ କରିବା ବେଳେ ୨୧ଟି ବସ୍ତାରେ ଗଞ୍ଜେଇ ଥିବା ଜାଣିବାକୁ ପାଇଥିଲେ । ଉକ୍ତ ଗଞ୍ଜେଇ ବସ୍ତା ଗୁଡ଼ିକୁ ମୁନିଗୁଡା ଥାନାକୁ ଆଣି ଓଜନ କରିବା ବେଳେ ୨କ୍ୱିଣ୍ଟାଲ ୬୨କେଜି ଗଞ୍ଜେଇ ଥିଲା । ଏହି ଘଟଣାରେ କୌଣସି ଚାଲାଣକାରୀକୁ ଗିରଫ କରାଯାଇନାହିଁ । ତେବେ ଯାତ୍ରୀ ବିଶ୍ରାମାଗାର ନିକଟରେ କିଏ ଏହି ଗଞ୍ଜେଇ ରଖିଥିଲା, ତାହାର ତଦନ୍ତ ଚଲାଇଛି ପୋଲିସ ।
