କାମାକ୍ଷାନଗର, ୨୯/୦୮ : ଗାଈ ଗୋଠ ଉପରେ ଚଢିଗଲା ଅଜଣା ଗାଡ଼ି। ୧୨ ଗାଈ ମୃତ ୪ ଆହତ। ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ୫୩ ନଂ ଜାତୀୟ ରାଜପଥ ବାରିହାପୁର ଛକ ନିକଟରେ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି। 

ସୂଚନାନୁଯାୟୀ, ବୁଧବାର ବିଳମ୍ଵିତ ରାତିରେ ବାରିହାପୁର ଛକ ରାସ୍ତାରେ ଗାଈ ଗୋଠ ଶୋଇଥିବା ବେଳେ ଏକ ଅଜଣା ଗାଡି ସେମାନଙ୍କ ଉପରେ ଚଢିଯାଇଛି। ଫଳରେ ଘଟଣାସ୍ଥଳରେ ୧୨ଟି ଗାଈଙ୍କର ମୃତ୍ୟୁ ହୋଇଥିବା ବେଳେ ୪ଟି ଗାଈ ଗୁରୁତର ହୋଇଛନ୍ତି। ଗାଈ ମାଲିକମାନେ ଗାଈଗୁଡିକୁ ରାତିରେ ବାନ୍ଧୁ ନାହାଁନ୍ତି। ଯାହାଫଳରେ ଗାଈ ଗୁଡିକ ଜାତୀୟ ରାଜପଥ ଉପରେ ରାତି ତମାମ ଶୋଇ ରହୁଛନ୍ତି। ତେଣୁ ଏହିଭଳି ଦୁର୍ଘଟଣାର ଶିକାର ହେଉଛନ୍ତି। 

ପୂର୍ବରୁ ଏହି ଛକରେ ଏଭଳି ଦୁର୍ଘଟଣା ଘଟିଥିଲା। ତେବେ ବାରମ୍ବାର ଏଭଳି ଦୁର୍ଘଟଣା ଘଟୁଥିବା ବେଳେ ପ୍ରଶାସନ ପକ୍ଷରୁ ଛକରେ ଗାଈ ନଛାଡିବା ପାଇଁ ବୋର୍ଡ ଲଗାଇ ଦେଇ କାମ ସାରିଦେଇଛି। ତେଣୁ ତୁରନ୍ତ ପ୍ରଶାସନ ତରଫରୁ ଗାଈ ମାଲିକଙ୍କୁ ସଚେତନ କରାଇବା ସହ ଦଣ୍ଡବିଧାନ କରିବା ପାଇଁ ଦାବି ହେଉଛି।