ବାରିପଦା, ୩୦/୧୦: କାର୍ଯ୍ୟରେ ଅବହେଳା କରି ଗୋଡ ଲମ୍ବେଇ ବସିଥିଲେ ଟ୍ୟାଗ୍ ଅଫିସର୍ । ରିପୋର୍ଟ ଦେଖିବା ପରେ କଠୋର ପଦକ୍ଷେପ ନେଲେ ଜିଲ୍ଲାପାଳ । ଜିଲ୍ଲାରେ ନିଯୁକ୍ତ ଥିବା ୮୪୩ ଟ୍ୟାଗ୍ ଅଫିସର୍ଙ୍କ ଦରମା ବନ୍ଦ କରିବାକୁ ଦେଲେ ନିର୍ଦ୍ଦେଶ । ଗ୍ରାମୀଣ ଗୃହ/ପ୍ରଧାମନ୍ତ୍ରୀ ଆବାସ ନିର୍ମାଣରେ ବିଳମ୍ବ ଓ ନିଜ କାର୍ଯ୍ୟରେ ଅବହେଳା ପାଇଁ ବନ୍ଦ ହେଲା ଦରମା । ଏହି ଅଫିସର୍ ମାନଙ୍କ ଦରମା ଅକ୍ଟୋବର ମାସରୁ ବନ୍ଦ ରଖିବାକୁ ୨୬ ବ୍ଲକର ବିଡ଼ିଓଙ୍କୁ ନିର୍ଦ୍ଦେଶ ଦେଲେ ମୟୂରଭଞ୍ଜ ଜିଲ୍ଲାପାଳ ।
ଜିଲ୍ଲାରେ ଗ୍ରାମ୍ୟ ଗୃହ ନିର୍ମାଣ କାର୍ଯ୍ୟରେ ୧୦୧୬ ଜଣ ଅଧିକାରୀ ନିୟୋଜିତ ଅଛନ୍ତି । ଯେଉଁଥିରୁ ୧୭୩ ଜଣ ନିଜ କାର୍ଯ୍ୟ ଠିକ୍ ଭାବେ କରିଥିବା ବେଳେ, ଅନ୍ୟ ୮୪୩ ଜଣଙ୍କ କାର୍ଯ୍ୟ ସନ୍ତୋଷ ଜନକ ନୁହେଁ । ତେଣୁ କାର୍ଯ୍ୟରେ ଅବହେଳା ତଥା ମନିଟରିଙ୍ଗ ଅଭାବରୁ ୬୩ ପ୍ରତିଶତ ଘର ଏବେ ଅଧା ହୋଇ ପଡ଼ିଛି । ଫଳରେ ସରକାରୀ ଯୋଜନାରେ ସଫଳତା ମିଳୁନାହିଁ । ଯାହାକୁ ନେଇ କାର୍ଯ୍ୟ ସମ୍ପୂର୍ଣ୍ଣ ନହେବା ପର୍ଯ୍ୟନ୍ତ ଦରମା ବନ୍ଦ ହେବ ବୋଲି ଚିଠିରେ ସ୍ପଷ୍ଟ ଉଲ୍ଲେଖ କରିଛନ୍ତି ଜିଲ୍ଲାପାଳ ହେମନ୍ତ ସୟ ।
