ଉଦଳା,୨୭/୧୨: ଉଦଳାରେ ମାତିଲେ ଲୁଟେରା । ବିଳମ୍ୱିତ ରାତିରେ ୪ ମନ୍ଦିରରୁ କରିଲେ ଚୋରି । କପ୍ତିପଦା ବଜାରରେ ଥିବା ଲକ୍ଷ୍ମୀ ମନ୍ଦିର, ପାର୍ବତୀ ମନ୍ଦିର, ମଙ୍ଗଳା ମନ୍ଦିର ଏବଂ ଚଣ୍ଡୀ ମନ୍ଦିରରେ ପଶି ଠାକୁରଙ୍କ ମୁକୁଟ, ନଥ, ଚିତ୍ତା ସହିତ ଅନ୍ୟ ପୂଜା ସାମଗ୍ରୀ ଏବଂ ହୁଣ୍ଡି ଭାଙ୍ଗି ଦାନ ଅର୍ଥ ଲୁଟି ନେଇଛନ୍ତି ଦୁର୍ବୃତ୍ତ । ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ଅନ୍ତର୍ଗତ ଅଞ୍ଚଳର ୪ଟି ମନ୍ଦିରରେ ଏଭଳି ଘଟଣା ଘଟିଥିବା ଖବର ସାମ୍ନାକୁ ଆସିଛି ।
ସୂଚନା ମୁତାବକ, କପ୍ତିପଦା ବଜାରରେ ଥିବା ଲକ୍ଷ୍ମୀ ମନ୍ଦିର, ପାର୍ବତୀ ମନ୍ଦିର, ମଙ୍ଗଳା ମନ୍ଦିର ଏବଂ ଚଣ୍ଡୀ ମନ୍ଦିରରେ ଗୁରୁବାର ବିଳମ୍ୱିତ ରାତିରେ ଦୁର୍ବୃତ୍ତ ମାନେ ପଶିଥିଲେ । ଦୁର୍ବୃତ୍ତମାନେ ମନ୍ଦିର ମୁଖ୍ୟ ଗେଟ୍ ତାଲା ଭାଙ୍ଗି ଭିତରେ ପଶି ଠାକୁରଙ୍କ ମୁକୁଟ, ନଥ, ଚିତ୍ତା ସହିତ ଅନ୍ୟ ପୂଜା ସାମଗ୍ରୀ ଲୁଟି ନେଇଥିଲେ । ଏହା ସହିତ ସମସ୍ତ ମନ୍ଦିରର ହୁଣ୍ଡି ବାକ୍ସ ଭାଙ୍ଗି ଦାନ ଅର୍ଥ ମଧ୍ୟ ଦୁବୃତ୍ତମାନେ ଲୁଟି ନେଇଥିଲେ । ଏକକାଳୀନ ୪ଟି ମନ୍ଦିରରେ କଳାକନା ବୁଲାଇ ଦେଇଛନ୍ତି ଦୁର୍ବୃତ୍ତ । ଶୁକ୍ରବାର ସକାଳୁ ପୂଜା କରିବାକୁ ଆସିଥିବା ପୂଜକ ମନ୍ଦିରରୁ ଲୁଟ୍ ହୋଇଥିବା ଜାଣି ଅନ୍ୟ ପୂଜକ ମାନଙ୍କୁ ଜଣାଇଥିଲେ । ଏହାକୁ ନେଇ ସମସ୍ତ ମନ୍ଦିର କମିଟି ପକ୍ଷରୁ କପ୍ତିପଦା ଥାନାରେ ଲିଖିତ ଅଭିଯୋଗ କରାଯାଇଛି । ଉକ୍ତ ଅଭିଯୋଗ ଆଧାରରେ କପ୍ତିପଦା ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଛି।
