ନୂଆଦିଲ୍ଲୀ, ୧୬/୦୭ : ଚୀନର ନୂଆ ଅସ୍ତ୍ର। ହାତରେ ନମାରି ଭାତରେ ମାରିବ । ଭିନ୍ନ ଉପାୟରେ ଯୁଦ୍ଧ ଲଢିବ ଚୀନ। ପିଏଲଏରେ ସାମିଲ ହେବେ ମହୁମାଛି ସେନା । ମିଲିଟାରୀ ଟ୍ରେନିଂ ଦେଉଛି ଡ୍ରାଗନ୍। କମାଣ୍ଡ୍ ଦେବା ମାତ୍ରେ ଶତ୍ରୁ ଠିକଣାରେ ପଶି କରିବେ ଆକ୍ରମଣ। ମହୁମାଛିଙ୍କ ପିଠିରେ ଲାଗିବ ସ୍ଵତନ୍ତ୍ର ଡିଭାଇସ୍। ଏମାନଙ୍କୁ କଣ୍ଟ୍ରୋଲ କରିବ ବ୍ରେନ୍ କଣ୍ଟ୍ରୋଲର। ଏହାକୁ ଡିଜାଇନ୍ କରିଛନ୍ତି ବେଜିଂ ଇନଷ୍ଟିଚ୍ୟୁଟ୍ ଅଫ ଟେକ୍ନୋଲୋଜିର ବୈଜ୍ଞାନିକ।
ସମୟ ବଦଳିବା ସହ ବଦଳୁଛି ଉପାୟ। ଯୁଦ୍ଧରେ ବ୍ୟବହାର ହେଉଛି ଅତ୍ୟାଧୁନିକ ଟେକ୍ନୋଲୋଜି। ଡ୍ରୋନ୍ ମିଶାଇଲ୍ ଠାରୁ ନେଇ ପରମାଣୁ ଅସ୍ତ୍ର ଯାଏଁ ଏବେ ସୁସଜ୍ଜିତ ବିଭିନ୍ନ ଦେଶର ସେନା। ଯୁଦ୍ଧରେ ବିଧ୍ଵଂସଲୀଳା ରଚୁଥିବା ଅତ୍ୟାଧୁନିକ ଅସ୍ତ୍ରଶସ୍ତ୍ରର କରାଯାଉଛି ବ୍ୟବହାର। ହେଲେ ସମସ୍ତଙ୍କ ଠାରୁ ଆଉ ପାଦେ ଆଗକୁ ଯିବା ଲକ୍ଷ୍ୟରେ ଚୀନ। ଯୁଦ୍ଧ ପାଇଁ ଆପଣୋଉଛି ନୂଆ ରଣନୀତି। ମଶା ଡ୍ରୋନ୍ ପରେ ଏବେ ମହୁମାଛି ଫଉଜ ତିଆରି କରୁଛି ଡ୍ରାଗନ୍। ଏଣିକି ଚୀନ ସେନାରେ ସାମିଲ ହେବେ ମହୁମାଛି। ଯୁଦ୍ଧ ପାଇଁ ଦିଆଯାଉଛି ମିଲିଟାରୀ ଟ୍ରେନିଂ।
ମହୁମାଛିଙ୍କୁ କାବୁ କରିବା ପାଇଁ ବେଜିଂର ବୈଜ୍ଞାନିକମାନେ ନୂଆ ଡିଭାଇସ୍ ତିଆରି କରିଛନ୍ତି। ଏହି ପରୀକ୍ଷଣରେ ୧୦ ରୁ ୯ ମହୁମାଛି ସଠିକ୍ ରେସପନ୍ସ କରିଛନ୍ତି। ଏହାର ଓଜନ ମାତ୍ର ୭୪ ମିଲିଗ୍ରାମ। ଏହି ଡିଭାଇସ୍ ମହୁମାଛିଙ୍କ ପିଠିରେ ଲଗାଯିବ। ଏହାର ପିନ୍କୁ ମହୁମାଛିଙ୍କ ମସ୍ତିଷ୍କ ସହ ସଂଯୋଗ କରି ଇଲେକ୍ଟ୍ରିକ୍ ପଲ୍ସ ଦ୍ଵାରା କମାଣ୍ଡ୍ ଦିଆଯିବ। ତେବେ ଯୁଦ୍ଧରେ ମହୁମାଛିଙ୍କୁ ପ୍ରୟୋଗ କଲେ ଏମାନେ ଚୀନ ପାଇଁ ଏକ ବଡ଼ ଅସ୍ତ୍ର ପାଲଟିବେ। ଖାଲି ସେତିକି ନୁହେଁ ଏମାନଙ୍କ ଦ୍ଵାରା ଚୀନ ସିକ୍ରେଟ୍ ଅପରେସନ କରିପାରିବ। ଭୂକମ୍ପ ପ୍ରଭାବିତ ଅଞ୍ଚଳରେ ଏମାନଙ୍କୁ ବ୍ୟବହାର କରି ମାଟି ଭିତରେ ଦବିଥିବା ଲୋକଙ୍କ ବିଷୟରେ ତଥ୍ୟ ସଂଗ୍ରହ କରିହେବ। ତେବେ ଏହି ଡିଭାଇସ୍ ଅତି ଛୋଟ ଆକୃତିର ହୋଇଥିବା ଯୋଗୁଁ ଏବେ ବ୍ୟାଟେରୀ ଉପରେ କାମ ଚାଲିଛି।
