ଭୁବନେଶ୍ବର, ୬।୫ : ବିଜେଡି ପକ୍ଷରୁ ଅରୁନ୍ଧତୀ ଦେବୀ ଓ ନିମାପଡା ବିଧାୟକ ସମୀର ଦାସଙ୍କୁ ନୂଆ ଦାୟିତ୍ବ ଦିଆଯାଇଛି। ଅରୁନ୍ଧତୀ ଦେବୀଙ୍କୁ ବିଜେଡି ସାଧାରଣ ସମ୍ପାଦକ ଦାୟିତ୍ବ ଦଳର ସୁପ୍ରିମୋ ଦେଇଛନ୍ତି। ସେହିପରି ସମୀର ଦାସଙ୍କୁ ଢେଙ୍କାନାଳ ଲୋକସଭା ନିର୍ବାଚନମଣ୍ଡଳୀ ପର୍ଯ୍ୟବେକ୍ଷକ ଦାୟିତ୍ବ ମିଳିଛି।
ଅରୁନ୍ଧତୀ ବିଜେପି ଛାଡି ବିଜେଡିରେ ଯୋଗ ଦେଇଥିଲେ। ଏହା ପରେ ତାଙ୍କୁ ଦେବଗଡ ଆସନରୁ ବିଧାନସଭା ଟିକେଟ ବିଜେଡିରୁ ମିଳିଥିଲା। କିନ୍ତୁ ପରବର୍ତ୍ତି ସମୟରେ ଦେବଗଡରେ ଦଳ ପ୍ରାର୍ଥୀ ପରିବର୍ତ୍ତନ କରିଥିଲା। ଅରୁନ୍ଧତୀଙ୍କ ପରିବର୍ତେ ରୋମାଞ୍ଚ ରଞ୍ଜନ ବିଶ୍ବାଳଙ୍କୁ ଦଳ ପ୍ରାର୍ଥୀ କରିଥିଲା। ବର୍ତ୍ତମାନ ବିଜେଡି ପକ୍ଷରୁ ଅରୁନ୍ଧତୀଙ୍କୁ ଦଳୀୟ ଦାୟିତ୍ବ ଦିଆଯାଇଛି। ଦଳର ସାଧାରଣ ସମ୍ପାଦକ ଭାବେ ତାଙ୍କୁ ନିଯୁକ୍ତି ମିଳିଛି।
ସେହିପରି ନିମାପଡା ବିଧାୟକ ସମୀର ଦାସଙ୍କୁ ଚଳିତ ନିର୍ବାଚନରେ ଦଳ ନିମାପଡାରୁ ପ୍ରାର୍ଥୀ କରି ନ ଥିଲା। ତାଙ୍କ ସ୍ଥାନରେ ବିଜେପି ଛାଡି ବିଜେଡି ଯୋଗ ଦେଇଥିବା ଦିଲୀପ ନାୟକଙ୍କୁ ଦଳ ପ୍ରାର୍ଥୀ କରିଥିଲା। ବର୍ତ୍ତମାନ ସମୀର ଦାଶଙ୍କୁ ଦଳ ପକ୍ଷରୁ ନୂଆ ଦାୟିତ୍ବ ଦିଆଯାଇଛି। ଢେଙ୍କାନାଳ ଲୋକସଭା କ୍ଷେତ୍ରୀୟ ପର୍ଯ୍ୟବେକ୍ଷକ ଭାବେ ନିଯୁକ୍ତ କରାଯାଇଛି।