ଉଦଳା,୨୨।୭ : ବିଲରେ ବାପା ପୁଅ କାମ କରୁଥିଲେ, ହେଲେ ସେଠାରେ ପହଁଚିଲେ ସମ୍ପର୍କୀୟ ଭାଇ ଓ ପୁତୁରା। ବିଲରେ ହିଡ଼ ଭାଙ୍ଗିବାକୁ ନେଇ ଉଭୟଙ୍କ ମଧ୍ୟରେ ଝଗଡା ହେଲା । ଆଉ ବାପା ପୁଅକୁ କଟୁରୀ ଓ କୋଦାଳରେ ବିଲ ଭିତରେ ହାଣିଲେ ସମ୍ପର୍କୀୟ ଭାଇ ଓ ପୁତୁରା। ଏଭଳି ଘଟଣା ଘଟିଛି କପ୍ତିପଦା ଥାନା ନୁଦଡିହା ଗ୍ରାମରେ। 

ଏହି ଗ୍ରାମର ପରମାନନ୍ଦ ନାୟକ ଏବଂ ତାଙ୍କ ପୁଅ ସତ୍ୟସାଇ ନାୟକ ନିଜ ବିଲରେ କାମ କରୁଥିଲେ।  ଉକ୍ତ ସମୟରେ ସମ୍ପର୍କୀୟ ଭାଇ ଜଗବନ୍ଧୁ ନାୟକ ଏବଂ ତାଙ୍କ ପୁଅ ତପନ ନାୟକ, ଶ୍ରୀନାଥ ନାୟକ ସେଠାରେ ପହଞ୍ଚି ବିଲରେ କାମ କରିବାକୁ ବିରୋଧ କରିଥିଲେ। ଏପରି ବିଲରେ କାମ ବନ୍ଦ ନ କରିଲେ ହାଣିଦେବେ ବୋଲି କହିଥିଲେ। ଯାହାକୁ ଉଭୟଙ୍କ ମଧ୍ୟରେ ଝଗଡା ହୋଇଥିଲା। ଝଗଡା ଏତେ ଉଗ୍ର ରୂପ ନେଲା ଯେ ସମ୍ପର୍କୀୟ ଭାଇ ଏବଂ ପୁତୁରା କଟୁରୀ ଧରି ପରମାନନ୍ଦ ନାୟକ ଏବଂ ତାଙ୍କ ପୁଅ ସତ୍ୟସାଇ ନାୟକକୁ ହାଣିଥିଲେ। ଗୁରୁତର ଅବସ୍ଥାରେ ଉଭୟ ବାପା-ପୁଅଙ୍କୁ ଚିକିତ୍ସା ନିମନ୍ତେ ଉଦଳା ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ଉଭୟଙ୍କ ଅବସ୍ଥା ଗୁରୁତର ରହିଛି। ଏ ନେଇ କପ୍ତିପଦା ଥାନାରେ ଅଭିଯୋଗ ହୋଇଥିବା ଜଣାଯାଇଛି।