ଲମତାପୁଟ,୨୩/୧୦: ଆମ୍ୱୁଲାନ୍ସରେ ବେଆଇନ ଗଞ୍ଜେଇ ଚାଲାଣ ବେଳେ ମାଡ଼ି ବସିଲା ନନ୍ଦପୁର ପୋଲିସ । ଗାଡିରୁ ଜବତ ହେଲା ୧୭୦ କେଜି ଗଞ୍ଜେଇ । ଏହି ଗଞ୍ଜେଇ ନନ୍ଦପୁରରୁ ସିମିଳିଗୁଡା ଅଞ୍ଚଳକୁ ଚାଲାଣ ହେଉଥିଲା । ଘଟଣାସ୍ଥଳରୁ ଡ୍ରାଇଭର ଫେରାର ହୋଇଯାଇଥିବା ବେଳେ କୋରାପୁଟ ଜିଲ୍ଲା ଲମତାପୁଟ ବ୍ଲକ୍‌ କଲେଜ ଛକ ନିକଟରେ ଏଭଳି ଘଟଣା ଘଟିଛି । 

ସୂଚନା ମୁତାବକ, କୋରାପୁଟରେ ଗଞ୍ଜେଇ ଚୋରା ଚାଲାଣ ହେଉଥିବା ନେଇ ଏକ ବିଶେଷ ସୂତ୍ରରୁ ଖବର ପାଇଥିଲେ କୋରାପୁଟ ଏସପି । ଖବର ପାଇ ଏସପିଙ୍କ ନିର୍ଦ୍ଦେଶ କ୍ରମେ ନନ୍ଦପୁର ଏସଡିପିଓଙ୍କ ନେତୃତ୍ତ୍ୱରେ ନନ୍ଦପୁର ପୋଲିସ କଲେଜ ଛକ ନିକଟରେ ପାଟ୍ରୋଲିଂ କରୁଥିଲା । ଏହି ସମୟରେ ଏକ ଆମ୍ବୁଲାନ୍ସ ଆସୁଥିବାର ଦେଖିଥିଲା ପୋଲିସ । ଉକ୍ତ ଗାଡ଼ିର ତ୍ରାଇଭର ପୋଲିସକୁ ଦେଖି ଅଳ୍ପ ଦୂରରେ ଗାଡ଼ି ରଖି ଫେରାର ହୋଇ ଯାଇଥିଲା । ପୋଲିସ ଗାଡ଼ିକୁ ଯାଞ୍ଚ କରିବାରୁ ସେଥିରେ ୭ ଟି ଜରି ବସ୍ତାରେ ଗଞ୍ଜେଇ ଥିବାର ଜଣା ପଡିଥିଲା । ପରେ ସ୍ଥାନୀୟ ମାଜିଷ୍ଟ୍ରେଟଙ୍କ ଉପସ୍ଥିତିରେ ଜବତ ଗଞ୍ଜେଇକୁ ଓଜନ କରାଯିବାରୁ ୧୭୦ କେଜି ଗଞ୍ଜେଇ ଥିବାର ଜଣାପଡ଼ିଥିଲା । ଏହି ଗଞ୍ଜେଇର ମୂଲ୍ୟ ୧୭ ଲକ୍ଷ ଟଙ୍କାର ହେବ ବୋଲି ପୋଲିସ ପ୍ରକାଶ କରିଛି । ଏହି ଗଞ୍ଜେଇ ନନ୍ଦପୁରରୁ ସିମିଳିଗୁଡା ଅଞ୍ଚଳକୁ ଚାଲାଣ ହେଉଥିଲା । ତେବେ ଏଥିରେ କେଉଁ ମାନେ ସମ୍ପୃକ୍ତ ଅଛନ୍ତି ପୋଲିସ ଏକ ଏନଡିପିଏସ ମଲାଲା ରୁଜୁ କରି ଘଟଣାର ତଦନ୍ତ ଜାରି ରଖିଛି ।