ପାଟଣାଗଡ, ୨୮।୭(ଆପ୍ର): ପୋଖରୀକୁ ଗାଧୋଇବାକୁ ଯାଇ ଜଣେ ଯୁବକ ନିଖୋଜ । ନିଖୋଜ ଯୁବକ ଜଣକ ହେଲେ ଶୁଶିଲ ବରିହା। ବଲାଙ୍ଗୀର ଜିଲ୍ଲା ଲରମ୍ଭା ଥାନା କହ୍ନେଇଟାଳ ଗାଁରେ ଏହି ଘଟଣା ଘଟିଛି।
ଶୁଶିଲ ବିଲରୁ କାମ ସାରି ମଙ୍ଗଳବାର ମଧ୍ୟାହ୍ନ ସମୟରେ କିଛି ମାଦକ ଦ୍ରବ୍ୟ ସେବନ କରି ଘରକୁ ଆସିଥିଲେ । ପରିବାର ବର୍ଗଙ୍କ ସହ ବଚସା ପରେ ସେ ଗାଁ ପୋଖରୀକୁ ଗାଧୋଇବାକୁ ଯାଇଥିଲେ। ଦୀର୍ଘ ସମୟ ପର୍ଯ୍ୟନ୍ତ ସେ ଘରକୁ ନ ଫେରିବାରୁ ତାଙ୍କୁ ପରିବାର ଲୋକ ଖୋଜାଖୋଜି କରିଥିଲେ। ତାଙ୍କର କୌଣସି ପତ୍ତା ନମିଳିବାରୁ ପରିବାର ଲୋକ ଲରମ୍ଭା ଥାନାରେ ଶୁଶିଲ ନିଖୋଜ ହୋଇଥିବା ନେଇ ଲିଖିତ ଅଭିଯୋଗ କରିଥିଲେ। ପରେ ପୁଲିସ ଅଗ୍ନିଶମ ବାହିନୀର ସହାୟତା ନେଇ ଗାଁ ପୋଖରୀରେ ପହଞ୍ଚି ଖୋଜାଖୋଜି ଆରମ୍ଭ କରିଥିଲା। ଅଗ୍ନିଶମ ବାହିନୀ ଦୀର୍ଘ ୬ ଘଣ୍ଟା ରୁ ଉର୍ଦ୍ଧ୍ବ ସମୟ ଧରି ପୋଖରୀରେ ଖୋଜାଖୋଜି କରିବା ପରେ ମଧ୍ୟ ଶୁଶିଲଙ୍କ କୌଣସି ଖୋଜ ଖବର ମିଳି ନ ଥିଲା। ପୁଲିସ ବିଭିନ୍ନ ଦିଗକୁ ନେଇ ଘଟଣାର ତଦନ୍ତ କରୁଛି।
