ପାଟଣାଗଡ,୨୮।୭ ( ଆପ୍ର) : ବଲାଙ୍ଗୀର ଜିଲ୍ଲା ପାଟଣାଗଡ଼ ବ୍ଳକ ଯୋଗୀମୁଣ୍ଡା ମୁଖ୍ୟ ରାସ୍ତାର ଜନଗହଳି ସ୍ଥାନରେ ଅଧା କଟା ଗଛଗୁଡିକ ରହିଛି। ଫଳରେ ଦୁର୍ଘଟଣା ଘଟିବା ଆଶଙ୍କା ସୃଷ୍ଟି ହୋଇଛି।ଲୋକଙ୍କ ଅଭିଯୋଗ ସତ୍ତ୍ୱେ ସଂପୃକ୍ତ ଠିକା ସଂସ୍ଥା ଏପରି କି ପ୍ରଶାସନିକ ସ୍ତରରେ ମଧ୍ୟ ଏଥିପ୍ରତି ଦୃଷ୍ଟି ଦେଉନଥିବା କାରଣରୁ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ବୃଦ୍ଧି ପାଇବାରେ ଲାଗିଛି।
ଏକ ଠିକା ସଂସ୍ଥା ଦ୍ଵାରା ପାଟଣାଗଡ଼ ବର୍ଥଲା ଛକ ଠାରୁ ଖପ୍ରାଖୋଲ ଲାଠୋର ପର୍ଯ୍ୟନ୍ତ ରାସ୍ତାର ପ୍ରଶସ୍ତୀକରଣ କାମ ଚାଲିଛି। ଏହି ପରିପ୍ରେକ୍ଷୀରେ ରାସ୍ତାର ଉଭୟ ପାର୍ଶ୍ବରେ ଥିବା ଶହଶହ ବର୍ଷର ଗଛ ଗୁଡ଼ିକ ଠିକା ସଂସ୍ଥା କାଟିବାରେ ଲାଗିଛି। ଯାହାକୁ ନେଇ ଗଛ ସହିତ ଯୋଡି ହୋଇଥିବା ଐତିହ୍ୟ କ୍ଷୟର ପ୍ରତିବାଦରେ ସେପ୍ଟେମ୍ବର ୭ ତାରିଖରେ ଜିଲ୍ଲା ଆଦିବାସୀ କଲ୍ୟାଣ ସଂଘ ପାଟଣାଗଡ଼ ଶାଖା ପକ୍ଷରୁ ଗଛକଟା ବନ୍ଦ ନେଇ ଉପଜିଲ୍ଲାପାଳଙ୍କୁ ଏକ ଦାବୀପତ୍ର ପ୍ରଦାନ କରିଥିଲେ। ଏଥି ସହ ତା ପରଦିନ କାର୍ଯ୍ୟାଳୟ ସମ୍ମୁଖରେ ସଂଘ କର୍ମକର୍ତ୍ତାମାନେ ଧାରଣା ଦେଇଥିଲେ। ଗଛ କଟା ବନ୍ଦ କରାଯିବ ବୋଲି ଉପଜିଲ୍ଲାପାଳଙ୍କ ପ୍ରତିଶ୍ରୁତି ପରେ ମଧ୍ୟ ଗଛକଟା ବନ୍ଦ ହୋଇନଥିଲା। ୧୫ ଦିନରୁ ଉର୍ଦ୍ଧ୍ବ ହେବ ଯୋଗିମୁଣ୍ଡାର ମୂଖ୍ୟ ରାସ୍ତା ଜନଗହଳି ଅଞ୍ଚଳରେ ଏକାଧିକ ବିରାଟ ନିମ୍ବଗଛ ଗୁଡ଼ିକୁ କଟର ସାହାଯ୍ୟରେ ଗଛର ମୂଳକୁ ଅଧାରୁ ଅଧିକ ଅଂଶ କଟାଯାଇ ଛାଡି ଦିଆଯାଇଛି। ସେହି ରାସ୍ତାଦେଇ ଲୋକେ ଭୟଭୀତ ଅବସ୍ଥାରେ ଯାଉଥିବା ବେଳେ କେତେବେଳେ ଯେ ଏହି ଗଛ ପଡି ଲୋକଙ୍କ ଜୀବନ ଚାଳିଯିବ କହିହେବ ନି ? ଅନ୍ୟ ପଟେ ସେହି ରାସ୍ତାଦେଇ ଯାତାୟତ କରୁଥିବା ବିଭିନ୍ନ ପ୍ରଶାସନିକ ଅଧିକାରୀମାନଙ୍କୁ ଲୋକେ ଘଟଣା ସ୍ଥଳରେ ଅଟକାଇ ଅଭିଯୋଗ ସତ୍ତ୍ୱେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ ହେଉଛି। କିଛି ଅଘଟଣ ଘଟିବା ପୂର୍ବରୁ ଏଥିପ୍ରତି ଉପଜିଲ୍ଲାପାଳ ଦୃଷ୍ଟି ଦେବାକୁ ଯୋଗିମୁଣ୍ଡା ଗ୍ରାମବାସୀ ଦାବୀ କରିଛନ୍ତି।
