ପାଟଣାଗଡ, ୨୫|୭(ଆପ୍ର): ପାଟଣାଗଡ଼ ଥାନା ଅଞ୍ଚଳର ବିଭିନ୍ନ ସ୍ଥାନ ରେ ପୁଲିସ ଆଜି ଚଢାଉ କରି ବେଆଇନ ଭାବେ ଅନ୍ ଲାଇନରେ ସଟ୍ଟା ଖେଳାଉଥିବା ୫ ଜଣ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ କେନ୍ଦୁମୁଣ୍ଡି ଗାଁର ଭୋଲାସାଗର ନାଗ, ବ୍ରାହ୍ମପୁରା ର ବାସୁଦେବ କୁଦେଇ , ବାବାଜୀ ପଡା ର ହାଡୁ ହୋତା,ବଡପଡାର ଗିରିଜା ପ୍ରସାଦ ନାଗ ଓ ରାମପୁର ର ବାସୁଦେବ ହେର୍ଣ୍ଣା। ଏଥି ସହ ସେମାନଙ୍କ ଠାରୁ ପୁଲିସ ୧୪ ହଜାର ୧ ଶହ ଟଙ୍କା, ସଟ୍ଟାଚାର୍ଟ, ୨ ଗୋଟି ମୋବାଇଲ ଫୋନ, ଗୋଟିଏ ମୋବାଇଲ ଚାର୍ଜର, ପାୱାର ବ୍ୟାଙ୍କ, କାଲକୁଲେଟର, ଡଟ୍ ପେନ୍ ଆଦି ଜବତ କରିଛି।
ସୂଚନା ଅନୁସାରେ, ବଲାଙ୍ଗୀର ଜିଲ୍ଲା ଆରକ୍ଷୀ ଅଧିକ୍ଷକ ଅଭିଳାଷ ଜୀଙ୍କ ନିର୍ଦ୍ଦେଶ କ୍ରମେ ଏସଡିପିଓ ସଦାନନ୍ଦ ପୂଝାରୀଙ୍କ ତତ୍ତ୍ୱାବଧାନରେ ଥାନା ଅଧିକାରୀ ହରିବନ୍ଧୁ ଗଡତ୍ୟାଙ୍କ ନେତୃତ୍ବରେ ଏକ ଟିମ୍ ଗଠନ କରାଯାଇଥିଲା। ଉକ୍ତ ଟିମ୍ ଶୁକ୍ରବାର ପାଟଣାଗଡ଼ ଥାନା ଅଞ୍ଚଳରେ ବେଆଇନ ଭାବେ ଚାଲିଥିବା ବିଭିନ୍ନ ଅନ୍ ଲାଇନରେ ସଟ୍ଟା ଆଡ୍ଡା ଗୁଡ଼ିକ ଉପରେ ଚଢାଉ କରିଥିଲା। ଚଢ଼ାଉ ସମୟରେ ସଟ୍ଟା ଖେଳାଉଥିବା ୫ ଜଣ ଅଭିଯୁକ୍ତଙ୍କୁ ପୁଲିସ ଗିରଫ କରି ଥାନାକୁ ଆଣିଥିଲା ।
ପରେ ଏନେଇ ସେମାନଙ୍କ ନାମରେ ୫ ଟି ପୃଥକ ପୃଥକ ମାମଲା ରୁଜ୍ଜୁ କରି ସନ୍ଧ୍ୟା ସମୟରେ କୋର୍ଟ ଚାଲାଣ କରିଥିଲା। କୋର୍ଟରେ ଜାମିନ ନାମଞ୍ଜୁର ହେବାରୁ ଅଭିଯୁକ୍ତ ମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିବା ଥାନା ଅଧିକାରୀ ଶ୍ରୀ ଗଡତ୍ୟା ସୂଚନା ଦେଇଛନ୍ତି।
