ମାଲକାନଗିରି, ୨୦।୧୦ (ଆପ୍ର): ଆଦିବାସୀ ଅଧ୍ୟୁଷିତ ମାଲକାନଗିରି ଜିଲ୍ଲାର ୫ଜଣ ଯୁବକ ଯୁବତୀ ଓଏଏସ ପରୀକ୍ଷା ରେ କୃତକାର୍ଯ୍ୟ ହାସଲ କରିଛନ୍ତି। ସେମାନଙ୍କ ମଧ୍ୟରେ ୪ଜଣ ମହିଳା ଥିବା ବେଳେ ଜଣେ ପୁରୁଷ ଅଛନ୍ତି । ସେମାନେ ହେଲେ କ୍ଷମାଗୁରୁ ଗ୍ରାମର ବଣ୍ଡା ଜନଜାତିର ଯୁବତୀ ବିନି ମୁଦୁଲି,ପୋଟ୍ରେଲ ଗାଁ ର କୋୟା ଜନଜାତିର ଶ୍ୟାମା ମାଢୀ,ଗିରିକାନପାଲୀ ଗ୍ରାମର ଆଦିବାସୀ ଯୁବତୀ ମମତା ତାଉଡିଆ,ମେଣ୍ଡକୋଇଲି ଗ୍ରାମର ଭାଗ୍ୟଶ୍ରୀ ମିଶ୍ର,ମାଲକାନଗିରିର ପିଲହୋଲିକା ପ୍ରିୟଦର୍ଶିନୀ।
ବଣ୍ଡା ଜନଜାତିରୁ ବିନି ମୁଦୁଲି ପ୍ରଥମ ଓଏଏସ ହେବେ। ତାଙ୍କ ବାପା ଜଣେ ସ୍କୁଲର ରୋଷେୟା ଭାବେ କାମକରୁଥିବା ବେଳେ ମା’ ଅଙ୍ଗନ ୱାର୍ଡି କର୍ମୀ। ପରିବାରର ଆର୍ଥିକ ପରିସ୍ଥିତି ଭଲ ନଥିବାରୁ ଅନ୍ୟ କୌଣସି ଠାରେ କୋଚିଂ ନ ନେଇ ଘରେ ୟୁଟୁବ ମାଧ୍ୟମରେ ବିନି ଓଏଏସ ପରୀକ୍ଷା ପାଇଁ ପ୍ରସ୍ତୁତ ହୋଇଥିଲେ।
ବଣ୍ଡା ଘାଟିରେ ସେ ହେଉଛନ୍ତି ପ୍ରଥମ ଝିଅ ଓଏଏସ ।ଆଦିବାସୀ ଅଞ୍ଚଳରେ ଶିକ୍ଷା ଓ ମହିଳା ସଶକ୍ତିକରଣ ପ୍ରତିଗୁରୁତ୍ୱ ଦେବେ ବୋଲି କହିଛନ୍ତି। ଜଣଙ୍କର ପାଠ ପଢିବା ପ୍ରତି ଇଛା ଥିଲେ କେବେ ବି ଅର୍ଥ ବାଧକ ସାଜିବ ନାହିଁ। ସେ ଓଏଏସ ଅଫିସର ହୋଇ ପ୍ରଥମେ ଗରିବ ଅସହାୟ ଙ୍କ ସେବା କରିବା ସହିତ ସେମାନଙ୍କୁ ନ୍ୟାୟ ଦେବେ ବୋଲି କହିଛନ୍ତି ବିନି ମୁଦୁଲି।ବଣ୍ଡା ଘାଟିର ବଣ୍ଡା ଝିଅ ଓଏଏସ ଅଫିସର ହେବାକୁ ଯାଉଥିବାରୁ ସମଗ୍ର ମାଲକାନଗିରି ଜିଲ୍ଲା ବାସୀଙ୍କ ପକ୍ଷରୁ ପ୍ରଂଶସାର ସୁଅ ଛୁଟୁଛି । ବିନିଙ୍କ ପ୍ରତି ଗରିବ ବଣ୍ଡା ଜାତିର ଝିଅ ଅନ୍ୟ ମାନଙ୍କ ପାଇଁ ଉଦାହରଣ ପାଲଟିଛନ୍ତି। ତାଙ୍କର ଏହି ସଫଳତା ଅନ୍ୟ ଯୁବକ ଯୁବତୀଙ୍କୁ ପ୍ରେରଣା ଯୋଗାଇବ।