କଜାନ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଏଠାରେ ରୁଷ୍ର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଦ୍ୱିପାକ୍ଷୀୟ କଥାବାର୍ତ୍ତା କହିଛନ୍ତି, ଯେଉଁଥିରେ ଦୁଇ ଦେଶର ବିଭିନ୍ନ କ୍ଷେତ୍ରରେ ପାର୍ଟନରସିପ୍କୁ ଆହୁରି ମଜବୁତ କରିବା ଉପରେ ଆଲୋଚନା କରାଯାଇଛି। ଏହି ସମୟରେ ପୁଟିନଙ୍କ ମଜାଳିଆ ଅନ୍ଦାଜ ମଧ୍ୟ ଦେଖିବାକୁ ମିଳି ଥିଲା। କଥାବାର୍ତ୍ତା ବେଳେ ପୁଟିନ କିଛି ଏମିତି କହିଛନ୍ତି ,ଯେଉଁଥିରେ ପିଏମ ମୋଦି ମଧ୍ୟ ଜୋରରେ ହସିବାକୁ ଲାଗିଲେ।
ଉଲ୍ଲେଖନୀୟ ଯେ, ପୁଟିନ୍ ଭାରତ ଓ ରୁଷ୍ ମଧ୍ୟରେ ମଜବୁତ ସଂପର୍କ କଥାକୁ କହି ଥିଲେ। ସେ କହିଥିଲେ, ଉଭୟ ଦେଶ ମଧ୍ୟରେ ଏମିତି ସମ୍ୱନ୍ଧ ଅଛି, ଯାହାକୁ ବୁଝିବା ପାଇଁ କୌଣସି ଟ୍ରାନ୍ସଲେଟରର ଆବଶ୍ୟକତା ନାହିଁ।
ପୁଟିନ୍ ହାଲକାଫୁଲକା ଅନ୍ଦାଜରେ କହିଥିଲେ, ଆପଣଙ୍କୁ ମୋର ଶବ୍ଦ ବୁଝିବା ପାଇଁ ଟ୍ରାନ୍ସଲେଟରର ଆବଶ୍ୟକତା ନାହିଁ। ଆମ ମଧ୍ୟରେ ଏମିତି ସମ୍ୱନ୍ଧ ଅଛି ଯେ, ମୋତେ ଲାଗୁଛି କି, ଆପଣଙ୍କୁ କୌଣସି ଅନୁବାଦ (ଟ୍ରାନ୍ସଲେଟର)ର ଆବଶ୍ୟକତା ନାହିଁ। ପୁଟିନ୍ର ଏହି କଥା ଶୁଣି ପିଏମ୍ ମୋଦି ମଧ୍ୟ ନିଜ ହସକୁ ରୋକି ପାରି ନାହାନ୍ତି। ଏହା ପୂର୍ବରୁ ବୈଠକ ବେଳେ ଉଭୟ ନେତା ପରସ୍ପରକୁ ଖୁବ୍ ଉତ୍ସାହର ସହ ସ୍ୱାଗତ କରିବା ସହ ଆଲିଙ୍ଗନ କରି ଥିଲେ। ପୁଟିନ୍ ଭାରତ ଓ ରୁଷ୍ ମଧ୍ୟରେ ମଜବୁତ୍ ସହଯୋଗର କଥା କହିଥିଲେ ଯେ , ଆମେ ଭାରତ-ରୁଷ୍ ସହଯୋଗକୁ ଅତ୍ୟଧିକ ମହତ୍ୱ ଦେଉଛୁ, କାରଣ ଉଭୟ ଦେଶ ବ୍ରିକ୍ସର ସଂସ୍ଥାପକ ସଦସ୍ୟ। ଆମର ବିଧାୟିକା ଗୁଡ଼ିକ ମଧ୍ୟରେ ସହଯୋଗ ବୃଦ୍ଧି , ବିଦେଶ ମନ୍ତ୍ରୀଙ୍କ ମଧ୍ୟରେ ନିରନ୍ତର ବାର୍ତ୍ତା ଓ ବାଣିଜ୍ୟରେ ସକରାତ୍ମକ ବୃଦ୍ଧିକୁ ଆମେ ଦେଖୁଛୁ।
କଜାନରେ ଅନୁଷ୍ଠିତ ବୈଠକରେ ପୁଟିନ କହିଥିଲେ ଯେ, ବ୍ରିକ୍ସ ଭିତରେ ସହଯୋଗକୁ ଆହୁରି ମଜବୁତ କରିବା ପାଇଁ କିଛି ମହତ୍ତ୍ୱପୂର୍ଣ୍ଣ ନିର୍ଣ୍ଣୟ ନିଆଯାଏ। ସେହି ବୈଠକରେ ରୁଷ୍-ୟୁକ୍ରେନ ସଂଘର୍ଷରେ ମଧ୍ୟ ଆଲୋଚନା ହୋଇଛି। ପ୍ରଧାନମନ୍ତ୍ରୀ ମୋଦି ଭାରତର ଶାନ୍ତିପୂର୍ଣ୍ଣ ସମାଧାନର ସ୍ଥିତିକୁ ଦୋହରାଇଛନ୍ତି। ସେ କହିଛନ୍ତି , ଆମେ ରୁଷ୍ ଓ ୟୁକ୍ରେନ ମଧ୍ୟରେ ଚାଲିଥିବା ସଂଘର୍ଷକୁ ନେଇ ଲଗାତାର ସଂପର୍କରେ ରହିଛୁ। ଯେମିତି ମୁଁ ପ୍ରଥମରୁ କହିଥିଲି , ଆମ ମତରେ ସମସ୍ୟାର ସମାଧାନ ଶାନ୍ତିପୂର୍ଣ୍ଣ ଢଙ୍ଗରେ ହେବା ଉଚିତ୍। ପ୍ରଧାନମନ୍ତ୍ରୀ ମୋଦି ଏହା ମଧ୍ୟ କହିଛନ୍ତି ଯେ ଭାରତ ସଂପୂର୍ଣ୍ଣ ରୂପେ ଶାନ୍ତି ଓ ସ୍ଥିରତାର ଶୀଘ୍ର ଫେରିବା ନେଇ ସମର୍ଥନ କରିଥାଏ ।