ଖଜୁରୀପଡ଼ା, ୧୬/୦୭(ଆପ୍ର): କୋମଳ ମତି ଶିଶୁମାନଙ୍କ ପାଇଁ ଅଙ୍ଗନୱାଡ଼ି କେନ୍ଦ୍ର ସ୍ଥାପନ କରାଯାଇଛି । ସେମାନଙ୍କ ମାନସିକ ଓ ଶାରୀରିକ ବୃଦ୍ଧି ସହିତ ଉତ୍ତମ ସ୍ବାସ୍ଥ୍ୟ ପାଇଁ ସରକାର ପୁଷ୍ଟିକର ଖାଦ୍ୟ ସହିତ ଛତୁଆ ଯୋଗାଇ ଦେଉଛନ୍ତି । ଗର୍ଭବତୀ ମହିଳାମାନଙ୍କୁ ମଧ୍ୟ ଛତୁଆ ଦିଆଯାଉଛି। ବିଭିନ୍ନ ସ୍ବୟଂ ସହାୟକ ଗୋଷ୍ଠୀଙ୍କୁ ଏହାର ପ୍ରସ୍ତୁତି ଦାୟିତ୍ୱ ଦିଆଯାଇଛି। କିନ୍ତୁ ଏହି ଛତୁଆର ମାନକୁ ନେଇ ବାରମ୍ବାର ପ୍ରଶ୍ନ ଉଠୁଛି। କିଛି ମାସ ତଳେ ଜିଲ୍ଲାର ୬ଟି ଛତୁଆ ପ୍ରସ୍ତୁତି କେନ୍ଦ୍ରର ଛତୁଆ ଭୂବନେଶ୍ୱର ଠାରେ ପରୀକ୍ଷଣ ବେଳେ ଏହା ନିକୃଷ୍ଟ ମାନର ବୋଲି ରିପୋର୍ଟ ଆସିଥିଲା। ଫଳରେ ବିଭାଗ ଆଜି ପର୍ଯ୍ୟନ୍ତ ଏମାନଙ୍କ ବିଲ ଅଟକାଇ ରଖିଛି।
ତେବେ ଏବେ ପୁଣି ଆଉ ଏକ ସଙ୍ଗୀନ ଅଭିଯୋଗ ସାମ୍ନାକୁ ଆସିଛି। ଖଜୁରୀପଡ଼ା ବ୍ଲକର ଚକାପଥର ଠାରେ ଥିବା ଅଙ୍ଗନୱାଡ଼ି ୩(ଖ) ରେ ଅଙ୍ଗନୱାଡ଼ି ଠାରେ ପୋକ ଲାଗିଥିବା ଛତୁଆ ବଣ୍ଟନ କରାଯାଇଛି । ଏହି ପୋକ ଲାଗିଥିବା ଛତୁଆ ନେଇ ସସ୍ମିତା କହଁର, ସୁଷମା ଭୋଇ, ସ୍ନେହଲତା କହଁର ପ୍ରମୂଖ ଜିଲ୍ଲାପାଳଙ୍କୁ ଦେଖାଇଛନ୍ତି। ଜିଲ୍ଲାପାଳ ଅମ୍ରିତ ଋତୁରାଜ ଏହି ଛତୁଆ ଦେଖି ସିଡିପିଓ କ୍ରୀଷ୍ଣା କୁମାରୀ ବେହେରାଙ୍କୁ ଏହା କେମିତି ବଣ୍ଟନ କରାଗଲା ବୋଲି ପ୍ରଶ୍ନ କରିଛନ୍ତି। କେଉଁ କେଉଁ କେନ୍ଦ୍ରରେ ଏଭଳି ଛତୁଆ ବଣ୍ଟନ ହୋଇଛି ତଦନ୍ତ କରି ରିପ୍ରେଟ ତଲବ କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି। ଯଦି ଖରାପ ଛତୁଆ ଦିଆ ଯାଇଥିବା ଜଣାପଡେ, ତେବେ ସେମାନଙ୍କ ପେମେଣ୍ଟ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ।
ଅପରପକ୍ଷେ, ଛତୁଆ ପ୍ରସ୍ତୁତ ସ୍ଥାନକୁ ବିଡ଼ିଓ ଏବଂ ତହସିଲଦାର ଅଚାନକ ଚଢ଼ାଉ କରି ଖାଦ୍ୟର ମାନ ଯାଞ୍ଚ କରିବାକୁ ସିଡିଓ ଶମ୍ଭୁନାଥ ନନ୍ଦୀ ମଧ୍ୟ ନିର୍ଦ୍ଦେଶ ଦେଇଛନ୍ତି। ପୁଷ୍ଟିକର ଖାଦ୍ୟ ଗୁଡିକର ତଦାରଖ ନ ହେବା ଯୋଗୁ ନିମ୍ନ ମାନର ଛତୁଆ ବଣ୍ଟନ ହେଉଥିବା ଏବଂ ଏହି ଖାଦ୍ୟ ଖାଇ ଶିଶୁ ଓ ଗର୍ଭବତୀ ମହିଳା ରୋଗଗ୍ରସ୍ତ ହେବାର ଆଶଙ୍କା ରହୁଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏହା ଉପରେ ପ୍ରଶାସନ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦରକାର ବୋଲି ମତ ପ୍ରକାଶ ପାଇଛି।
